Isỹ ter sór tĩ — Topẽ Vĩ Rá mỹ inh ajũna ke tĩ hẽn?
Topẽ Vĩ Rá ne ẽg mỹ kãmén tĩ ti
Háv! Topẽ Vĩ Rá tỹ tỹ Topẽ tũ nĩ. Ti tỹ “ũn vẽsỹrénh mũ ẽn mỹ tóg vĩ há han tĩ”. (2 Corinto 7:6) Jérĩn mỹ ti pi tỹ livro tỹ saúde mental nĩ, ti tỹ ũn e ajũna ké, ag tỹ vẽsén to jykrén tũ nỹtĩ jé, kar ag tỹ rĩnrĩr sór hã ki mũ jé. Kar ti vẽnh jyvẽn ag vỹ ã ajũna ke mũ gé.
Topẽ Vĩ Rá vỹ nén ũ há ag tỹ ne ẽg jyvẽn tĩ?
● Ã tỹ nén ũ to ãkrén tĩn kỹ, ã régre ag mỹ tóm nĩ.
Topẽ Vĩ Rá ne ẽg mỹ kãmén tĩ ti: “Ũn tỹ ẽg to há tãvĩ tóg, ẽg to há nĩ, ẽg tỹ nén ũ kórég ve kỹ tóg, tỹ ũ tỹ ẽg mré mur mũ ri ke nĩ.” — Provérbios 17:17.
Vẽnh rá tag ne ẽg kanhrãnrãn tĩ ti: Ẽg tỹ vẽnh jykre kórég nỹtĩn kỹ, ẽg tỹ ũn ag mré vĩn ke nỹtĩ, ag tỹ ẽg ajũna ke jé.
à tỹ ũn ag mré vĩ tũ nĩn kỹ, hãn ri ke mũn, ã tỹ vẽnh tén sór hã ki tĩnh ke mũ. Hã ra, ã tỹ ũn mré ke há mré vĩn kỹ, ti tỹ ã tar han ke mũ, ã tỹ vẽnh jykre kórég ẽn tovãnh jé.
Tag han vãsãn nĩ: Ũri ã tỹ ã família, ke tũ nĩn kỹ ũn mré ke há mré vĩm nĩ. a à tỹ nén ũ to ãkrén ẽn rán tĩ gé.
● Médico jãvãnh nĩ.
Topẽ Vĩ Rá ne ẽg mỹ kãmén tĩ ti: “Ũn kagyga tũ ag vỹ médico venh mũ tũ nĩgtĩ, hã ra ũn kagyga ag hã vỹ ti venh mũ tĩ.” — Mateus 9:12.
Vẽnh rá tag ne ẽg kanhrãnrãn tĩ ti: Ẽg tỹ vẽnh kaga nỹtĩn kỹ, ẽg tỹ médico jãvãnh ke nỹtĩ.
Ũn tỹ vẽsén sór kỹ, kejẽn, ti tỹ ti jykre tỹ kaga nĩ. Ẽg tỹ kaga nỹtĩn kỹ, ẽg pi mỹꞌãg ke nỹtĩ, ẽg tỹ ũn mỹ vãmén jé, ẽg vẽnh kaga to. Ũn tỹ ti jykre kaga nĩn kỹ, Médico tỹ ti ki rĩr tĩ, ti tỹ há nĩ jé.
Tag han vãsãn nĩ: Médico há jãvãnh nĩ.
● Mĩ ãkrén nĩ: Topẽ tỹ ã to kanẽ jur tĩ.
Topẽ Vĩ Rá ne ẽg mỹ kãmén tĩ ti: “Sẽsĩ tỹ 5 (ke) kato ag tóg jãnkamy pir nĩm tĩ, ag tỹ ko jé. Hã ra Topẽ pijé ag kã jatun mũꞌ . . . . Sẽsĩ kãfór ãjag tóg nỹtĩ, Topẽ mỹ. Ãjag kãmĩ ũn pir tóg sẽsĩ e kãfór nĩ. Hã kỹ ag kamẽg tũ nĩ, ũ tỹ ẽg tén sór mũ ag, he tóg.” — Lucas 12:6, 7.
Vẽnh rá tag ne ẽg kanhrãnrãn tĩ ti: Topẽ tỹ ã to há tãvĩ nĩ.
Hãn ri ke mũn, ã tỹ to jykrén tĩ, ũn pi tỹ ã to kanẽ jur tĩ. Hã ra, Topẽ tỹ ã tỹ nén ũ jagy kato tẽ tĩ vég tĩ. Jérĩn mỹ, ã tỹ rĩr hã ki tĩ sór tũ nĩ, Topẽ tỹ ã to kanẽ jur tĩ. Salmo 51:17 vỹ ẽg mỹ ke tĩ: “Ẽg tỹ ã vĩ mranh ja to fe kaj nỹtĩ hã tóg ã mỹ tỹ nén há nĩ. Kỹ ã tóg ũ tỹ ã mỹ: ‘ã vĩ mranh inh,’ he mũ ẽn ag krenkren han ke tĩ.” Topẽ tỹ ã tỹ rĩr hã ki tĩnh ve sór tĩ, ti tỹ ã to há nĩ tugnĩn.
Tag han vãsãn nĩ: Topẽ tỹ ã to há nĩ, tag to kanhrãn nĩ, Topẽ Vĩ Rá ki. Ha vé, capítulo tỹ 24 livro tỹ Achegue-se a Jeová.
● Topẽ mré vĩm nĩ.
Topẽ Vĩ Rá ne ẽg mỹ kãmén tĩ ti: ‘Ãjag krĩ kufy nĩn kỹ ti [Topẽ] hã mỹ tóm nĩ. Kỹ tóg ãjag mỹ ãjag krĩ kuprãg ke mũ. Ti hã vỹ ẽg ki rĩr nĩgtĩ.’ — 1 Pedro 5:7.
Vẽnh rá tag ne ẽg kanhrãnrãn tĩ ti: Topẽ tỹ ã tỹ ti mré vĩ ve sór tĩ, ã nén jagy ag to.
Topẽ vỹ ã krĩ tỹ kuprãꞌ han tĩ, ã tỹ to vãsãn hã ki tĩ jé. (Filipos 4:6, 7, 13) Topẽ tỹ ge han tĩ, ẽg tỹ ti mré vĩ tĩ, ẽg fe kãtá. — Salmo 55:22.
Tag han vãsãn nĩ: Ũri, Topẽ mré vĩm nĩ. Topẽ jyjy pẽ tóm nĩ, Jeová ti, kar ti mỹ vãmén nĩ, nén ũ tỹ ã krĩ kufy gy han mũ ag to. (Salmo 83:18) Ti mỹ to vĩm nĩ, ã tỹ to vãsãn hã ki tĩ jé.
● Topẽ Vĩ Rá vỹ nén ũ há tỹ hãn ri kenh ke mũ ag to kãmẽn tĩ. Nén ũ ẽn ag to jykrén há nĩ.
Topẽ Vĩ Rá ne ẽg mỹ kãmén tĩ ti: “Nén ũ há tỹ hãn ri kenh ke mũ ag vỹ ẽg tar han tĩ, ẽg tỹ krónh ke tũ nỹtĩ jé.” — Hebreu 6:19 TNM.
Vẽnh rá tag ne ẽg kanhrãnrãn tĩ ti: Hã re mũn, kurã ũ kã ã tỹ há nĩ, kar kurã ũꞌũ kã, ã tỹ fe krój nĩ sir. Hã ra nén ũ há ag tỹ ránrán kỹ nỹtĩ, Topẽ Vĩ Rá ki, ag tỹ ã jagãgtãn ke mũ, ã tỹ tar han nĩ jé.
Nén ũ há tỹ hẽn ri kenh fã tag pi tỹ vẽnh péti nĩ. Topẽ tỹ vãmén tĩ, ti tỹ vẽnh vẽsỹrénh ti tỹ tũꞌ kenh ke mũ. — Nén venh ke 21:4.
Tag han vãsãn nĩ: Topẽ Vĩ Rá vỹ nén ũ há tỹ hãn ri kenh ke mũ ag to kãmẽn tĩ. Nén ũ ẽn to kanhrãn nĩ. Ha vé lição tỹ 5 Popé tỹ Topẽ vῖ sér ã mỹ!
● Nén ũ tỹ ã to há han nĩm nĩ.
Topẽ Vĩ Rá ne ẽg mỹ kãmén tĩ ti: “Mỹ sér nĩ kỹ tóg, ẽg tar han ke mũ.” — Provérbios 17:22.
Vẽnh rá tag ne ẽg kanhrãnrãn tĩ ti: Ẽg tỹ nén ũ há ag hyn han kỹ, tag vỹ ẽg há mỹ há han nĩ.
Tag han vãsãn nĩ: Nén ũ há ag han nĩm nĩ. Vãkyr há ag jẽmẽm nĩ, vẽnh rá há ag to kem nĩ, ke tũ nĩn kỹ kanhir nĩ. Ã tỹ ũn ag ajũna ken kỹ, ã tỹ mỹ sér nĩnh ke mũ. — Han kãme 20:35.
● Vẽnh ki rĩrm nĩ.
Topẽ Vĩ Rá ne ẽg mỹ kãmén tĩ ti: “Mũ nỹ, ẽg pir mỹ ẽmã tũ ja ra mũ jé, ẽg vẽnh kán sĩ han jé.” — Marcos 6:31.
Vẽnh rá tag ne ẽg kanhrãnrãn tĩ ti: Vẽjẽn há kom nĩ, tĩg ja tĩ nĩ kar vẽnh kán sĩ han nĩ. Ẽg tỹ nén ũ tag ag hyn han kỹ, tag vỹ ẽg mỹ há nĩnh mũ.
Tag han vãsãn nĩ: Tĩg ja há tĩ nĩ, minuto tỹ 15 kãmĩ.
● Mĩ ãkrén nĩ, kejẽn, nén ũ há ag tỹ hãn ri kenh ke mũ.
Topẽ Vĩ Rá ne ẽg mỹ kãmén tĩ ti: “Hã ra ãjag pijé ãjag tỹ nén venh ke mũ ki kanhró nỹtĩꞌ, ha mẽ. Ẽg hỹn ne venh ke mũ, vaj kỹ? Haꞌ. Ki kagtĩg ẽg nỹtĩ.” — Tiago 4:14.
Vẽnh rá tag ne ẽg kanhrãnrãn tĩ ti: Hã re mũn nén ũ jagy vỹ há kenh to fũrũn ke mũ, jérĩn mỹ nén ũ jagy ẽn vỹ nén ũ jagy tãvĩ nĩ.
Kejẽn, ã tỹ nén ũ jagy tãvĩ kato tẽ tĩ, hã ra ã tỹ nén ũ jagy ẽn fĩn rãm ke mũ. Hã tugnĩn, ã tỹ nén vỹ ã ajũna ke tĩ ag to jykrén ke nĩ. (2 Corinto 4:8) Mĩ ãkrén nĩ, ã tỹ rĩr hã ki tĩnh tĩ, ã tỹ nén ũ jagy ẽn fĩn rãm ke mũ mỹr.
Tag han vãsãn nĩ: Topẽ Vĩ Rá vỹ ũn jykre kuryj ag to kãmén tĩ. Ag tỹ nén ũ jagy kato tẽgtẽn kỹ, ag mỹ jagy tãvĩ, kỹ ag tỹ rĩnrĩr hã ki mũ sór tũ nỹtĩ vã. Hã ra ag tỹ nén ũ jagy ag vẽnh pãtá rãg há han kỹ nỹtĩ. Fag kãme to kem nĩ.
Topẽ Vĩ Rá mỹ ũn ag tỹ kãgter sór tĩ vã to vãmén tĩ hẽn?
Háv. Topẽ Vĩ Rá vỹ ũn ag tỹ rĩnrĩr hã ki mũ sór tũ nỹtĩ vã to kãmén tĩ. Topẽ pi ag to jũ mũ. Jãvo, ti tỹ ag ajũna ké. Ti tỹ ã mỹ ge han tĩ gé.
Elias
● Ũ nẽ tỹ Elias ti? Ti vỹ tỹ Topẽ vĩ tó tĩ nĩ vã. Ti tỹ mũmẽg vãnh ja nĩ. Hã ra, kejẽn, ti tỹ fe krój gy nĩ vã. Tiago 5:17 vỹ ẽg mỹ ke tĩ “Topẽ mré ke tỹ Elias mĩ ẽkrén nĩ. Ẽg mré tóg tỹ ẽprã ke nĩ ja nĩgtĩ.”
● Ti ne tugnĩn ter sór tĩ vã? Kejẽn, Elias tóg to jykrén mũ: isỹ pir mỹ nĩ, isỹ kamẽg nĩ, inh pi tỹ ne nĩ. Kỹ ti tóg: “Senhor, Topẽ, isén nĩ.” — 1 Reis 19:4.
● Ne nỹ ti ajũna ké? Elias tóg Jeová mré vãmén mũ, ti jykre to. Topẽ hã ren kỹ ti tar han ke? Topẽ tóg ti to kanẽ jur tĩ ven mũ kar ti tóg Elias mỹ ti tar ven mũ gé. Kar Topẽ tóg ti mỹ ti tỹ tỹ ũn há nĩ ver. Kar sir, Topẽ tóg ũn tỹ ti mré rãnhrãj há tĩ nĩm mũ.
▸ Ha to jẽn, Elias to: 1 Reis 19:2-18.
Jó
● Ũ nẽ tỹ Jó ti? Jó vỹ ti família tỹ rĩr há tĩ vã. Ti tỹ tỹ riko nĩ vã kar ti tỹ Topẽ mỹ rãnhrãj há tĩ vã.
● Ti ne tugnĩn ter sór tĩ vã? Vẽsỹmér ke tĩ, nén ũ jagy ag tỹ ti mỹ hãn ri ké. Ti tỹ ti jãnkamy kar kren mỹ. Ti krẽ ag tóg kãgter mũ. Ti tỹ vẽnh kaga gy nĩ vã. Jó vỹ tỹ ũn há nĩ vã, hã ra ũn ag tỹ ti to vĩ kónãn tĩ vã. Kỹ ti tóg: “Inh rĩr nĩ tóg inh mỹ kórég pẽ nĩ, kỹ iser ke tóg inh mỹ há ven nĩ.” — Jó 7:16.
● Ne nỹ ti ajũna ké? Jó tóg Topẽ mré vĩ mũ kar ũn ag mré vĩ mũ gé. (Jó 10:1-3) Ũn mré ke há tỹ Eliú vỹ ti tar han mũ, ti vẽnh jyvẽn há tỹ. Kar, Jó tỹ Topẽ vẽnh jyvẽn jẽmẽ há han kỹ, tag vỹ nén ũ há kãfór nĩ.
▸ Ha to jẽn, Jó to: Jó 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Moisés
● Ũ nẽ tỹ Moisés ti? Moisés tỹ Israel pãꞌi nĩ vã kar ti vỹ tỹ Topẽ vĩ tó tĩ nĩ vã.
● Ti ne tugnĩn tỹ ter sór tĩ vã? Moisés vỹ rãnhrãj mág tĩ vã, ũn ag tỹ ti mỹ to vĩ kónãn tĩ kar ti tỹ ron nĩ vã. Kỹ, Moisés tóg Topẽ mỹ: “Ã tỹ gen kỹ isỹ han kỹ inh jagãgtãn kỹ isén nĩ!” — Números 11:11, 15.
● Ne nỹ ti ajũna ké? Moisés tóg Topẽ mré vĩ mũ. Kỹ Topẽ tóg ũn ag tỹ Moisés mré rãnhrãj vin mũ. Hã tugnĩn, ti tỹ krĩ kufy gy tũ nĩ vã.
▸ Ha to jẽn, Moisés to: Números 11:4-6, 10-17.
a à tỹ kurã kar ki vẽsén to jykrén kỹ, médico to tĩm nĩ. Ti tỹ ã ki rĩr ki kanhrãn ke mũ.
You May Also Like
ẼG TO
Ẽg mỹ to vĩm nĩ, ũn tỹ ã venh tĩ jé
Vẽnh kanhrãn nĩ Topẽ Vĩ Rá to ke tũ nĩn kỹ, Jeová Kãmén Fã ag to kanhrãn kãfór nĩ.