NA NIMA ya David yantikaka na kuyala na Yerusaleme, Jéhovah nungisaka basoda na yandi bamvita mingi. Jéhovah silaka na kupesa nsi Kana na bana ya Israele. Yau vandaka na nsungi ya David, Israele bakaka ntoto yonso ya lusilu na lusadisu ya Jéhovah.

David vandaka ntotila ya mbote, yina vandaka kuzola Jéhovah. Na nima ya kubaka Yerusaleme, mabanza na yandi ya ntete vandaka na kunata sanduku ya ngwakana kuna. Ngindu na yandi vandaka ya kutungila yau tempelo sambu na kutula yau muna.

Na nima ya bamvula, David salaka disumu ya nene. Ntotila vandaka kuvila ve nde yau kele mbi na kubaka kima ya ngani. Kansi, nkokila mosi David vandaka kutambula na mbalanda ya nzo na yandi, yandi monaka mwana-nkento mosi ya kitoko. Yau vandaka Batsabée, nkento ya Uri. Uri vandaka soda ya David.

David zolaka mingi Batsabée mpi yandi bingaka yandi na nzo na yandi. Uri vandaka na mvita. David lalaka na Batsabée, mpi na mwa bilumbu, yandi kumaka na divumu. David monaka mpasi mingi na ntima na yandi. Mpi yandi sonikaka na Joab, mfumu ya basoda na yandi sambu bau tula Uri na kisika ya mpasi na mvita, mpi yandi kufwa. Uri fwaka mpi David kwelaka Batsabée.

Mambu yina yangidikaka Jéhovah ve mpi yandi tindilaka David mbikudi Natan sambu na kusonga yandi masumu na yandi. Kifwanisu kesonga beno Natan ketubila David. David ndimaka yonso yina yandi salaka, mpi sambu na yau, Jéhovah kufwaka yandi ve. Kansi Jéhovah tubilaka yandi nde: ‘Sambu nge mesala mambu ya mbi, bampasi ya ngolo tabwa na nzo na nge.’

Ntete, mwana ya Batsabée fwaka. Na nima, Amnon mwana ya ntete ya David, taka bizumba na mpangi na yandi ya nkento Tamar. Absalom, mwana yankaka ya David waka makasi mingi mpi yandi fwaka Amnon. Na nima, Absalom kuwakanaka na bantu yankaka mpi kuditulaka ntotila. David kunungaka mvita na yandi na Absalom yina bo fwaka. Tala bampasi ya David monaka.

Na nima ya lufwa ya mwana na yandi, Batsabée butaka mwana ya bakala na zina ya Salomon. Ntangu David nunaka, mwana na yandi Adonija, yunsaka na kuditula ntotila. Ebuna David pesaka nswa na nganga-Nzambi Zadok na kupakula Salomon mafuta bonso ntotila na nima na yandi. Na nima ya mwa bilumbu, David fwaka na bamvula 70. Yandi yalaka bamvula 40. Ntangu yai, Salomon kumaka ntotila ya Israele.