LIÇÃO 48

Ũn mré ke há ag kuprẽg há han nĩ

TI VEN NĨ

Ẽg tỹ régre há ag nỹtĩn kỹ, ẽg tỹ ag mré nén ũ há ag hyn han tĩ, kar ẽg tỹ mỹ sigsér nỹtĩ, kar sir ẽg tỹ nén ũ jagy kato tẽgtẽ kỹ, ag tỹ ẽg ajũna ke tĩ gé. Hã ra Topẽ Vĩ Rá vỹ ẽg kanhrãnrãn tĩ, vẽnh kar pi tỹ ẽg régre há nỹtĩ nĩ. Kỹ, ã ne han ke nĩ, ã tỹ ã mré ke há ag kuprẽg jé? Vẽnh ki jẽmẽ tag ag to jykrén há han nĩ.

1. Ẽg mré ke ag ne han tĩ, ẽg mỹ?

Ẽg tỹ jagnẽ mré vãmén kỹ, kar rede social ag ki, ẽg tỹ jagnẽ mré vãmén kỹ, ẽg tỹ ti kãgran ke mũ. Hẽn ri ke mũn, tag vỹ ẽg mỹ há han mũ, ke tũ nĩn kỹ vaꞌ. Topẽ Vĩ Rá tag to ẽg mỹ ke tĩ: “Ũn tỹ vẽjykre há ag mré tĩg kỹ tóg ki kanhrãn han ke mũ. Ũ tỹ vẽjykre kórég ag [ũn tỹ Jeová to há tũ ag] mré tĩg kỹ tóg tĩg kónãn ke mũ.” (Provérbios 13:20) Ũn mré ke ag vỹ Jeová to há nỹtĩn kỹ, kar ag tỹ Jeová mỹ rãnhrãj nỹtĩn kỹ, ag tỹ ã ajũna kenh mũ, ã tỹ Jeová mré há nĩnh jé, kar ã tỹ nén ũ ag kuprẽg jé. Hã ra ẽg tỹ ũn tỹ Jeová to há tũ ag mré tĩn kỹ, ag tỹ ẽg tỹ Jeová to krónh ke tĩ. Tag tugnĩn, Topẽ Vĩ Rá vỹ ẽg mỹ tó tĩ, ẽg tỹ mré ke há ag kuprẽg jé! Ẽg mré ke ag tỹ Jeová to há nỹtĩn kỹ, tag vỹ ẽg mỹ há nĩ, kar ag mỹ há nĩ gé. Gen kỹ, ẽg tỹ ‘jagnẽ krĩ tỹ kãnhvyꞌ nỹtĩ kar jagnẽ jyvẽn nỹtĩ gé, ẽg tar nỹtĩ jé.’ — 1 Tessalônica 5:11.

2. Ã tỹ régre ag kuprãg kỹ, hã ren kỹ Jeová ti tag to ne to ãkrén tĩ?

Jeová vỹ ũn mré ke há ag kuprẽg tĩ, ag tỹ ti mré há nỹtĩ jé. Ti tỹ “ũ tỹ vẽjykre há han mũ ag to há nĩ.” (Provérbios 3:32) Ẽg tỹ ũn tỹ Jeová to há tũ ag mré há nỹtĩn kỹ, Jeová ne hã re ti? Tag vỹ ti mỹ kórég nĩ! (Tiago 4:4 le kem nĩ.) Hã ra ẽg tỹ ũn vẽjykre kórég ag to ranh ke mũ ra, kar ẽg tỹ ũn tỹ Jeová to há mũ ag mré há nỹtĩn kỹ, ti tỹ mỹ sér nĩnh mũ kar ti tỹ ẽg mré há kãfór nĩnh mũ gé. — Salmo 15:1-4.

VẼNH KANHRÃN KÃFÓR NĨ

Ha vé hã ren kỹ ti ẽg mỹ há tĩ mũ, ẽg tỹ ẽg régre ag kuprãg há han jé. Ha vé, ã tỹ régre ag kuprãg há han kỹ, tag vỹ ã mỹ há han.

3. Vẽnh ki rĩrm nĩ, ũn mré ke kórég ag to

Ũn ag pi Topẽ to há nỹtĩ, kar ag pi Topẽ vĩ ki króm tĩ, kỹ ag tỹ tỹ mré ke kórég ag nỹtĩ. Ha vé VÍDEO ti. Kar jagnẽ mré vẽmén nĩ, tag to:

VÍDEO: Kuvar há nĩm nĩ, ã mré ke jykre kórég ag to (6:17)

Ne tugnĩn kejẽn ẽg tỹ ẽg mré ke kórég ag nỹtĩ?

1 Corinto 15:33 le kem nĩ. Kar jagnẽ mré vẽmén nĩ, tag to:

Ã hã mỹ, régre tỹ ne ũn mré ke kórég nĩ? Mỹ ne tugnĩn?

Salmo 119:63 le kem nĩ. Kar jagnẽ mré vẽmén nĩ, tag to:

Nén ũ tỹ ne ã tỹ tugnỹm ke nĩ, ã tỹ ũn mré ke há kuprẽg jé?

Ka kanẽ tỹ maçã tỹ kórég nĩn kỹ, ti tỹ ka kanẽ ũn ag kókén ke mũ. Ã mré kórég hã ren kỹ ã krĩn kónãn ke mũ?

4. Ẽg mré ke ag pi ẽg ri ke ke nỹtĩ

Topẽ Vĩ Rá vỹ tó tĩ, vãsỹ, Israel krẽ ag kãmĩ, Jonatã kar Davi to. Jonatã tỹ tỹ pãꞌi mág ti kósin nĩ vã kar ti tỹ ũn sanh há nĩ vã, hã ra, Davi vỹ ũn kyrũ nĩ vã. Ge ra, ag tỹ jagnẽ mré há nĩ vã. 1 Samuel 18:1 le kem nĩ. Kar jagnẽ mré vẽmén nĩ, tag to:

Ẽg mré ke ag pi ẽg idade ri ke ke nỹtĩ, ke tũ nĩn kỹ ag pi riko, ke tũ nĩn kỹ, jãnkamy tũ ke nỹtĩ ẽg ri ke, ẽg tỹ jagnẽ mré há nĩ jé. Mỹ ne tugnĩn?

Roma 1:11, 12 le kem nĩ. Kar jagnẽ mré vẽmén nĩ, tag to:

Ũn ag tỹ Jeová mré há nỹtĩ, hã ren kỹ jagnẽ tigtar han tĩ?

Ha vé VÍDEO ti ã tỹ venh jé, ũn kyrũ vỹ vẽsỹmér ke tĩ, ũn mré ke há han mũ, ge ra, ti tỹ tá ag jãvãnh tũ tĩ vã. Kar jagnẽ mré vẽmén nĩ, nén ũ tag ag to:

VÍDEO: Ũn mré ke há ag kato tẽ nĩm nĩ, ge ra, ã tỹ tá ag jãvãnh tũ tĩ (5:06)

Vídeo ki, Akil ti panh kar mỹnh ne tugnĩn krĩ kufy nĩ vã, Akil mré ke ag to, escola tá?
Akil ne tugnĩn kyrũ ãn ag mré hã nĩ vã?
Ti ne han ke, ti pi pir mỹ nĩ jé?