Kilumbu mosi na mpimpa, Nebukadenezare lalaka ndosi mosi yina pesaka yandi boma. Yandi bingaka bantu na yandi ya mayele sambu na kutendudila yandi yo. Kansi ata muntu mosi ve na kati na bo kukaka kutendula yo. Nsuka-nsuka, ntotila solulaka ti Daniele.

Nebukadenezare songaka Daniele nde: ‘Na ndosi na mono, mono monaka nti mosi. Yo yelaka mingi kibeni mpi yo kumaka tii na zulu. Bantu yonso na ntoto lendaka kumona yo. Yo vandaka ti matiti ya kitoko mpi bambuma mingi. Bambisi vandaka kupema na nsi ya kivudi na yo, mpi bandeke vandaka kutunga babuyamba na bo na balutangu na yo. Na nima wanzio mosi katukaka na zulu mpi kwisaka. Yandi tubaka na ndinga ya ngolo nde: “Beno bwisa nti yina, mpi beno zenga balutangu na yo. Kansi beno bikisa kisina ti misisa na yo na ntoto, mpi beno kanga yo bansinga ya kibende mpi ya kwivre. Ntima ya nti yina ta vanda diaka ve ya muntu kansi yo ta kuma ya mbisi, mpi bantangu nsambwadi ta luta. Bantu yonso ta zaba nde Nzambi kele Mfumu mpi nde yandi lenda pesa kimfumu na konso muntu yina yandi me zola.”’

Yehowa songaka Daniele ntendula ya ndosi yina. Ntangu Daniele bakisaka ndosi yina, yandi waka boma. Yandi tubaka nde: ‘O ntotila, mono vandaka kuyindula nde ndosi yai, vandaka kutadila bambeni na nge, kansi yo ke tadila nge. Nti ya nene yina bo bwisaka kele nge. Nge ta katuka na kimfumu, mpi nge ta dia matiti na mfinda bonso mbisi ya mfinda. Kansi sambu wanzio tubaka nde bo bikisa kisina mpi misisa na yo, nge ta kuma diaka ntotila.’

Mvula mosi na nima, Nebukadenezare vandaka kutambula na ludi ya kipala-pala ya nzo na yandi, mpi ke tala Babilone. Yandi tubaka nde: ‘Tala mbanza yai ya kitoko ya mono me tunga. Mono kele muntu ya nene kibeni!’ Ntangu yandi vandaka kutuba, ndinga mosi katukaka na zulu mpi tubaka nde: ‘Nebukadenezare! Ntangu yai nge me vidisa kimfumu na nge.’

Na ntangu yina, Nebukadenezare kumaka kilau mpi bonso mbisi ya mfinda. Yandi bikisaka nzo na yandi mpi kumaka kuzinga ti bambisi na mfinda. Nsuki ya Nebukadenezare kumaka nda bonso mansala ya ngo-zulu, mpi manzungulu na yandi vandaka bonso manzungulu ya bandeke.

 Na nima ya bamvula nsambwadi, Nebukadenezare kumaka mbote mpi Yehowa tulaka yandi diaka ntotila ya Babilone. Ebuna Nebukadenezare tubaka nde: ‘Mono ke kumisa Yehowa, Ntotila ya zulu. Ntangu yai mono me zaba nde Yehowa kele Mfumu. Yandi ke kumisaka bantu ya lulendo bantu ya kudikulumusa, mpi yandi lenda pesa kimfumu na konso muntu yina yandi me zola.’