João tỹ ẽg tỹ nén venh ke mũ rá 3:1-22
3 Kỹ tóg: “ũ tỹ ẽmã tỹ Sardes tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ Topẽ kuprĩg tỹ 7 (ke) tỹ jagrẽ nĩ, kỹ tóg krĩg tỹ 7 (ke) génh kỹ jẽ nĩ gé, hem nĩ iso,” he tóg. “Ãjag tỹ nén han mũ ki kanhró sóg nĩ. Vẽnh kar vỹ ãjag to: “há ag nỹtĩ, tar ag nỹtĩ,” he tĩ. Hã ra ãjag tóg iso krój nỹtĩ. Hã kỹ ãjag tóg ũn kãgter mũ ri ke nỹtĩ.
2 Nũr tovãnh nĩ. Tar nỹtĩm nĩ. Ke tũ nĩ mũ ra ãjag tóg kãgter pẽ han kãn ke mũ. Ãjag jykre tugnỹm inh. Hã ra tóg há tũ nĩ ver. Topẽ vỹ ãjag tỹ nén han mũ to há tũ nĩ ver.
3 Vẽnh vĩ sér mẽ ãjag mỹr. Kỹ to jykrén há han nĩ. To tar nỹtĩm nĩ. To vãsãn nĩ. Ãjag nũgnũr kỹ sóg ãjag krĩg mỹ jun ke mũ. Ũ tỹ ẽg tỹ nén péju tĩ tỹ ẽg nũr krĩg mỹ jun ẽn ri ke han jé sóg ke mũ. Inh jun ke kurã ki kagtĩg ãjag tóg nỹtĩ mỹr.
4 Ãjag kã mĩ ũ ag tóg hã ra vẽnh kavénh ja tũ nĩ, Sardes tá. Tag ag vỹ kur kupri ẽn rĩnh ke mũ. Inh mré ag nỹtĩnh ke mũ.
5 Ũ tỹ isovãnh tũ ẽn ag vỹ kur kupri ẽn rĩnh kãn ke mũ. Ag jigji kykũnh ke tũ inh nĩ, inh livro ki. Ũn rĩnrĩr ke mũ ag jygji vỹ ki ránrán kỹ nỹtĩ. Ẽn ag jigji tó jé sóg ke mũ, inh panh mỹ, ti tỹ jẽgnẽ jafã kar ag mỹ ke gé, he tóg, hem nĩ, vẽnh rán ki,” he tóg, inh mỹ, ũ tỹ tỹ ẽprã ke nĩ ve ẽn ti.
6 “Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tónh ke mũ, Topẽ kuprĩg ti,” he tóg, ũ tỹ tỹ ẽprã ke nĩ ve ẽn ti. Ti tỹ ẽmã tỹ Sardes tá ke ag mỹ vẽnh vĩ jẽnẽg mũn hã vẽ.
Filadélfia tá igreja ki ke ag mỹ rá
7 Kỹ tóg: “ũ tỹ ẽmã tỹ Filadélfia tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ Davi tỹ jãnkã nón jafã vyn kỹ jẽ nĩ, chave ẽn ti, hem nĩ. Ti tỹ jãnkã ũ nón kỹ ũ tóg nĩfénh mãn ke tũ nĩ. Kỹ ti tỹ jãnkã ũ nĩfénh kỹ ũ tóg nón mãn ke tũ nĩ gé, hem nĩ, iso,” he tóg.
8 “Ãjag tỹ nén han mũ ki kanhró sóg nĩ. Tỹ nén mág tũ ãjag nỹtĩ. Hã ra ãjag tóg isỹ ãjag mỹ nén tó mũ ẽn ki króm kỹ nỹtĩgtĩ. Isovãnh ja tũ ãjag tóg nĩgtĩ. Ãjag mỹ sóg ẽg tỹ jãnkã nón ẽn ri ke han. Kỹ ũ tỹ ãjag jo nĩfénh ke tóg tũ tĩ.
9 Ha mẽ, sỹ nén tónh ke ti. Ãjag mỹ sóg ũ ag jẽgnẽnh mũ, Satanás mré ke ũ ag. Ón kỹ ag tóg: “Judeu vỹ tỹ ẽg nỹtĩ,” henh ke mũ. Kỹ ag tóg ãjag krẽm mũgmũg kenh ke mũ, ãjag mỹ: “ẽg kãfór ãjag tóg nỹtĩ,” hen kỹ, ha vem nĩ. Ãjag to há tãvĩ sóg nĩ. Hã kỹ ãjag kato vãsãnsãn mũ ag vỹ tag venh ke mũ, ha vem nĩ.
10 Inh vĩ ki króm ãjag tóg mũ mỹr, sỹ ãjag mỹ: “isovãnh tũg nĩ,” hen kỹ. Hã kỹ sóg ãjag jy nĩgãn ke mũ, ga kri ke kar ag tỹ nén ũ jagy venh ke kurã ẽn kã. Ti jagy tãvĩ ve jé ag tóg ke mũ, isỹ ag jykre tugnỹm kỹ.
11 Kãnhmar inh kãtĩg ke mũ. Ãjag tỹ inh ki ge kỹ nỹtĩ tag tovãnh tũg nĩ. Ke tũ nĩ mũ ra ũ ag tóg ãjag nỹtĩg ja ki nỹtĩn kỹ nén tỹ ãjag mỹ sér tĩnh ke mũ ẽn venh ke mũ, inhhã.
12 Ũ tỹ isovãnh tũ ẽn ag tỹ sóg ĩn nũna ri ke han ke mũ, kanhkã tá. Tá ag pa mãn ke tũ nĩ. Ag kri sóg Topẽ jiji rán ke mũ gé, Topẽ jamã jiji ti ke gé. Ẽmã tỹ Jerusalém tãg to ken hã vẽ. Kanhkã tá tóg kãtérenh ke mũ. Kar kỹ sóg ag kri ijiji tãg rán ke mũ gé, he tóg, hem nĩ, vẽnh rán ki,” he tóg inh mỹ, ũ tỹ tỹ ẽprã ke nĩ ve ẽn ti.
13 “Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tónh ke mũ, Topẽ kuprĩg ti,“ he tóg, ũ tỹ tỹ ẽprã ke nĩ ve ẽn ti. Ti tỹ ẽmã tỹ Filadélfia tá ke ag mỹ vẽnh vĩ jẽnẽg mũn hã vẽ.
Laodicéia tá igreja ki ke ag mỹ rá
14 Kỹ tóg: “ũ tỹ ẽmã tỹ Laodicéia tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ jijin hã vỹ: “ki hã tó tĩn hã vẽ,” he mũ, hem nĩ,” he tóg. “Ti hã tugrĩn Topẽ tóg nén ũ kar han ja nĩgtĩ, hem nĩ iso,” he tóg.
15 “Ãjag tỹ nén han mũ ki kanhró sóg nĩ. Ãjag pijé goj rỹ jagy ri ke nỹtĩꞌ. Kỹ ãjag pijé goj kusa ri ke nỹtĩ géꞌ. Ãjag tỹ goj rỹ jagy ẽn ri ke nỹtĩ ran há tĩnh mũ vẽ. Ãjag tỹ goj kusa ẽn ri ke nỹtĩ ran há tĩnh mũ gé vẽ vẽ.
16 Hã ra ãjag tóg goj rỹ mẽ ri ke nỹtĩ, ãjag tỹ iso krój nỹtĩn kỹ. Hã kỹ sóg ãjag vãm sór mũ. Ẽg tỹ goj rỹ mẽ pra kỹ kujẽn ẽn ri ke han jé sóg ke mũ, ãjag tỹ, ha vem nĩ.
17 Vẽso ãjag tóg: “riko ẽg nỹtĩ, há ẽg nỹtĩ, nén ũ tóg ẽg mỹ tũꞌ he tũ pẽ nĩ,” he tĩ. Hã tũ tó ãjag tóg tĩ. Jagtar ãjag tóg nỹtĩ, mỹr, ha mẽ. Tỹ nén tũ ãjag tóg nỹtĩ. Jykre kórég ãjag tóg nỹtĩ. Kur tũ ãjag tóg nỹtĩ. Kyvó ãjag tóg nỹtĩ. Hã ra ãjag tóg ki kagtĩg nỹtĩ, ãjag kórég nỹtĩ tag ki.
18 Hã kỹ sóg ãjag mỹ: “inh ki ouro há ẽn mãn kãmũ jẽg,” he sór mũ, “ãjag tỹ riko nỹtĩ jé. Kur kupri kajãm nĩ, ãjag tỹ kator nỹtĩ tũ nĩ jé, ãjag mỹꞌãg tũ nĩ jé. Vẽnh kagta kajãm nĩ, ãjag kanẽ mỹ, ãjag tỹ ve há han mãn jé.
19 Isỹ ũ to há nĩ ẽn mỹ sóg vĩ tar han tĩ, ti kanhrãn jé. Vẽso jykrén kỹ ãjag jykre kórég tovãnh nĩ.
20 Mẽ há han nĩ, sỹ ãjag mỹ nén tó mũ tag. Re tá inh jẽ nĩ, jãnkã tá, kỹ sóg tỹ tórónꞌ tórónꞌ ke mũ. Ũ tỹ inh vĩ mẽg mũ mỹ tóg há tĩ. Kỹ tóg inh mỹ nón ke mũ, jãnkã ti. Kỹ sóg ti ĩn kã ra rãnh ke mũ. Kỹ sóg ti mré jẽn ke mũ. Kỹ tóg inh mré jẽn ke mũ gé, ha mẽ.
21 Ũ tỹ isovãnh tũ ẽn mỹ sóg: “inh mré nĩ,” he sór mũ. Kỹ tóg inh ri ke tỹ ũn mág nĩnh ke mũ. Inh panh mré sóg tỹ ũn mág nĩ ha, isỹ ti tovãnh ja tũ nĩn kỹ. Kỹ tóg tá inh mré nĩnh ke mũ gé,” he tóg, hem nĩ, vẽnh rán ki,” he tóg, ũ tỹ tỹ ẽprã ke nĩ ve ẽn ti.
22 “Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tónh ke mũ,” he tóg, ũ tỹ tỹ ẽprã ke nĩ ve ẽn ti. Ti tỹ ẽmã tỹ Laodicéia tá ke ag mỹ vẽnh vĩ jẽnẽg mũn hã vẽ.
