Mutindu beno me longuka na kamukanda yai, Biblia kele ti minsiku mingi yina ta sadisa nge ti dibuta na nge. Yehowa ke zola nde nge vanda na kiese. Yandi ke sila nde kana beno tula lusambu na yandi na kisika ya ntete, “yandi ta yika beno bima yina yonso ya nkaka.” (Matayo 6:33) Yandi ke zola mpenza nde nge vanda nduku na yandi. Sadila mabaku yonso sambu na kuyedisa kinduku na nge ti Nzambi. Yai kele dibaku mosi ya kuluta nene yina muntu lenda vanda ti yo.—Matayo 22:37, 38.

MAMBU YINA BIBLIA KE TUBAKA: “Yehowa . . . ke tuba nde: ‘mono ta vanda tata sambu na beno, mpi beno ta vanda bana ya babakala mpi bana ya bankento sambu na mono.’” (2 Bakorinto 6:18) Nzambi ke zola nde nge kuma nduku na yandi ya ngolo. Kisambu ta sadisa nge na kukuma nduku na yandi. Yehowa ke lomba nge na ‘kusamba ntangu yonso.’ (1 Batesalonika 5:17) Yandi ke na mpusa ya ngolo ya kuwa mabanza mpi mawi na nge ya kati. (Bafilipi 4:6) Kana nge ke samba ti dibuta na nge, bo ta mona nde Nzambi kele muntu ya kieleka sambu na nge.

Yo kele mbote na kusolula ti Nzambi, kansi nge fwete wila yandi mpi. Nge ta wila yandi kana nge ke longuka Ndinga na yandi mpi mikanda yina ke tendulaka Biblia. (Nkunga 1:1, 2) Yindulula mambu yina nge ke longuka. (Nkunga 77:12, 13) Kuwila Nzambi ke lombaka mpi nde beto kwenda na balukutakanu mbala na mbala.—Nkunga 122:1-4.

Kuzabisa bantu ya nkaka mambu ya me tala Yehowa kele mutindu ya nkaka ya kukumisa bangwisana na beto ngolo ti yandi. Kana beto ke sala mutindu yai, beto ta kwenda kibeni pene-pene na yandi.—Matayo 28:19, 20.

MAMBU YA NGE LENDA SALA:

• Konso kilumbu, baka ntangu ya kutanga Biblia mpi ya kusamba

• Beno tula mambu ya kimpeve na kisika ya ntete na dibuta na beno na ntwala ya bansaka ya kulutisa ntangu

MAMBU YINA BIBLIA KE TUBAKA: “Beno kwenda pene-pene na Nzambi, mpi yandi ta kwisa pene-pene na beno.” (Yakobo 4:8) Beno tula manaka ya lusambu ya dibuta mpi beno zitisa yo mbala na mbala. (Kuyantika 18:19) Yo ke lombaka mpi kusala mambu mingi. Nzambi fwete baka kisika na luzingu na beno ya konso kilumbu. Bangwisana ya dibuta na nge ta kuma ngolo ti Nzambi kana nge ke tuba mambu na yandi “ntangu nge ta vanda na nzo na nge, ntangu nge ta tambula na nzila, ntangu nge ta lala mpi ntangu nge ta telama na mpongi.” (Kulonga 6:6, 7, NW) Baka lukanu bonso Yozue yina tubaka nde: “Mono ti fami na mono beto ta sadilaka [Yehowa].”—Yozue 24:15.

MAMBU YA NGE LENDA SALA:

• Sala manaka ya kulonguka yina ke wakana ti bampusa ya konso muntu na dibuta