DILONGI 03
Keti Nge Ke Ndimaka Nde Mambu Yina Biblia Ke Tubaka Kele ya Kieleka?
Biblia ke tubaka mambu mingi sambu na bilumbu ke kwisa mpi yo ke pesaka bandongisila mingi. Mbala ya nkaka, nge ke zola kuzaba mambu yina yo ke tubaka kansi nge kele mpi ti mwa badute. Keti nge fwete ndima mambu yina mukanda yai ya ntama ke tubaka sambu na bilumbu ke kwisa mpi bandongisila na yo? Keti nge ke ndimaka mpenza mambu yina yo ke tubaka sambu na kuvanda na kiese bubu yai mpi na bilumbu ke kwisa? Bantu mingi ke ndimaka mambu yina Biblia ke tubaka. Beto ke lomba nge na kutadila yo mpi.
1. Keti mambu yina Biblia ke tubaka kele ya kieleka to ya luvunu?
Biblia kele ti “bangogo . . . ya kieleka.” (Longi 12:10) Yo ke tubilaka mambu ya kieleka mpi masolo ya bantu yina zingaka mpenza. (Tanga Luka 1:3; 3:1, 2.) Bantu mingi ya istware mpi ya ke longukaka mambu ya ntama ke ndimaka nde badati, bantu, bisika mpi masolo ya mfunu yina kele na Biblia kele ya masonga.
2. Sambu na nki beto ke tuba nde Biblia me manaka ve ngala?
Mbala mingi Biblia ke tubilaka na ntwala mambu yina ta salama. Mu mbandu, yo ke tubilaka mpi mambu ya siansi. Ntangu bo vandaka kusonika yo, bantu mingi vandaka kundima ve mambu ya siansi yina yo vandaka kutubila. Kansi bubu yai, bantu ya siansi ke ndimaka nde mambu ya kele na Biblia kele ya kieleka. Yo me “fwana na kutudila yo ntima ntangu yonso, bubu yai” mpi mvula na mvula.—Nkunga 111:8.
3. Sambu na nki beto fwete ndima mambu yina Biblia ke tubaka sambu na bilumbu ke kwisa?
Biblia ke tubilaka mambu yina ta salama, disongidila “mambu yina me salama ntete ve.” (Yezaya 46:10) Yo tubilaka mbote-mbote bamvula mingi na ntwala mambu mingi yina salamaka na nima mpi mambu yina ke salama bubu yai na ntoto. Na dilongi yai, beto ta longuka mwa mambu yina Biblia tubilaka. Mutindu yo ke salamaka ke yitukisaka!
LONGUKA MAMBU MINGI
Beto tala mutindu bantu ya siansi ya bilumbu na beto ke ndimaka mambu yina Biblia ke tubaka mpi beto tadila mwa mambu ya ke yitukisa yina Biblia tubilaka.
4. Siansi ke ndimaka mambu ya Biblia ke tubaka
Na ntangu ya ntama, bantu mingi vandaka kuyindula nde ntoto kele na zulu ya kima mosi. Beno tala VIDEO.
Tala mambu yina bo sonikaka na mukanda ya Yobi bamvula kiteso ya 3 500 me luta. Beno tanga Yobi 26:7 mpi na nima beno pesa mvutu na ngiufula yai:
-
Biblia ke tubaka nde ntoto kele na zulu ya kima mosi ve. Sambu na nki yo ke yitukisa nge?
Bamvula kiteso ya 200 me luta, bantu bakisaka mbote mpila masa ya banzadi ke mataka na zulu kana ntangu me bula na zulu na yo, mpila yo ke kumaka matuti mpi ke nokaka. Kansi, tala mambu yina Biblia tubaka bamvula mingi me luta. Beno tanga Yobi 36:27, 28 mpi na nima beno pesa mvutu na bangiufula yai:
-
Inki ke yitukisa nge na mambu ya baverse yai ke tubila?
-
Keti baverse yai ya nge me katuka kutanga ke pusa nge diaka na kutudila Biblia ntima?
5. Biblia tubilaka na ntwala mambu ya mfunu
Beno tanga Yezaya 44:27–45:2 mpi na nima, beno pesa mvutu na ngiufula yai:
-
Inki mambu Biblia tubaka bamvula 200 na ntwala nde bo fwa Babilone?
Istware ke ndimaka nde Sirusi ntotila ya Persia mpi basoda na yandi fwaka mbanza Babilone na mvula 539 N.T.B. a Bo kawusaka nzadi yina vandaka kutanina mbanza. Bo kotaka na mbanza na baporte yina vandaka ya kukanguka. Mpi na nima, bo fwaka yo kukonda kunwana. Bubu yai na nima ya bamvula kuluta 2 500, Babilone kele kaka ya kubwa. Tala mambu yina Biblia tubaka na ntwala.
Beno tanga Yezaya 13:19, 20 mpi na nima, beno pesa mvutu na ngiufula yai:
-
Inki mutindu mambu yai lunganaka?
Babilone ya kubwa bubu yai na Iraq
6. Biblia tubilaka mambu yina beto ke mona bubu yai
Biblia ke tubaka nde beto ke zinga na “bilumbu ya nsuka.” (2 Timoteo 3:1) Tala mambu yina Biblia tubaka sambu na bilumbu ya nsuka:
Beno tanga Matayo 24:6, 7 mpi na nima, beno pesa mvutu na ngiufula yai:
-
Inki mambu Biblia tubaka nde yo ta salama na bilumbu ya nsuka?
Beno tanga 2 Timoteo 3:1-5 mpi na nima, beno pesa mvutu na bangiufula yai:
-
Inki bikalulu Biblia tubaka nde bantu mingi ta vanda ti yo na bilumbu ya nsuka?
-
Inki bikalulu na kati ya bikalulu yai nge ke monaka?
BANTU YA NKAKA KE TUBAKA NDE: “Biblia ke tubilaka masolo ya ntama mpi mambu ya luvunu.”
-
Inki ke ndimisaka nge nde Biblia ke tubaka mpenza mambu ya kieleka?
NA BUNKUFI
Istware, siansi mpi mambu yina Biblia ke tubilaka na ntwala ke monisa nde Biblia ke tubaka mambu ya kieleka.
Inki Nge Me Simba?
-
Keti mambu yina Biblia ke tubaka kele ya kieleka to ya luvunu?
-
Tanga mwa mambu ya siansi yina ke wakanaka ti mambu ya Biblia ke tubaka.
-
Keti nge ke ndimaka nde Biblia ke tubilaka mambu yina ta salama na bilumbu ke kwisa? Kana nge ke ndimaka yo to ve, sambu na nki?
TALA MPI
Keti Biblia ke tubilaka mambu ya siansi ti bifu?
“Keti Siansi Ke Wakanaka ti Biblia?” (Disolo ya kele na jw.org)
Inki ke monisa nde beto ke zinga na “bilumbu ya nsuka”?
“6 Bambikudulu Ya Biblia Yina Nge Kemona Kulungana na Yo” (Nzozulu ya Nkengi, Yuni 1, 2011)
Tala mutindu mambu yina Biblia tubaka sambu na Kimfumu ya Grese lunganaka.
Tala mutindu mambu yina Biblia ke tubilaka na ntwala sadisaka muntu mosi na kukuma kutadila Biblia na mutindu ya mbote.
“Mu Vandaka Kundima Ve nde Nzambi Kele” (Nzozulu ya Nkengi No. 5 2017)
a N.T.B. ke tendula “Na Ntwala ya Ntangu na Beto” mpi T.B. ke tendula “Na Ntangu na Beto.”
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
