Kisambu Tata na Beto ke sadisaka beto na kuzaba mutindu beto fwete samba mpi mambu yina beto fwete lomba na kisambu. Yezu songaka yo balongoki na yandi bo lombaka yandi nde: “Mfumu, longa beto mutindu ya kusamba.” (Luka 11:1) Kansi Kisambu ya Mfumu, to Tata na Beto kele ve kisambu mosi mpamba yina Nzambi ke ndimaka. a Yezu longaka bo yo bonso mbandu ya bisambu yina Nzambi ke waka.

Na disolo yai, nge ta zaba

•  Inki mambu kisambu Tata na Beto ke tubilaka?

•  Kisambu Tata na Beto ke tendula inki?

•  Keti kuvutukila ngogo mosi-mosi ya kele na kisambu Tata na Beto kele mutindu mosi mpamba ya kusamba?

•  Inki mutindu beto fwete samba?

•  Bisambu ya nkaka ya kele na Biblia

 Kisambu Tata na Beto kele na Matayo 6:9-13. Bo me sonikaka yo ve mutindu mosi na Babiblia yonso. Tala mutindu bo me sonikaka na Babiblia yai zole:

 Mbalula ya Nsi-Ntoto ya Mpa: “Ebuna, beno fwete samba mutindu yai: Tata na beto yina kele na zulu, zina na nge kuvanda ya santu. Kimfumu na nge kukwisa. Luzolo na nge kusalama na ntoto, bonso na zulu. Pesa beto bubu yai madia na beto sambu na kilumbu yai, mpi lolula masumu na beto, mutindu beto mpi me lolulaka bantu yina me salaka beto mbi. Kubika ve nde beto bwa na mpukumuna, kansi gulusa beto na maboko ya muntu ya mbi.”

 Biblia ya Yeruzalemi: “Tala mutindu beno fweti sambaka Nzambi: Tata na beto kele na zulu, zina na nge ya santu kuvanda ya lukumu, Kimfumu na nge kwisa, Luzolo na nge kusalama awa na ntoto bonso na zulu. Pesa beto bubu yai madia yina ya beto ke na yo mfunu. Lolula beto bantu ya masumu mutindu beto mpi me lolulaka bantu yina me salaka beto mbi. Kubikisa beto ve na kumona mpasi ya kuluta mingi, kansi katula beto na maboko ya Muntu ya Mbi.” b

 Sambu mambu ya Yezu longaka vandaka ya kuwakana ti mambu yina kele na baverse ya nkaka ya Biblia, yo me fwana na kuyindula nde bitini ya nkaka ya Biblia ke sadisa beto na kubakisa ntendula ya kisambu Tata na Beto.

“Tata na beto yina kele na zulu”

 Yo me fwana na kubinga Nzambi nde “Tata na beto” sambu yandi muntu salaka beto mpi pesaka beto luzingu.—Yezaya 64:8.

“Zina na nge kuvanda ya santu”

 Zina ya Nzambi, Yehowa, bantu fwete pesa yo lukumu mpi kusantisa yo. Muntu ta pesa maboko na kusantisama ya zina ya Nzambi, kana yandi ke tubila bikalulu ya Nzambi mpi ke songa bantu balukanu na yandi.—Nkunga 83:18 ; Yezaya 6:3.

“Kimfumu na nge kukwisa”

 Kimfumu ya Nzambi kele luyalu na yandi yina kele na zulu mpi Yezu kele Ntotila na yo. Yezu longaka beto na kusamba sambu luyalu yina kutwadisa ntoto ya mvimba.—Daniele 2:44; Kusonga 11:15.

“Luzolo na nge kusalama na ntoto, bonso na zulu”

 Mambu ya mbi mpi lufwa ke vandaka ve na zulu. Yo yina luzolo ya Nzambi sambu na ntoto kele nde, bantu kuzinga kimakulu na ngemba mpi na lutaninu.—Nkunga 37:11, 29.

“Pesa beto bubu yai dimpa na beto sambu na kilumbu yai”

 Na bilumbu ya Yezu, dimpa vandaka madia ya konso kilumbu. Beto fwete vila ve nde kana beto kele na luzingu, yo kele sambu na Muntu Yina Me Salaka beto. Yandi muntu ke pesaka beto bima yonso ya beto ke vandaka ti yo mfunu sambu na kuzinga.—Bisalu 17:24, 25.

“Lolula masumu na beto, mutindu beto mpi me lolulaka bantu yina me salaka beto mbi”

 Ngogo ya kigreki ya bo me balula na “disumu” na verse yai ke tendula na kisina “bamfuka.” (Luka 11:4). Bantu yonso ke salaka masumu mpi bo ke vandaka na mfunu nde bo lolula bo. Kansi kana beto ke zola nde Nzambi kulolula bifu beto, beto fwete vanda ya kuyilama na kulolula bifu yina bantu ya nkaka ke sadila beto.—Matayo 6:14, 15.

“Kubika ve nde beto bwa na mpukumuna, kansi gulusa beto na maboko ya muntu ya mbi”

 Yehowa Nzambi ke mekaka beto ve ata fioti sambu beto sala mbi. (Yakobo 1:13) Muntu ya ke mekaka beto kele “muntu ya mbi” disongidila, Satana Diabulu, yina Biblia ke bingaka mpi “mumeki.” (1 Yoane 5:19; Matayo 4:1-4) Beto fwete lomba Yehowa nde yandi bika ve nde beto bwa ntangu beto ke kutana ti mimekamu yina lenda pusa beto na kukonda kulemfukila yandi.

 Kisambu Tata na Beto kele mbandu ya kisambu yina Yezu pesaka beto. Yo ke lombaka ve kuvutukila ngogo mosi-mosi. Ntwala ya kutubila yo, Yezu pesa lukebisu yai: “Ntangu nge ke samba, kuvutukila ve mambu ya mutindu mosi mbala na mbala.” (Matayo 6:7) Ntangu yandi tubilaka diaka kisambu na dibaku ya nkaka, yandi sadilaka bangogo ya mutindu ya nkaka.—Luka 11:2-4.

 Mutindu ya mbote ya beto lenda samba kele ya kusonga Nzambi na masonga yonso mambu ya ke katuka na ntima na beto, ti bangogo na beto mosi.—Nkunga 62:8.

 Kisambu Tata na beto kele mbandu ya mbote ya kisambu yina beto fwete sala sambu Nzambi kuwa beto. Tala inki mutindu kisambu yango ke wakana ti baverse ya nkaka ya Biblia ya ke tubila kisambu.

•   Kusamba kaka Nzambi yandi mosi

   Verse: “Kansi na mambu yonso na nzila ya kisambu mpi ntangu beno ke bondila ti kupesa matondo, beno zabisa Nzambi mambu ya beno ke lomba.”—Bafilipi 4:6.

   Ntendula: Beto fwete samba kaka Nzambi, kansi Yezu ve. Beto fwete samba ve Maria to basantu. Mutindu Kisambu ya Mbandu ke yantika ti bangogo “Tata na Beto” yo ke longa beto nde beto fwete samba kaka Yehowa Nzambi mpamba, kansi muntu ya nkaka ve.

•   Kusamba sambu na konso kima yina ke wakana ti luzolo ya Nzambi

   Verse: “Yandi ke waka beto, konso kima yina beto ke lomba na kuwakana ti luzolo na yandi.”—1 Yoane 5:14.

   Ntendula: Beto lenda samba sambu na konso kima yina ke wakana ti luzolo ya nzambi. Yezu monisaka mfunu ya luzolo ya Nzambi ntangu yandi kotisaka na kisambu Tata na Beto bangogo yai: “Luzolo na nge kusalama na ntoto, bonso na zulu.” Beto lenda zaba luzolo ya Nzambi sambu na ntoto mpi sambu na bantu kana beto ke longuka Biblia.

•   Kusamba sambu na bampusa ya kinsuni

   Verse: “Losila Yehowa kizitu na nge, ebuna yandi ta sadisa nge.”—Nkunga 55:22.

   Ntendula: Nzambi ke kudibanzaka sambu na bampusa na beto. Na kisambu yina Yezu pesaka mbandu disongidila Tata na Beto, yandi tubilaka mpi bampusa ya konso muntu, yina muntu na muntu lenda samba sambu na yo. Beto lenda samba Nzambi sambu yandi lungisa bampusa na beto ya konso kilumbu, yandi twadisa beto ntangu beto ke baka balukanu ya mfunu, yandi sadisa beto na bantangu ya mpasi mpi yandi lolula masumu na beto. c