Han kãme 18:1-28
18 Kỹ Paulo tóg Atenas ki kutẽ kỹ Corinto ra tĩ mũ.
2 Tá Judeu ũ tóg nĩ nĩ, ti jiji hã vỹ: Áquila, he mũ. Ponto tá ke vẽ. Ga tỹ Itália tá tóg kãtĩg ja nĩ, ti prũ fi mré. Fi jiji hã vỹ: Priscila, he mũ. Pãꞌi mág tỹ imperador tỹ Cláudio he mũ tóg Judeu kar ag mỹ: “ẽmã tỹ Roma ki pa jẽg,” he ja nĩgtĩ. Hã kỹ fag tóg ẽmã tỹ Corinto tá junjun ja nĩgtĩ.
3 Kỹ Paulo tóg fag mré nĩ nĩ sir. Fag mré tóg rãnhrãj mũ sir. Kũr tỹ fag tóg ĩn han mũgtĩ, Paulo kóm.
4 Kỹ tóg vẽnhkán ke kurã kar ki ag mỹ Topẽ vĩ tó mũ, Judeu ag vẽnh kanhrãn jafã krẽm.
5 Kỹ Silas vỹ Macedônia tá kãtĩ mũ, Timóteo mré. Kỹ Paulo tóg Topẽ vĩ tó tãvĩ nĩ nĩ. Ðn tỹ kur han mãn tũ tóg nĩ. Judeu ag mỹ tóg Jesus kãmén mũ, fóg ag mỹ ke gé.
6 Hã ra ag tóg ti kato vĩ mũ. Kỹ ag tóg Jesus to é he mũ. Kỹ Paulo tóg ti kur rũmrũm mũ, ag mỹ: “vẽnh hã ki ãjag tóg vãgfor ke mũ, nũgme ki vár kỹ,” he jé. “Ãjag mỹ sóg Jesus tó, hã ra ãjag tóg mẽ jãvãnh nỹtĩ. Kỹ ãjag tỹ vẽsóg ki vẽsỹrénh ke vẽ. Kỹ sóg fóg ag kar hã mỹ tónh tĩg ha, kanhgág ag kar mỹ ke gé,” he tóg mũ.
7 Hã kỹ tóg tá kutẽ kỹ fóg ĩn kã ra rã mũ, ti jiji hã vỹ: Tício Justo, he mũ. Topẽ kamẽg ti tĩ. Ti ĩn vỹ Judeu ag vẽnh kanhrãn jafã rã jẽ gé. Kỹ Paulo tóg ti mré nĩ nĩ sir.
8 Hã ra Judeu ag vẽnh kanhrãn jafã to pãꞌi vỹ Jesus ki rã mũ, ti jiji hã vỹ: Crispo, he mũ. Ti mré ke kar vỹ Jesus ki ge mũ gé, Corinto tá ke tỹ hẽn ri ke. Kỹ ag tóg kygpe kỹ nỹtĩ sir.
9 Kejẽn Paulo tóg kuty kỹ nén nẽ vég mũ. Topẽ tỹ ti mỹ vẽnh ven vẽ, kỹ tóg ti mỹ: “kamẽg tũg ra,” he mũ. “Inh vĩ kãmén ra, kã nĩ tũg,” he tóg.
10 “Ã mré sóg nĩnh mũ. Ũ pijé ã vóg kónãn mũꞌ. Ẽmã tag ki ũ tỹ hẽn ri ke ag vỹ tỹ isũ nỹtĩnh mũ, fag mré hã,” he tóg, Topẽ ti.
11 Kỹ Paulo tóg prỹg pir kri kysã tỹ 6 (ke) ki tá nĩ nĩ. Ag mỹ tóg Topẽ vĩ kãmén tĩ nĩ sir, tá.
12 Kejẽn Gálio he mũ tóg tỹ governador nĩ, ga tỹ Grécia ki. Kỹ Judeu ag kar tóg Paulo kato vãsãnsãn mũ. Kỹ ag tóg ti kãgmĩ kỹ pãꞌi mág mỹ ti ven mũ mũ.
13 Kỹ ag tóg governador mỹ: “tag tóg ẽg jykre tỹ tũꞌ he sór mũꞌ. Vẽnh kar tóg ti vĩ tugnĩn Jesus ki ge mũ,” he mũ.
14 Kỹ Paulo tóg vĩ sór mũ, hã ra Gálio tóg Judeu ag mỹ: “ti tỹ nén ũ kórég han ra sóg ãjag jagfy vĩnh mũ vẽ,” he mũ.
15 “Hã ra ãjag tóg ãjag jykre to ti to jũ mũ, ãjag jiji to, ãjag vẽnh rá to. Isũ pijéꞌ, ãjag tũ tag tiꞌ. Ãjag hã ne tag to jykrén ke mũ inhhãꞌ. Inh pijé ãjag tũ to jykrén sór mũꞌ, “ he tóg.
16 Kỹ tóg ag mỹ: “ha mũ jẽg,” he mũ sir, vĩ tar han kỹ.
17 Kỹ tá nỹtĩ ag tóg Sóstenes kãgmĩg mũ. Judeu ag vẽnh kanhrãn jafã to pãꞌi vẽ. Ti kãgmĩ kỹ ag tóg ti mrãnmrãn mũ, pãꞌi mág ẽn ĩn tá, hã ra Gálio tóg ki ẽmẽ sór tũ nĩ.
Paulo tỹ Antioquia ra vỹn ke
18 Kỹ Paulo tóg tá nĩ sir, kurã tỹ hẽn ri ke ki. Kỹ tóg kejẽn Jesus mré ke ag mỹ: “isĩg vẽ ha,” he mũ. Kỹ Áquila tóg ti mré tĩ mũ, ti prũ tỹ Priscila fi mré. Ag tỹ ga tỹ Síria ra mũnh ke vẽ. Ẽmã tỹ Cencréia tá ag tóg canoa mág ki ge sór mũ, ra mũ jé. To hã tóg vẽnh jãrég mũ, Paulo ti, Topẽ mỹ promessa han kỹ.
19 Kỹ ag kar tóg canoa mág kã mĩ ẽmã tỹ Éfeso ra mũ mũ. Hã ra Áquila fag vỹ tá nỹtĩ. Mũ mãn tũ fag nĩ sir.
Kỹ Paulo tóg Judeu ag vẽnh kanhrãn jafã kã ra rã mũ, Judeu ag mré vĩ jé.
20 Ag tỹ ti vĩ mẽ kỹ tá ke ag tóg ti mỹ: “ẽg mré nĩ nĩ,” he mũ.
Hã ra tóg ag mỹ: “hã ra sóg ver tĩg mũ ha,” he mũ.
21 “Kãnhmar sóg vỹn kenh ke mũ hã ra, Topẽ mỹ há nĩn kỹ,” he tóg. Kỹ tóg ẽmã tỹ Éfeso tá kutẽ mũ.
22 Kỹ tóg ẽmã tỹ Cesaréia tá jun mũ. Kỹ tóg Jerusalém ra tĩg kỹ Jesus ki ge mũ kar vigvég mũ, ũ tỹ Topẽ vĩ mẽ jé vẽnh mãn tĩ ag. Kar kỹ tóg Antioquia ra tĩ mũ.
23 Tá tóg nĩg sĩ han mũ. Kar kỹ tóg tá kutẽ kỹ ga tỹ Galácia mĩ tĩ mũ, ga tỹ Frígia mĩ ke gé. Jesus mré ke ag jyvẽn tóg mũ sir, ag tỹ tar nỹtĩ jé.
Apolo tỹ Topẽ vĩ tó
24 Kejẽn Judeu ũ tóg ẽmã tỹ Éfeso tá jun mũ, ti jiji hã vỹ: Apolo, he mũ. Ẽmã tỹ Alexandria tá tóg mur ja nĩ. Vĩ há ti nĩ. Topẽ vĩ tó tóg tĩ gé, vãsỹ rán kỹ nĩ ẽn to tóg tar nĩ.
25 Ẽn tóg Jesus japry ki kanhró nĩ. Mũmẽg vãnh nĩn kỹ tóg Jesus vĩ tó tĩ mũ. To tóg krónh ke vãnh nĩ. Hã ra tóg João tỹ ag kygpég mũ ẽn hã ki kanhró nĩ. Ẽg tỹ Jesus jiji tó kỹ kygpe kỹ nỹtĩ tag ki kagtĩg tóg nĩ ver.
26 Ẽn tóg Judeu ag vẽnh kanhrãn jafã krẽm ag kanhrãn mũ sir, ti tỹ mũmẽg vãnh nĩn kỹ. Áquila fag tỹ ti vĩ mẽg kỹ fag tóg ti mỹ: “ẽg venh kãtĩg nĩ,” he mũ. Kỹ fag tóg ti mỹ Topẽ japry kãmén kãn mũ, ti jamĩn ti.
27 Kar tóg ga tỹ Grécia ra tĩg sór mũ. Kỹ Jesus mré ke ag tóg ti mỹ: “há ti nỹ, ha tĩg ge,” he mũ. Kỹ ag tóg Jesus mré ke ag mỹ vẽnh rá jẽnẽg mũ, ag tỹ ti mỹ: “kãrã ra,” hen jé. Tá jun kỹ tóg Jesus ki ge kỹ nỹtĩ ag jyvẽn mũ, kỹ ag tóg ti tỹ ag jyvẽn kỹ to tar nỹtĩ sir, Topẽ tỹ ũn jagãgtãn mũ ag.
28 Judeu ag mré tóg vĩ tĩ, vẽnh kar jo. Ag mỹ tóg Topẽ vĩ tó tĩ, vãsỹ rán kỹ nĩ ẽn ti. Kỹ tóg ag mỹ Cristo kãmén mũ sir. “Cristo vỹ tỹ Jesus ti nĩ,” he tóg mũ, ag mỹ, Apolo ti.
