DILONGI 11
Mambu ya Nge Lenda Sala Sambu Kutanga Biblia Kunatila Nge Mambote
Keti nge me kudiyangisaka dezia ntangu yo lombaka nde nge yantika kisalu mosi ya ngolo? Mbala ya nkaka sambu yo vandila nge ve mpasi, nge yantikaka kusala yo malembe-malembe. Yo kele mpi mutindu mosi ti kutanga Biblia. Nge lenda kudiyula nde: ‘Mono ke yantika na wapi?’ Na dilongi yai, beto ta tubila mwa mambu yina nge lenda sala sambu nge kuma kusepela ti kutanga mpi kulonguka Biblia.
1. Sambu na nki beto fwete tanga Biblia mbala na mbala?
Muntu yina ke tanga Biblia to “nsiku ya Yehowa” mbala na mbala, ta vanda na kiese mpi mambu yina yandi ke sala ta nunga. (Tanga Nkunga 1:1-3.) Sambu nge yantika kusala yo, nge lenda banda kutanga baminuta fioti konso kilumbu. Kana nge ke yikama mbote ti Ndinga ya Nzambi, nge ta kuma mpenza kusepela kutanga yo.
2. Inki lenda sadisa nge na kubaka mambote na kutanga Biblia?
Sambu beto baka mambote mingi na kutanga Biblia, beto fwete pema fioti mpi kuyindula mambu yina beto ke tanga. Beto fwete tanga mpi ‘kuyindulula yo.’ (Yozue 1:8, noti na nsi ya lutiti) Ntangu nge ke tanga, kudiyula bangiufula yai: ‘Mambu yai ke longa mono nki sambu na Yehowa Nzambi? Inki mutindu mono lenda sadila mambu yai na luzingu na mono? Inki mutindu mono lenda sadila baverse yai sambu na kusadisa bantu ya nkaka?’
3. Inki mutindu nge lenda zwa ntangu ya kutanga Biblia?
Keti yo ke vandaka mpasi sambu nge zwa ntangu ya kutanga Biblia? Yo ke vandaka mpi mpasi sambu na bantu mingi. Sala yonso sambu nge ‘sadila ntangu na nge mbote kibeni.’ (Baefezo 5:16) Nge lenda sala yo kana nge ke bumba ntangu ya kutanga Biblia konso kilumbu. Bantu ya nkaka ke tangaka Biblia na suka-suka. Bankaka ke ponaka ntangu mosi na kilumbu mu mbandu, na midi na ntangu ya kupema. Diaka, bantu ya nkaka ke tangaka Biblia na nkokila na ntwala ya kulala. Inki kele ntangu ya mbote sambu na nge?
LONGUKA MAMBU MINGI
Beto tala mutindu nge lenda kuma kusepela mingi kutanga Biblia mpi mutindu nge lenda yilama mbote sambu kulonguka na nge ya Biblia kunatila nge mambote mingi.
Kaka mutindu beto lenda kuma kusepela kudia madia ya nkaka, beto lenda kuma mpi kusepela kutanga Biblia
4. Mambu ya nge lenda sala sambu na kusepela kutanga Biblia
Na luyantiku, yo lenda vanda mpasi na kutanga Biblia. Kansi beto lenda kuma ti “nzala ya ngolo” ya kusala yo kaka mutindu muntu ke kumaka kusepela ti madia yina yandi me diaka ntete ve. Beno tanga 1 Piere 2:2 mpi na nima beno pesa mvutu na ngiufula yai:
-
Nge ke ndima nde kana nge ke tanga Biblia konso kilumbu, nge ta kuma kusepela ti yo mpi kuzola kutanga yo mingi?
Beno tala VIDEO sambu na kutala mutindu bantu ya nkaka kumaka kusepela kutanga Biblia. Na nima, beno pesa mvutu na bangiufula ya ke landa.
-
Mutindu video ke monisa yo, nki bampasi batoko yai nungaka?
-
Inki sadisaka bo na kubanda kuzola kutanga Biblia?
-
Inki bo salaka sambu bo kuma kusepela mingi kutanga Biblia?
Mambu ya nge lenda sala sambu na kuyantika:
-
Pona Biblia ya mbote yina kele ti bangogo ya pete ya bantu ke sadila bilumbu yai. Nge lenda sadila Biblia—Mbalula ya Nsi-Ntoto ya Mpa kana yo kele na ndinga na beno.
-
Nge lenda banda ntete kutanga mikanda ya Biblia yina ke sepedisaka nge mingi. Sambu na kuzaba mambu yina nge fwete sala, tala kitini “Mambu ya Nge Lenda Sala Sambu Nge Tanga Biblia ti Kiese.”
-
Tula kidimbu na mambu yina nge ke tanga. Sadila tablo “Manaka na Nge ya Kutanga Biblia” ya kele na mukanda yai.
-
Sadila application JW Library®. Yo ta sadisa nge na kutanga mpi kuwidikila lutangu ya Biblia na bandinga mingi na konso kisika yina nge kele na telefone to na apareyi ya nkaka.
-
Sadila Bangindu ya Ngika ya Biblia—Mbalula ya Nsi-Ntoto ya Mpa. Yo kele ti bakarti, batablo mpi bantendula ya bangogo yina lenda sala nde nge kuma kusepela kutanga Biblia.
5. Yilama sambu na kulonguka na nge ya Biblia
Beno tanga Nkunga 119:34 mpi na nima beno pesa mvutu na ngiufula yai:
-
Sambu na nki yo kele mfunu na kusamba na ntwala ya kutanga Biblia to na ntwala ya kuyilama sambu na kulonguka yo?
Inki nge lenda sala sambu kulonguka na nge ya Biblia kunatila nge mambote mingi? Ntangu nge ke yidika dilongi mosi ya mukanda yai, meka kusala mambu yai:
-
Tanga baparagrafe ya kele na luyantiku ya dilongi yango.
-
Sosa mpi tanga baverse. Diaka meka kubakisa mutindu yo ke wakana ti mambu ya kele na dilongi yango.
-
Tenda bangogo ya mfunu yina ke pesa mvutu na konso ngiufula. Mpidina yo ta sadisa nge ntangu nge ta longuka dilongi yango ti mpangi ya ke longaka nge Biblia.
Keti nge zabaka yo?
Bambangi ya Yehowa ke sadilaka Babiblia mingi. Ata mpidina, beto ke zolaka mingi kusadila Biblia—Mbalula ya Nsi-Ntoto ya Mpa sambu yo ke tubilaka mambu kaka mutindu yo kele, na pwelele yonso mpi sambu yo ke sadilaka zina ya Nzambi.—Tala Disolo ya kele na jw.org “Keti Bambangi ya Yehowa Kele ti Biblia na Bo Mosi?”
BANTU YA NKAKA KE TUBAKA NDE: “Kulonguka Biblia kele mpasi mingi. Mono ke vandaka ve ti ntangu ya kulonguka mpi yo ke lembisaka.”
-
Inki nge ke yindula?
NA BUNKUFI
Sambu Biblia kunatila nge mambote mingi, bumba ntangu ya kutanga yo, samba sambu na kubakisa mambu ya nge ke tanga mpi yilama na ntwala ya kulonguka Biblia.
Inki Nge Me Simba?
-
Inki ta sadisa nge na kubaka mambote mingi na Biblia?
-
Inki ntangu nge lenda tanga mpi kulonguka Biblia?
-
Sambu na nki yo kele mfunu nde nge yilama sambu na kulonguka na nge ya Biblia?
TALA MPI
Tala mambu ya nkaka ya lenda sadisa nge na kubaka mambote mingi ntangu nge ke tanga Biblia.
“Mutindu ya Kubaka Mambote Mingi na Kutanga Biblia” (Nzozulu ya Nkengi No. 1 2017)
Tala mitindu tatu ya kutanga Biblia.
“Inki Mutindu Biblia Lenda Sadisa Mono?—Kitini 1: Longuka Biblia” (Disolo ya kele na jw.org)
Tala mutindu nge lenda kuma kutanga Biblia ti kiese.
“Inki Mutindu Biblia Lenda Sadisa Mono?—Kitini 2: Tanga Biblia ti Kiese” (Disolo ya kele na jw.org)
Tala bandongisila yina bantu ya ke tangaka Biblia banda bamvula mingi ke pesa sambu na kulonguka Biblia.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
