Mateus tỹ rá 19:1-30
19 Kỹ Jesus tóg ag mỹ tó kãn ja nĩ, ti tỹ nén tó sór mũ ti. Kỹ tóg Galiléia tá kãkutẽ kỹ goj tỹ Jordão mãra tĩ mũ sir. Israel ag jamã ũ vẽ gé.
2 Kỹ ũn e ag tóg ti nón mũ mũ. Kỹ tóg tá ag kygtãg kãn mũ sir.
3 Kỹ pãꞌi ag tóg ti tá junjun mũ gé sir. Ag tỹ ón kỹ ti vĩ mẽ sór vẽ, vẽnh prũ fón ke to. Kỹ ag tóg ti mỹ: “mỹ ẽg tỹ nén ũ ũ to ẽg prũ fag fón jé há nĩꞌ?“ he mũ.
4 19:4-5 Kỹ tóg ag mỹ: “Topẽ vĩ rá ki vem nĩ,” he mũ. “Ki tóg rán kỹ nĩ, Topẽ tỹ nén han mũ ti. Ti tỹ nén kar han ve ki tóg ti mré fi han. Hã kỹ tóg tag tó mũ, ha mẽ. “Hã kỹ ũn gré tóg ti prũ fi to ti panh tovãnh kỹ tĩg mũ, ti mỹnh fi tovãnh kỹ ke gé. Ti prũ fi mré tóg tĩnh mũ. Fi mré tóg tỹ ũn pir nĩ sir, ti prũ fi mré,” he tóg, Topẽ ti.
5 Ha vé 19:4
6 Hã kỹ fag tóg tỹ ũn pir nỹtĩ. Fag pijé tỹ ũn régre nỹtĩꞌ. Hã kỹ fag tỹ vẽnh kãpãm tũg nĩ. Topẽ tỹ fag tỹ ũn pir han vẽ mỹr,” he tóg.
7 Kỹ ag tóg ti mỹ ke mãn mũ. “Hã ra Moisés tóg ẽg mỹ: “fi mỹ vẽnh rá nĩm kar kỹ fi fón nĩ,” he ja nĩ. Ti tỹ ne jé ẽg mỹ tag tó ja nẽ?“ he ag tóg.
8 Kỹ tóg ag mỹ: “hỹ,” he mũ. “Tag tó ja ti nĩ, ãjag mỹ, ãjag tỹ to jykrén sór tũ nỹtĩn kỹ. Hã kỹ tóg ãjag mỹ: “ha fi fón ge,” he ja nĩ. Hã ra Topẽ tóg tag han ja tũ nĩ, ti tỹ nén kar han ve ki.
9 Hã kỹ sóg ãjag mỹ ke mũ. Ãjag tỹ ãjag prũ fi fón kỹ ũ fi tỹ prũg mãn kỹ ãjag prũ tũ fi vẽ sir, ha mẽ. Ãjag tỹ fi tỹ ũ mré nỹ tugrĩn fi fón kỹ tag hã ne pãgsĩ nỹ,” he tóg, Jesus ti.
10 Kỹ tóg ti mré mũ tĩ ag mỹ e tĩ, ti vĩ tag, hã kỹ ag tóg ti mỹ: “ã tỹ ge kỹ tóg tỹ ũ nỹ, ẽg prũg kỹ,” he mũ. “Ẽg tỹ ẽg prũ fi fón sór mũ ra fi fón tũ nĩn kỹ tóg vẽnh mỹ nỹ, kỹ ẽg hỹn prũg sór ke tũ nĩ,” he ag tóg.
11 Kỹ tóg ag mỹ: “ũn pipir ag tóg tag han ke mũ,” he mũ. “Topẽ tóg ũ ag mỹ: ha prũg tũg, henh ke mũ, ẽn ag hã vỹ prũg ke tũ nĩ.
12 Ũ ag tóg kurĩ nỹtĩ, ag mur mũ kã. Kỹ ũ ag tóg kurĩ nỹtĩ gé, ag tỹ ag grãfy kym kỹ. Kỹ ũ ag tóg kurĩ ri ke nỹtĩ gé, ag tỹ Topẽ to jykrén kỹ, ag tỹ ũ tỹ kanhkã tá nĩ ẽn tugrĩn prũg sór tũ nỹtĩn kỹ. Ũ tỹ to jykrén mũ ẽn jé to jykrén,” he tóg.
Jesus tỹ gĩr ag to há nĩ
13 Kỹ fag tóg gĩr tatĩ kãmũ mũ, ti tỹ ti nĩgé tỹ ag mẽ jé, ti tỹ ag to Topẽ mré vĩ jé. Kỹ Jesus mré mũ tĩ ag tóg fag to jũ mũ.
14 Hã ra Jesus tóg ag mỹ: “vĩ tũg nĩ, gĩr ag mỹ. Gĩr fag tỹ iso kãmũ kamẽg tũg nĩ,” he mũ. “Ũ tỹ ge hã vỹ ũ tỹ kanhkã tá nĩ ẽn tỹ tỹ pãꞌi nĩ ẽn krẽm nỹtĩ nĩ,” he tóg.
15 Kỹ tóg ag mẽgmẽ kãn mũ sir, ti nĩgé tỹ. Fag mẽgmẽ kãn kar kỹ tóg tá kãkutẽ mũ sir.
Kyrũ riko kãme
16 Hã ra vãhã ũ tóg ti tá jun kỹ ti mỹ: “Senhor, há ã tóg jẽ,” he mũ. “Sỹ inh rĩr krỹg ja tũ venh há tóg tĩ. Isỹ ve jé inh hỹn vẽjykre há tỹ ne han ke mũ?“ he tóg.
17 Kỹ Jesus tóg ti mỹ: “ã tỹ ne jé inh ki vẽjykre há jẽmẽ sór nẽ?“ he mũ. “Ũn pir tóg há nĩ, ha mẽ. Topẽ tỹ ẽg jyvẽn ẽn ki króm nĩ,” he tóg.
18 Kỹ tóg ti mỹ: “ti tỹ ẽg jyvẽn tỹ hẽ nẽ?“ he mũ. Kỹ Jesus tóg: “tag hã vẽ, ha mẽ: ũ tén tũg nĩ, ã prũ tũ fi mré nỹ tũg nĩ, nén ũ péju tũg nĩ, ũ to ón tũg nĩ,
19 ã nỹ mré ã jóg kamẽg nĩ, ã régre ki rĩr há han nĩ, ã tỹ vẽnh ki rĩr há han ri ke han nĩ, ã régre ki,” he tóg.
20 Kỹ kyrũ tóg: “tag kar ki sóg króm tĩ, kỹ ne nỹ hỹn ver inh mỹ tũ tĩꞌ?“ he mũ.
21 Kỹ Jesus tóg: “ã tỹ vẽjykre há han sór kỹ ã tũ vãm kãn tĩg,” he mũ. “Kỹ ũn jagtar ag mỹ vin, jãnkamy ti, kỹ ã tóg kanhkã tá tũ mág nĩ sir. Kar kãtĩg nĩ, ã tỹ inh mré tĩg jé,” he tóg.
22 Kyrũ ẽn tỹ ti vĩ tag mẽ kỹ tóg fe kaj han kỹ tĩ mũ sir. Ti tũ vỹ e nỹtĩ, hã kỹ tóg ti mỹ vẽnh mỹ tĩ.
23 Kỹ Jesus tóg ti mré mũ tĩ ag mỹ: “sỹ ke há vẽ. Jagy pẽ ti nĩ, ũn riko tỹ Topẽ tỹ tỹ ẽg pãꞌi nĩ venh ke ti,” he mũ.
24 “Kãvãru pãnĩ sór vỹ préj nor fĩn kutẽ tũ nĩgtĩ mỹr. Ti tỹ fĩn kutẽ há nĩ ra tóg há tĩ vẽ, ũn riko tỹ Topẽ tỹ tỹ ẽg pãꞌi nĩ venh ke ti,” he tóg.
25 Kỹ tóg ti mré mũ tĩ ag mỹ e tĩ, ti vĩ tag. Kỹ ag tóg to kanẽ jur mũ. “Kỹ ũ hỹn kren ke tũ nĩ,” he ag tóg.
26 Kỹ Jesus tóg ag ki ẽvãnh mũ, kỹ tóg ag mỹ: “ẽprã ke ag vỹ vẽsóg ki tá jun ke tũ nĩ,” he mũ. “Topẽ hã tóg ãjag tỹ tá jun han ki kanhró nĩ, ti tỹ nén ũ kar tỹ hẽ ri ken há nĩn kỹ,” he tóg, Jesus ti.
27 Kỹ Pedro tóg ti mỹ: “ha vé, nén kar ré kỹ ẽg mũ mũ, ã mré. Tag to ẽg hỹn ne venh ke mũ?“ he mũ.
28 Kỹ Jesus tóg: “sỹ ke há vẽ,” he mũ. “Inh mré ãjag tóg mũ mũ. Tỹ sóg ẽprã ke fi kósin nĩ. Kejẽn sóg inh nĩgja kri nĩnh mũ, isỹ vẽnh kar jykre tugnỹm jé. Sĩnvĩ inh nĩnh mũ, kurã ẽn kã. Kỹ ãjag tóg ãjag nĩgja kri nĩgnĩ kỹ nỹtĩnh mũ gé, nĩgja tỹ 12 (ke) kri, ãjag tỹ povo tỹ Israel tỹ 12 (ke) ag jykre tugnỹm jé,” he tóg.
29 “Jó ũ tóg isugrĩn ti jamã ré kỹ tĩ mũ, ti kãke, ti jãvy, ti ve, ti panh, ti mỹnh, ti japỹ ré kỹ tóg tĩ mũ, inh jykre tugrĩn. Ẽn vỹ tóg vẽnh kato ti tỹ ẽprã ré kỹ tĩg ja ẽn e ri ke venh ke mũ, tag ki, ẽprã. Kỹ tóg rĩr krỹg ja tũ ẽn venh ke mũ gé,” he tóg.
30 “Jãvo tag ki ũn mág ũ ag kãsir nỹtĩnh ke vẽ, tá tére kỹ, kỹ tag ki ũn kãsir ũ ag tỹ tỹ ũn mág nỹtĩnh ke vẽ, tá tỹ pãꞌi nỹtĩnh ke vẽ,” he tóg, Jesus ti. Ti tỹ ag mỹ kanhkã jykre tó vẽ.
