Na mabuta mingi, bibuti me tulaka bansiku. Mu mbandu, bo ke tulaka bansiku na yina me tala ntangu yina bana fwete vutuka na nzo, bantangu ikwa bana lenda sadila ba-apareyi, mutindu ya kusadila bantu ya nkaka mambu mpi buna na buna.

 Nge ta sala nki kana nge me fwa nsiku mosi ya bo me tulaka na dibuta na beno? Nge lenda soba ve kima yina nge me sala dezia. Kansi, nge lenda sala mwa kima sambu mambu kubeba ve. Disolo yai ta sadisa nge na kuzaba mutindu nge lenda sala yo.

•  Mambu ya nge fwete sala ve

•  Diambu ya mbote ya kusala

•  Mambu yina baleke ya nkaka ke tuba

•   Kana bibuti na nge me zaba nde nge me fwa nsiku mosi na nzo, nge lenda kuma ti ngindu ya kubumba diambu ya nge me sala.

•   Kana bo me zaba nde nge me fwa nsiku mosi na nzo, nge lenda kuma ti ngindu ya kumonisa nde nge kele ve ti kifu to kupesa foti na bantu ya nkaka.

 Bangindu yina yonso zole kele ve mbote. Sambu na nki? Sambu kubumba kima yina nge me sala to kusosa kumonisa nde nge me sala ve kifu ta monisa nde nge me yela ntete ve. Yo ta pusa bibuti na nge na kuyindula nde nge me kuma ntete ve mbuta mpi nde nge fwete sala diaka bikesa.

 Diana ke tuba nde: “Kukusa ke vandaka ka yo ve solisio. Nsuka-nsuka, yo ta zabana kaka, mpi pinisio ke kumaka diaka ya ngolo kuluta mutindu yo zolaka kuvanda na luyantiku.”

•   Ndima mambu ya nge me sala. Biblia ke tuba nde: “Muntu yina ke bumba mambi na yandi ta nunga ve.” (Bingana 28:13) Bibuti na nge me zaba mbote nde nge lenda kuka ve kusala mambu na mutindu ya kukuka. Ngiufula yo yai: Keti nge lenda vanda muntu ya mbote?

   Olivia ke tuba nde: “Kana nge ke tuba kieleka, bibuti na nge ta lolula nge. Kana nge ke songa bo mambu yonso ya nge ke sala, bo ta ndima nde nge kele muntu ya mbote mpi bo ta tudila nge ntima.”

•   Lombaka Pardo. Biblia ke tuba nde: “Beno lwata kudikulumusa.” (1 Piere 5:5) Sambu na kulomba “pardo,” yo ke lombaka kuvanda muntu ya kudikulumusa mpi kubuya kudinungisa.

   Healther ke tuba nde: “Bantu yina ke kudinungisaka ke bebisaka kansansa na bo. Nsuka-nsuka, kansansa na bo ke yangisaka bo diaka ve kana bo ke sala mambu ya mbi.”

•    Ndimaka ndola. Biblia ke tuba nde: “Beno wa malongi.” (Bingana 8:33) Kubokuta ve mpi sala yonso sambu na kuzitisa bansiku yonso yina bibuti me tulaka na nzo.

   Jason ke tuba nde: “Konso mbala ya nge ke bokuta sambu bo me pesa nge ndola, yo lenda sala nde mambu kubeba diaka ngolo. Sala yonso sambu na kubakisa mambote ya nsiku mosi na kisika ya kumona kaka mambi na yo.”

•   Sala yonso sambu bibuti kutudila nge diaka ntima bonso na luyantiku. Biblia ke tuba nde: ‘Beno katula kimuntu ya ntama, yina ke wakana ti bikalulu na beno ya ntama.’ (Baefezo 4:22) Bakaka balukanu ya mbote sambu bibuti na nge kutudila nge diaka ntima.

   Karen ke tuba nde: “Kana bibuti na nge ke mona nde nge me kuma kuzwa balukanu ya mbote mpi nge ke sala diaka ve mbi yina nge salaka, bo ta kuma diaka kutudila nge ntima.”

 Ndongisila: Sala kuluta yina bo me lomba nge sambu na kumonisa nde nge kele muntu yina bo lenda tudila ntima. Mu mbandu kana nge me basika, songa bibuti na nge nde nge kele na nzila nde nge ke vutuka na nzo, ata nge kele ve na retare. Yo ta monisa nde nge ke zola kutuba nde: ‘Mono ke zola nde beno tudila mono diaka ntima bonso na luyantiku.’