DILONGI 55
Mutindu Nge Lenda Sadisa Dibundu na Beno
Na ntoto ya mvimba, bantu mingi kibeni ke sambilaka Yehowa na kiese na mabundu mingi mpenza ya Bambangi ya Yehowa. Bo ke sepelaka ti malongi mpi lutwadisu yina bo ke bakaka mpi bo ke vandaka na kiese ya kusadisa dibundu na mitindu mingi. Keti nge mpi ke vandaka na kiese ya kusadisa dibundu na beno?
1. Inki mutindu beto lenda sadila ntangu mpi ngolo na beto sambu na kusadisa dibundu?
Beto yonso lenda sadisa dibundu. Mu mbandu, keti bampangi ya nkaka na dibundu na beno kele minunu to ti bifu na nitu? Keti nge lenda sadisa bo na kukwenda na balukutakanu to mpi kusadisa bo na mambu ya nkaka ya mfunu, mu mbandu kusumbila bo bima yina bo kele na yo mfunu to kusadila bo bisalu ya nzo? (Tanga Yakobo 1:27.) Beto lenda pesa mpi maboko na bisalu ya kutula bunkete mpi ya kuyidika Nzo na beto ya Kimfumu. Ata muntu mosi ve ke pusaka beto na ngolo na kusala mambu yai. Zola na beto sambu na Nzambi mpi sambu na bampangi na beto, ke pusaka beto na “kudipesa na luzolo na [beto] mosi.”—Nkunga 110:3.
Bambangi ya Yehowa ya me bakaka mbotika lenda sadisa dibundu na mitindu ya nkaka. Bampangi-babakala ya ke lungisa mambu yina Biblia ke lombaka ke kumaka bansadi ya kisalu mpi na nima bo ke kumaka bankuluntu. Bampangi ya nkaka ya babakala mpi ya bankento lenda sala na kiese yonso kisalu ya kimupasudi-nzila. Bambangi ya Yehowa ya nkaka lenda pesa maboko na bisalu ya kutunga bisika ya lusambu mpi bankaka lenda kwenda na kisika yina dibundu mosi kele na mfunu ya lusadisu ya mitindu ya nkaka.
2. Inki mutindu beto lenda sadila mbongo mpi bima na beto ya nkaka sambu na kusadisa dibundu?
Beto lenda “kumisa Yehowa ti bima na [beto] ya ntalu.” (Bingana 3:9) Beto ke vandaka na kiese mingi ntangu beto ke pesaka mbongo mpi bima na beto ya nkaka sambu na kusadisa dibundu na beto mpi kupesa maboko na kisalu ya kulonga nsangu ya mbote na ntoto ya mvimba. (Tanga 2 Bakorinto 9:7.) Organizasio ya Yehowa ke sadilaka mpi makabu na beto sambu na kusadisa bampangi yina me bwila bampasi. Bampangi mingi ke ‘tulaka ndambu ya mbongo na lweka’ sambu na kupesa makabu mbala na mbala. (Tanga 1 Bakorinto 16:2.) Beto lenda tula mbongo na bakesi ya makabu ya bo ke tulaka na bisika yina beto ke salaka balukutakanu to na nzila ya Internet na donate.jw.org. Beto ke monisaka nde beto ke zolaka Yehowa kana beto ke sadila mbongo mpi bima na beto ya nkaka sambu na kusadisa dibundu.
LONGUKA MAMBU MINGI
Beto tala mambu ya nkaka ya nge lenda sala sambu na kusadisa dibundu na beno.
3. Beto lenda sadila bima na beto ya nkaka
Yehowa mpi Yezu ke zolaka bantu yina ke pesaka mpenza na kiese. Mu mbandu, Yezu sikisaka nkento mosi ya mufwidi yina vandaka nsukami sambu na luzolo ya mbote yina yandi vandaka na yo ya kupesa makabu. Beno tanga Luka 21:1-4 mpi na nima beno pesa mvutu na bangiufula yai:
-
Keti yo ke lombaka kaka nde beto pesa makabu mingi sambu na kusepedisa Yehowa?
-
Yehowa ti Yezu ke waka nki mutindu kana beto ke pesa makabu na kiese?
Sambu na kuzaba mutindu organizasio ya Yehowa ke sadilaka makabu na beto, beno tala VIDEO. Na nima beno pesa mvutu na ngiufula ya ke landa.
-
Inki mutindu organizasio ya Yehowa ke sadilaka makabu na beto sambu na mambote ya mabundu ya ntoto ya mvimba?
4. Beto pesa lusadisu na luzolo yonso
Na ntangu ya ntama, bansadi ya Yehowa vandaka kusala mpenza ngolo sambu kutanina bisika na bo ya lusambu. Katula kupesa mbongo, bo vandaka kusala mpi mambu ya nkaka. Beno tanga 2 Bansangu 34:9-11 mpi na nima beno pesa mvutu na ngiufula yai:
-
Inki mutindu bantu yonso ya Izraele vandaka kupesa maboko sambu na kuyidika nzo ya Yehowa to kisika ya lusambu?
Sambu nge mona mutindu Bambangi ya Yehowa ke landaka mbandu ya bansadi ya Nzambi ya ntangu ya ntama, beno tala VIDEO. Na nima beno pesa mvutu na bangiufula ya ke landa.
-
Sambu na nki yo kele mfunu nde Nzo na beto ya Kimfumu kuvanda ntangu yonso bunkete mpi ya kuyidika mbote?
-
Inki nge lenda sambu na kupesa maboko na bisalu yai?
5. Bampangi-babakala, beno sala ngolo na kubaka mikumba
Biblia ke lombaka bampangi-babakala na kusala yonso sambu na kulungisa mambu yina yo ke lombaka sambu na kubaka mikumba na dibundu. Mu mbandu, beno tala VIDEO. Na nima beno pesa mvutu na ngiufula ya ke landa.
-
Mutindu video me monisa yo, nki mpangi Ryan salaka sambu na kukuma kusadisa dibundu mingi?
Biblia ke tubilaka mambu yina bampangi-babakala fwete lungisa sambu bo kuma bansadi ya kisalu to bankuluntu. Beno tanga 1 Timoteo 3:1-13 mpi na nima beno pesa mvutu na bangiufula yai:
MUNTU YA NKAKA LENDA YULA NGE NDE: “Bambangi ya Yehowa ke bakaka mbongo na wapi sambu na kusala bisalu na bo?”
-
Inki mvutu nge ta pesa?
NA BUNKUFI
Yehowa ke sepelaka mingi mpenza kana beto ke sadila ntangu, ngolo mpi bima ya beto kele ti yo sambu na kusadisa dibundu.
Inki Nge Me Simba?
-
Inki mutindu beto lenda sadila ntangu mpi ngolo na beto sambu na kusadisa dibundu?
-
Inki mutindu beto lenda sadila bima ya beto kele ti yo sambu na kusadisa dibundu?
-
Tanga mwa mambu ya nge lenda sala sambu na kusadisa dibundu.
TALA MPI
Tala sambu na nki Nzambi ke lombaka diaka ve bansadi na yandi na kupesa dime.
“Inki Biblia Ke Tubaka Sambu na Dime?” (Disolo ya kele na jw.org)
Biblia ke pesaka mikumba ya nkaka na bampangi-babakala ya me bakaka mbotika. Ebuna kana mpangi-nkento ya me bakaka mbotika ke zola kulungisa mikumba yango, nki yandi fwete sala?
“Kiyeka Yina Yehowa Me Pesaka Bampangi na Dibundu”? (Nzozulu ya Nkengi, Février 2021)
Tala bikesa ya mingi yina Bambangi ya Yehowa ya nkaka ke salaka sambu na kunatila bampangi na bo Bakristu mikanda.
Keti beto ke zwaka mbongo sambu na kusala kisalu na beto mutindu mabundu ya nkaka ke zwaka yo?
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
