David ya kele ti bamvula 23 ke tuba nde: “Ntangu mono vandaka kuyela, kima ya mpasi vandaka nde mono vandaka kuwa nzala ya kuvukisa nitu ti babakala. Mono vandaka kuyindula nde yo ta luta kansi nzala yina ke vandaka tii bubu yai.”

 David kele Mukristu yina ke zolaka kusepedisa Nzambi. Keti yandi lenda sepedisa Nzambi ata nzala ya kuvukisa nitu ti babakala ke kwisilaka yandi? Inki mutindu Nzambi ke tadilaka kuvukisa nitu babakala ti babakala to bankento ti bankento?

•  Inki Biblia ke tubaka?

•  Keti yo ke tendula nde . . . ?

•  Inki beto lenda tuba sambu na . . . ?

 Mambu ya me tala kuvukisa nitu babakala ti babakala to bankento ti bankento ke swaswanaka na kutadila bansungi yina bantu ke zingaka mpi bisika yina bo ke zingaka. Kansi Bakristu ke landaka ve bangindu ya bantu mingi to ‘konso mupepe ya malongi yina ke nataka ndambu na ndambu.’ (Baefezo 4:14) Bo ke zitisaka mambu yina Biblia ke tubaka na mambu ya me tala kuvukisa nitu babakala ti babakala to bankento ti bankento (to sambu na konso diambu ya nkaka).

 Minsiku ya Biblia ya ke tubila kuvukisa nitu babakala ti babakala to bankento ti bankento kele pwelele. Ndinga ya Nzambi ke tuba nde:

•  “Nge fwete lala ve ti bakala mutindu nge ke lalaka ti nkento.”—Levi 18:22.

•  “Na kutadila banzala ya bantima na bo, . . . Nzambi pesaka bo na nzala ya ngolo ya kuvukisa nitu ya bo ke yalaka ve, sambu bankento na bo me bikaka mutindu yina me fwana ya kuvukisa nitu mpi bo me kumaka kuvukisa nitu na mutindu yina me fwana ve.”—Baroma 1:24, 26.

•  “Beno kudikusa ve. Bantu ya ke salaka pite, bantu ya ke sambilaka biteki, bantu ya ke salaka bizumba, babakala yina ke pesaka nzila nde bo vukisa nitu ti bo na mutindu yina me fwana ve, babakala yina ke ladisaka babakala ya nkaka, miyibi, bantu ya lukasi, bantu ya ke lawukaka malafu, bantu ya ke fingaka, to bantu ya ke botulaka bima ya bantu ya nkaka ta baka ve Kimfumu ya Nzambi.”—1 Bakorinto 6:9, 10.

 Na kutuba masonga, minsiku ya Nzambi kele sambu na bantu yonso, yo vanda bo ke vukisaka nitu babakala ti babakala to bankento ti bankento. Yo yina beto yonso fwete kudiyala mpi kubuya kusala mambu yina ke sepedisaka ve Nzambi.—Bakolosai 3:5.

 Keti yo ke tendula nde Biblia ke pusaka beto na kumenga bantu yina ke vukisaka nitu babakala ti babakala to bankento ti bankento?

 Ve. Biblia ke pusaka beto ve na kumenga konso muntu yina ke vukisaka nitu bakala ti bakala to nkento ti nkento. Kansi Biblia ke songaka beto na ‘kulanda kuvanda na ngemba ti bantu yonso’ yo vanda bo ke salaka mambu ya mbote to ya mbi. (Baebreo 12:14) Yo yina yo kele mbi na kutuba to kusala mambu ya mbi sambu na bantu yina ke vukisaka nitu babakala ti babakala to bankento ti bankento to kumenga mpi kuniokula bo.

 Keti yo ke tendula nde Bakristu fwete telemina bansiku ya Leta yina ke pesaka nzila nde babakala kukwelana ti babakala to bankento kukwelana ti bankento?

 Biblia ke monisaka nde sambu na makwela, Nzambi ke zolaka nde bakala mosi kukwela nkento mosi. (Matayo 19:4-6) Bansiku ya Leta yina ke pesaka nzila nde babakala kukwelana ti babakala to bankento ti bankento me katukaka na mambu ya politiki kansi yo me katukaka ve na bansiku ya Biblia. Biblia ke songaka Bakristu na kudikotisa ve na mambu ya politiki. (Yoane 18:36) Yo yina Bakristu ke pesaka ve maboko na bansiku ya Leta yina ke pesaka nzila nde babakala kukwelana ti babakala to bankento ti bankento, ata mpidina bo ke teleminaka yo mpi ve.

 Inki beto lenda tuba sambu na bantu yina ke vukisaka nitu babakala ti babakala to bankento ti bankento? Keti bo lenda yambula kikalulu yai?

 Ee. Bantu ya nkaka na bilumbu ya bantumwa yambulaka mpi kikalulu yai ya mbi! Ntangu Biblia tubaka nde bantu yina ke vukisaka nitu babakala ti babakala to bankento ti bankento ta baka ve kimfumu ya Nzambi, yo yikaka nde: “Bantu ya nkaka na kati na beno vandaka mutindu yina.”—1 Bakorinto 6:9-11.

 Keti yo ke tendula nde bantu yina me yambulaka kuvukisa nitu babakala ti babakala to bankento ti bankento ke waka diaka ve nzala ya kuvutukila kusala yo? Ve. Biblia ke tuba nde: “Beno lwata kimuntu ya mpa, yina ke kuma ya mpa na nzila ya nzayilu ya sikisiki.” (Bakolosai 3:10) Yo ke lombaka ntangu sambu na kuyambula kikalulu mosi ya mbi.

 Inki beto lenda tuba sambu na bantu yina ke zola kulanda minsiku ya Nzambi kansi nzala ya kuvukisa nitu babakala ti babakala to bankento ti bankento ke kwisila bo kaka?

 Yo vanda konso nzala yina me kwisila beto, beto lenda buya na kulungisa yo. Inki mutindu? Biblia ke tuba nde: “Beno landa kutambula na mpeve ebuna beno ta lungisa ve ata nzala mosi ya kinsuni.”—Bagalatia 5:16.

 Simba nde verse yai ke tuba ve nde muntu ta vanda ve ti banzala ya kinsuni. Kansi kana yandi ke kumisa kinduku na yandi ti Nzambi ngolo disongidila kana yandi ke tanga Biblia mpi ke samba mbala na mbala, yandi ta vanda ti ngolo ya kubuya kulungisa banzala yina.

 David yina beto me tubila na luyantiku ya disolo yai salaka mpi mambu yai mpi yo natilaka yandi mambote. Yandi solulaka ti bibuti na yandi sambu na diambu ya mpasi yina vandaka kuyangisa yandi. Yandi ke tuba nde: “Yo vandaka bonso nde bo me katula kilo ya nene na mapeka na mono. Kana mono songaka bibuti na mono diambu yai na ntwala, mono zolaka kuzinga mbote banda kileki.”

 Ya kieleka, beto ke kumaka kuzinga na kiese kana beto ke landa minsiku ya Nzambi. Ee, beto ke zabaka nde minsiku ya Nzambi “kele ya lunungu, yo ke pesaka ntima kiese” mpi nde “Kuzitisa yo kele ti matabisi mingi.”—Bankunga 19:8, 11.