BENO tala Samuel ketyamuna mafuta na ntu ya Saül. Na kidimbu yina, yau kemonana nde Saül solamaka bonso ntotila. Samuel kesala na kulungisa luzolo ya Jéhovah. Yandi kesadila mafuta ya mananasi.

Saül vandaka kudimona ya kulunga ve sambu na kuvanda ntotila. Yandi tubaka na Samuel nde: ‘Mono kele muntu ya kikanda ya Benjamin, kikanda ya kuluta fyoti, na bikanda yonso ya Israele. Sambu na nki nge ketubila mono nde mono tavanda ntotila?’ Bonso beto kemona yau, Saül vandaka kudimona ve muntu ya mfunu. Yau yina, Jéhovah yangalalaka na yandi, mpi yandi solaka Saül bonso ntotila.

Kansi, Saül vandaka ve nsukami to muntu ya mpamba. Yandi katukaka na dibuta mosi ya kimvwama. Yandi vandaka muntu ya nda mpi ya kitoko mingi, yina lutaka bana ya Israele yonso na nda! Yandi vandaka muntu ya ntinu mpi ya ngolo mingi kibeni. Bantu yangalalaka mingi ntangu Jéhovah solaka yandi bonso ntotila, mpi bau bokaka nde: ‘Ntotila oyé!’

Bambeni ya Israele vandaka kaka ngolo. Mbala mingi, bau vandaka kumonisa bana ya Israele mpasi mingi. Kaka na nima ya Saül kumaka ntotila, bantu ya Amon kwisaka kunwanisa kikanda ya Jéhovah. Kansi Saül bakaka basoda ya ngolo mpi nungaka bantu ya Amon. Bantu yantikaka na kuzola yandi ngolo sambu na mvita yina.

Ntotila Saül nungisaka bana ya Israele na bamvita yankaka dyaka mingi. Saül vandaka na mwana ya bakala na zina ya Jonathan yina vandaka ngolo. Jonathan sadisaka bana ya Israele na kununga bamvita mingi. Bantu ya Filisti vandaka bambeni ya ngolo ya bana ya Israele. Kilumbu mosi, bau kwisaka mafunda sambu na kunwanisa Israele.

Ata kigonsa vandaka, Samuel songaka na Saül na kukinga nde yandi kwisa kutambika kimenga na Jéhovah. Kansi, Samuel sukininaka. Ebuna, Saül vandaka kutita nde bantu ya Filisti tayantika bitumba, yau yina yandi tambikaka yandi mosi kimenga. Ntama mingi ve na nima na yau, Samuel kumaka, mpi yandi nganinaka ntotila sambu yandi lemfukaka ve. Yandi tubilaka Saül nde: ‘Jéhovah tasola ntotila yankaka sambu na bantu ya Israele.’

Saül kolamaka dyaka na nima. Ebuna, Samuel tubilaka yandi nde: ‘Kulemfuka na Jéhovah kuluta mbote kutambikila yandi mameme ya kitoko. Sambu nge melemfuka ve, Jéhovah takatula nge bonso ntotila na Israele.’

Na mambu yonso yai ya beto memona, beto kebaka malongi zole. Dilongi ya ntete kele nde beto fwete lemfuka kaka na Jéhovah; ya zole kele nde mbala yankaka, muntu ya mbote kekumaka muntu ya mbi. Keti beto kezola kukuma bantu ya mbi?