à mỹ ũn to há tỹ ter ke huri? Tag vỹ hãn ri ken kỹ, hã re mũn ã tỹ vẽnh ki jẽmẽ tĩ: ‘Ũn tỹ ter kỹ ne nỹ ti mỹ hãn ri ke tĩ? à mỹ ti venh mãn ke mũ hẽn?’ Lição tag kã kar lição ũꞌũ ki, ẽg tỹ kanhrãnrãn ke vẽ, Topẽ Vĩ Rá hã ren kỹ ẽg jagãgtãn tĩ ti.

1. Ũn tỹ ter kỹ ne nỹ ti mỹ hãn ri ke tĩ?

Jesus tỹ ken kỹ nĩ, ũn ter ja tỹ nũr nỹ. Ti tỹ nũr nỹ kỹ, ti pi nén ũ tỹ hãn ri ke ke vég mũ. Hã ra ũn tỹ ter ke hã ren kỹ ti tỹ nũr nỹ ri ke nĩ? Kar kỹ ũn tỹ ter ke, nén ũ mẽg tũ tĩ kar nén ũ hyn han tũ tĩ, ti pi vẽsỹrénh nĩ. Topẽ Vĩ Rá hã vỹ ẽg mỹ ke tĩ “ũn kãgter ag vỹ ki kagtĩg kar nỹtĩ”. — Eclesiastes 9:5 le kem nĩ.

2. Ẽg tỹ ki kanhrãn kỹ ne nỹ hãn ri ke tĩ ti to ũn tỹ ter kỹ, tag hã ren kỹ ẽg ajũna ke tĩ?

Ũn e ag tỹ kãgter mũmẽg tĩ — kar ag tỹ ũn ẽn ag kãgter ja mũmẽg tĩ gé! Hã ra ẽg tỹ ki kanhró nỹtĩ, Topẽ Vĩ Rá ne ẽg kanhrãnrãn tĩ ti, ter ja to, ẽg tỹ krĩ tỹ kãnhvỹ nỹtĩ. Jesus ti tóg: ũn ag tóg “Topẽ vĩ pẽ ki kanhró nỹtĩnh mũ,” ag tóg kygvãnh ke mũ. (João 8:32) Religião ũn e ag vỹ kanhrãnrãn tĩ, ẽg tỹ ter kỹ, ẽg kãpãm ũ rĩr nĩ hã ki tĩ ti, hã ra Topẽ Vĩ Rá pi tag to kanhrãn tĩ. Kỹ ũn pijé vẽsỹrénh tĩ, kar kỹ kãgter tĩ. Kar sir, ũn kãgter ja ag pi ẽg nén ũ kórég han tĩ, ag tỹ nén ũ ki kagtĩg nỹtĩ, tugnĩn. Kỹ ẽg pi ag mỹ nén ũ ag hyn han ke nỹtĩ, ke tũg nĩn kỹ ag mỹ vĩ há han tĩ, ẽg pi ag mỹ mré vĩ ke nỹtĩ.

Ũn e ag vỹ tó ja, ag tỹ ũn kãgter ja mré vẽmén tĩ, hã ra tag pi ki hã tó tĩ. Ẽg tỹ kanhrãnrãn mũ, “ũn kãgter ag vỹ ki kagtĩg kar nỹtĩ”. Ũn tỹ ãkrén kỹ, ti tỹ ũn mré ke, ke tũg nĩn kỹ ũn tỹ família kagter ja vẽmén huri, ti tỹ vẽnh kuprĩg kórég vẽmén nĩnh mũ. Hã kỹ, ẽg tỹ ki kanhró nỹtĩ kỹ, ne nỹ hãn ri ke tĩ ti to ũn tỹ ter kỹ, tag vỹ ẽg mỹ vẽnh kuprĩg kórég ag jy nĩgãn tĩ. Jeová pi ve sór tĩ, ẽg tỹ ũn kãgter ja mré vẽmén tĩ, ti tỹ ki kanhró nĩ, vẽnh kuprĩg kórég ag vỹ ẽg mỹ nén ũ kórég han sór tĩ. — Deuteronômio 18:10-12 le kem nĩ.

3. Ha kanhrãn nĩ, Topẽ Vĩ Rá ne kanhrãnrãn tĩ ti, ũn ter ja ag to

Ẽmã kar mĩ, ũn ag tỹ ãkrén kỹ, ũn tỹ ter kỹ, ne nỹ ũn ter ja mỹ hãn ri ke tĩ to, ag jykre tóg tỹꞌ ũ nỹtĩ. Hã ra vẽnh jykre ũn ag pi ki hã kãmén tĩ, ũn kãgter ja ag to.

• Ã pénĩn ki, ũn ag ne ãkrén tĩ, ũn tỹ ter kỹ, ne nỹ ũn ter ja ẽn mỹ hãn ri ke tĩ to?

 4. Ẽg tỹ ki kanhró nỹtĩ, Topẽ Vĩ Rá ne ẽg kanhrãnrãn tĩ ti, ũn tỹ ter ja to, ẽg ajũna ke tãvĩ tĩ

Ẽg tỹ ki kanhrãn há nỹtĩn kỹ, ter ja to, ẽg pi ũn kãgter ja mũmẽg nỹtĩ. Eclesiastes 9:10 le kem nĩ. Kar jagnẽ mré vẽmén nĩ, tag to:

• Ũn kãgter ja ag mỹ ẽg mỹ nén ũ kórég hyn han tĩ hẽn?

Ẽg tỹ ki kanhrãn kỹ, Topẽ vĩ pẽ ag to, ẽg pi kri fi nỹtĩ, vẽnh ó ag ki, ter ja to. Isaías 8:19 kar Nén venh ke 4:11 le kem nĩ. Kar jagnẽ mré vẽmén nĩ, tag to:

• Ũn tỹ ũn ter ja mỹ vĩ há han tĩ ke tũg nĩn kỹ ũn tỹ ti mỹ to vĩ ajũna ke tĩ. Ã hã mỹ Jeová ne to jykrén tĩ, tag to?

5. Tag tỹ tỹ ẽg mỹ nén ũ há nĩ, ẽg tỹ ki kanhró nỹtĩ, Topẽ vĩ pẽ ter ja to

Ũn e ag vỹ kanhrãnrãn mũ, ag tỹ kãgter ke kar ag vỹ vẽsỹrinhrénh ke mũ, ag tỹ nén ũ vẽnh mỹ hyn han ja, tugnĩn. Hã ra ẽg tỹ ki kanhrãn kỹ, ẽg pi vẽsỹrinhrénh ke mũ, ẽg tỹ nén ũ vẽnh mỹ hyn han ja, tugnĩn, tag vỹ ẽg krĩ tỹ kãnhvy ke tĩ. Roma 6:7 [TNM]. “Ũn tỹ ter kỹ Topẽ vỹ ti mỹ vẽnh pãte fán tĩ, ũn ẽn tỹ Topẽ vĩ mranh ja to.” Kar jagnẽ mré vẽmén nĩ, tag to:

• Topẽ Vĩ Rá vỹ ẽg mỹ ke tĩ, ũn tỹ ter kỹ, Topẽ vỹ ti mỹ vẽnh pãte fán tĩ, ti tỹ nén ũ vẽnh mỹ hyn han ja ẽn to. Kỹ Topẽ vỹ ũn ẽn tỹ nén ũ vẽnh mỹ hyn han ja ẽn kukũnh. Kỹ ã hã mỹ, ũn tỹ ter kỹ ti mỹ vẽsỹrénh ke mũ ver, ti tỹ nén ũ vẽnh mỹ hyn han ja, tugnĩn?

Ẽg tỹ Jeová to kanhrãnrãn kãfór kỹ, ẽg tỹ ki kanhró nỹtĩ, ti pi ũn kãgter ja ag vẽsỹrinhrénh han tĩ. Deuteronômio 32:4 kar 1 João 4:8 le kem nĩ. Kar jagnẽ mré vẽmén nĩ, nén ũ tag ag to:

• Ẽg tỹ ki kanhrãn ké, vẽnh rá ag tỹ, Topẽ tỹ nén ũ e ki há nĩ. Ti mỹ ũn kãgter ja ag mỹ vóg kónãn sór tĩ hẽn?

• Ã mỹ mỹ há nĩ, ã tỹ Topẽ vĩ pẽ to kanhrãnrãn tĩ, ter ja to? Mỹ ne tugnĩn?

 Ã NE KANHRÃN JA TI

Ũn tỹ ter kỹ, ti vỹ nén ũ ki kagtĩg nĩ. Ũn kãgter ja ẽn ag pi vẽsỹrinhrénh nỹtĩ kar ag pi ẽg mỹ nén ũ kórég hyn han tĩ.

Jykrinkrén mũ

• Ũn tỹ ter kỹ ne nỹ ti mỹ hãn ri ke tĩ?

• Ẽg tỹ ki kanhró nỹtĩ, Topẽ vĩ pẽ ter ja to. Tag hã ren kỹ ẽg ajũna ke tĩ?

• Ẽg tỹ ki kanhró nỹtĩ, Topẽ vĩ pẽ ter ja to, tag vỹ ẽg mỹ há han nĩ. Mỹ ne tugnĩn?