KIFWANISU kemonisa beno muntu kedinda na kati ya masa. Yau kemonana nde yandi kefwa sambu mbisi ya nene kemina yandi! Muntu yai zina na yandi Jonas. Kansi nki mesalama?

Jonas vandaka mbikudi mosi ya Jéhovah. Yau kele na nima ya lufwa ya mbikudi Eliza Jéhovah tubaka na Jonas nde: ‘Kwenda na Ninive, sambu mambi na bau mekuma tii na mono. Mpi mono kezola nde nge kuzabisa bau yau.’

Kansi Jonas zolaka ve. Na kisika ya kukwenda na Ninive, yandi kotaka na maswa yina vandaka kukwenda na ndambu yankaka. Jéhovah kuwaka makasi mutindu Jonas kutinaka. Yandi natisaka kitembo ya ngolo. Kitembo lutaka ngolo mpi maswa zolaka kudinda. Ebuna bansadi ya maswa waka boma mpi sambilaka banzambi na bau.

Jonas tubilaka bau na nsuka nde: ‘Mono kesambilaka Jéhovah, Nzambi ya zulu mpi ya ntoto. Mono ketina ntama na Jéhovah sambu mono mesala ve mambu ya yandi metinda mono.’ Bansadi ya maswa yulaka yandi nde: ‘Inki beto fwete sala nge sambu kitembo kulembama?’

Jonas tubaka nde: ‘Beno losa mono na masa mpi kitembo tamana.’ Bansadi ya maswa buyaka. Kansi bonso masa vandaka kaka kunikana mingi, bau losaka yandi na masa. Ebuna kitembo manaka mpi masa kumaka pima.

Mpila Jonas vandaka kukulumuka na masa, mbisi ya nene kuminaka yandi. Mbikudi kufwaka ve kansi yandi bikalaka kaka na kati ya mbisi bilumbu tatu. Yandi vandaka kudibanza sambu yandi kolamaka na Jéhovah na kukwenda ve na Ninive. Ebuna, nki yandi salaka?

Yandi bondilaka Jéhovah. Ebuna Jéhovah salaka na mpila nde mbisi yina kuluka mbikudi na nseke. Na nsuka Jonas kwendaka na Ninive. Keti mambu yina kesonga beto ve nde yau kele mfunu na kusala mambu yina Jéhovah ketubila beto na kusala?