Keti Nzambi Ke Vandaka Bisika Yonso?
Mvutu ya Biblia
Nzambi lenda mona bima yonso mpi kusala bisika yonso yina yandi me zola. (Bingana 15:3; Baebreo 4:13) Ata mpidina, Biblia ke longaka ve nde Nzambi kele bisika yonso mpi na kati ya bima yonso. Kansi, yo ke monisaka nde yandi kele muntu mpi nde yandi kele ti kisika yina yandi ke zingaka.
Mutindu Nzambi kele: Nzambi kele mpeve. (Yoane 4:24) Bantu ke monaka yandi ve. (Yoane 1:18) Bambona-meso ya Nzambi yina Biblia ke tubilaka ke monisaka yandi mbala na mbala nde yandi ke vandaka na kisika kaka mosi. Yo ke songaka ve ata mbala mosi nde yandi ke vandaka bisika yonso.—Yezaya 6:1, 2; Kusonga 4:2, 3, 8.
Kisika Nzambi ke zingaka: Nzambi ke zingaka bampeve ke zingaka, kisika ya ke monanaka ve yina me swaswana ti kisika yina bantu ke zingaka. Kuna, Nzambi kele ti ‘kisika yina yandi ke zingaka na zulu’. (1 Bantotila 8:30) Biblia ke tubila dibaku mosi yina bigangwa ya kimpeve “kotaka sambu na kumonika na ntwala ya Yehowa;” a mpi diambu yai ke monisa nde Nzambi kele ti kisika mosi yina yandi ke zingaka—Yobi 1:6.
Kana Nzambi ke vandaka ve bisika yonso, keti yandi lenda kudibanzaka kibeni sambu na mono?
Ee. Nzambi ke kudibanzaka mingi sambu na konso muntu. Ata yandi ke zingaka na zulu, Nzambi ke monaka bantu yina kele na ntoto, bayina ke zolaka kibeni kusepedisa yandi, mpi yandi ke sadisaka bo. (1 Bantotila 8:39; 2 Bansangu 16:9) Beto tala mutindu Yehowa monisaka nde yandi vandaka kutudila bantu yina vandaka kusambila yandi na masonga dikebi:
Ntangu nge ke samba: Yehowa lenda wa kisambu na nge kaka na ntangu ya nge ke sala yo.—2 Bansangu 18:31.
Ntangu nge ke niokwama na mabanza: “Yehowa kele pene-pene ya bantu yina kele na mawa; yandi ke gulusaka bantu yina ke niokwama na mabanza.”—Nkunga 34:18.
Ntangu nge kele na mfunu ya lutwadisu: Yehowa “ta pesa nge mayele ya kubakisa mambu mbote-mbote mpi ta longa nge” na nsadisa ya Ndinga na yandi, Biblia.—Nkunga 32:8.
Bangindu ya mbi na yina me tala Nzambi kele bisika yonso
Ngindu ya luvunu: Nzambi kele bisika yonso na lugangu.
Diambu ya kieleka: Nzambi ke zingaka ve na ntoto to na konso kisika ya nkaka na luyalanganu ya ke monanaka. (1 Bantotila 8:27) Yo ke masonga nde bambwetete ti bima ya nkaka ya yandi me salaka ke “zabisaka nkembo ya Nzambi.” (Nkunga 19:1) Kansi, Nzambi ke zingaka ve na kati ya lugangu na yandi kaka mutindu muntu ya ke salaka bifwanisu ke zingaka ve na kati bifwanisu yina. Kansi, bifwanisu lenda songa beto mambu ya me tala muntu yina salaka yo. Mutindu mosi, bima yina ke monanaka ke songaka beto mambu ya me tala “bikalulu yina ke monanaka ve” ya Ngangi, mu mbandu ngolo, mayele, mpi zola na yandi.—Baroma 1:20.
Ngindu ya luvunu: Nzambi fwete vanda bisika yonso sambu yandi zaba mambu yonso mpi sambu yandi vanda nkwa-ngolo yonso.
Diambu ya kieleka: Mpeve santu ya Nzambi kele ngolo ya Nzambi yina ke monanaka na kisalu. Na nsadisa ya mpeve santu na yandi, Nzambi lenda mona mpi kusala konso kima, na konso kisika, mpi na konso ntangu kukonda nde yandi mosi kuvanda na kisika yango.—Nkunga 139:7.
Ngindu ya luvunu: Nkunga 139:8 ke longaka nde Nzambi ke vandaka bisika yonso, sambu yo ke tubaka nde: “Kana mono tombuka na zulu, nge ta vanda kuna, mpi kana mono tula mbeto na mono na Maziamu, nge ta vanda kuna.”
Diambu ya kieleka: Verse yai ke tubila ve kisika yina Nzambi ke zingaka. Kansi, yo ke tubila na mutindu ya kifwani nde kele ve ata ti kisika mosi yina kele ntama ebuna yo lenda sala nde Nzambi kuka ve kusadisa beto kuna.
a Yehowa kele zina ya Nzambi mutindu Biblia ke monisaka yo.
Nge Lenda Sepela Mpi Ti
BAVIDEO YA MALONGI YA MFUNU YA BIBLIA
Keti Nzambi Kele?
Tadila bikuma yina ke monisa nde yo me fwana na kundima nde Nzambi kele.
BAMVUTU NA BANGIUFULA YA BIBLIA
Mpeve Santu Kele Nki?
Yo me fwana mutindu Biblia ke tubilaka mpeve santu bonso “maboko”ya Nzambi
NTENDULA YA BAVERSE YA BIBLIA
Ntendula ya Yezaya 41:10—“Kuwa Boma Ve Sambu Mono Kele ti Nge”
Yehowa ke sadila mambu tatu yina ke ndimisa bansadi na yandi ya kwikama nde yandi ta sadisa bo.
MAMBU YA ME TALA BETO
Lomba nde Mbangi Mosi ya Yehowa Kukwisa Kutala Nge
Tadila ngiufula mosi ya Biblia, to sosa kuzaba mambu mingi na yina me tala Bambangi ya Yehowa.