KAPU 12

Yezu Kelonga Beto na Kusamba

KETI nge kesolulaka ti Yehowa Nzambi?— Yandi kezolaka nde nge solula ti yandi. Kana nge kesolula ti Nzambi, pana yo ketendula nde nge kesala kisambu. Yezu vandaka kusolula mbala mingi ti Tata na yandi ya zulu. Bantangu yankaka yandi vandaka kuzola kuvanda yandi mosi ntangu yandi vandaka kusolula ti Nzambi. Biblia ketuba nde, kilumbu mosi, ‘Yezu kwendaka yandi mosi na ndambu ya bangumba sambu na kusamba Nzambi. Ntangu mpimpa me bwa, Yezu vandaka kaka kuna yandi mosi mpamba.’—Matayo 14:23.

Na nki kisika nge le kwenda kusala kisambu na nge mosi na Yehowa?— Nge le vanda nge mosi sambu na kusolula ti Yehowa na mpimpa na ntwala ya kulala. Yezu kutubaka nde: “Kana nge ke zola kusamba, kota na suku na nge, kanga kielo, ebuna samba Tata na nge yina ke monikaka ve.” (Matayo 6:6) Keti nge kesambaka Yehowa konso mpimpa na ntwala ya kulala?— Nge fwe salaka yo.

Yezu vandaka kusamba mpi na ntangu yandi vandaka  ti bantu yankaka. Ntangu nduku na yandi Lazare kufwaka, Yezu kusambaka ti bankaka na kisika yina bo zikaka Lazare. (Yoane 11:41, 42) Yezu vandaka kusamba mpi ntangu yandi vandaka na balukutakanu ti balongoki na yandi. Keti nge kekwendaka na balukutakanu kisika bo kesalaka kisambu?— Kuna, mbuta mosi kesalaka kisambu. Nge fwe widikilaka mbotembote mambu ya yandi ketuba sambu yandi kesolulaka ti Nzambi sambu na nge. Kana nge sala mpidina, yo tasadisa nge na kutuba “Amen” na nsuka ya kisambu. Keti nge mezaba kana kutuba “Amen” na nsuka ya kisambu ketendula inki?— Yo ketendula nde nge mesepela na kisambu yina. Yo ketendula nde nge mendima yo mpi nde nge kezola nde yo vanda mpi kisambu na nge.

Yezu vandaka kusamba mpi na bantangu ya kudya. Yandi vandaka kupesa Yehowa mersi sambu na madya na yandi. Keti nge kesalaka ntangu yonso kisambu na ntwala ya kudya madya na nge?— Yo kele mbote sambu na beto na kupesaka Yehowa mersi sambu na madya na ntwala nde beto yantika kudya. Muntu yankaka le sadila beno kisambu na ntangu beno kezola kudya kumosi. Kansi nki nge tasala kana nge kedya nge mosi? To, kana nge kezola kudya kumosi ti bantu yina kepesaka ve Yehowa mersi?— Pana yo talomba nde nge sala kisambu na nge mosi.

Keti nge fwe sambaka ntangu yonso na ndinga ya ngolo? To keti Yehowa le wa nge kana nge kesala kisambu na nge na kati ya ntima?— Beto le baka mvutu na mambu yina kukuminaka Nehemia. Yandi vandaka  nsadi ya Yehowa yina vandaka kusala na nzo ya Ntotila ya Persia, Artazeresesi. Kilumbu mosi Nehemia kukumaka mawamawa mpenza sambu yandi waka nde bibaka ya Yeruzalemi, yina kuvandaka bwala ya nene ya bantu na yandi, bo bwisaka-bwisaka yo.

Ntangu ntotila kuyulaka Nehemia nde sambu na nki yandi vandaka mawamawa, Nehemia kusalaka ntete kisambu na nsi ya ntima. Ebuna, Nehemia kusongaka ntotila kikuma yina kusalaka nde yandi kuvanda mawamawa mpi yandi lombaka ntotila nde yandi kezola kukwenda na Yeruzalemi sambu na kutunga dyaka bibaka yina. Inki kusalamaka?—

Nzambi kupesaka mvutu na kisambu ya Nehemia. Ntotila kutubilaka yandi nde yandi kwenda! Nkutu Ntotila kupesaka Nehemia banti ya yandi lendaka kusadila sambu na kutunga bibaka yango. Yo kezola kutuba nde Nzambi lenda pesa mpenza mvutu  na bisambu na beto, ata beto sala yo ve na ndinga ya ngolo.—Nehemia 1:2, 3; 2:4-8.

Ntangu yai, yindula kima yai. Keti nge fwe nyekisa ntu na nge na ntangu nge kesamba? Keti nge fwe fukama? Inki nge keyindula?— Bantangu yankaka, Yezu vandaka kufukama ntangu yandi vandaka kusamba. Na bantangu yankaka yandi vandaka kusamba ya kutelema. Mpi dyaka, yandi vandaka kutombula ntu na yandi na zulu bantangu yankaka sambu na kusamba, mutindu yandi salaka ntangu yandi sambaka sambu na Lazare.

Ebuna, yo kesonga nde inki?— Yo kesonga nde kima ya meluta mfunu kele ve pozisio yina nge ke na yo na ntangu ya nge kesala kisambu. Bantangu yankaka yo kevandaka mbote nde nge nyekisa ntu na nge mpi nge kanga meso. Na bantangu yankaka, nge le fukama nkutu, mutindu Yezu kusalaka. Kansi, kuvila ve nde, beto le samba Nzambi na konso ntangu yina, na mwini to na mpimpa, mpi yandi tawila beto. Kima ya meluta mfunu na kisambu kele yai: beto fwe kwikila mpenza nde Yehowa kewaka mambu ya beto ketubilaka yandi. Keti nge kendima nde Yehowa kewaka bisambu na nge?—

Inki beto le zabisa Yehowa na kati ya bisambu na beto?— Songa munu: Ntangu nge kesambaka, inki nge kesongaka Nzambi?— Yehowa kepesaka beto bima mingi mpenza ya kitoko, yo yina beto fwe pesaka yandi mersi, mpidina ve?— Beto kepesaka yandi mersi sambu na madya yina beto kedyaka. Kansi, keti nge mepesaka yandi dezia mersi sambu na zulu ya kitoko, banti, mpi bintuntu ya kitoko?— Yandi muntu kusalaka mpi bima yai.

Kilumbu mosi, balongoki ya Yezu kulombaka Yezu nde yandi longa bo mutindu ya kusamba. Ebuna, Longi ya Nene kusalaka  yo, mpi yandi songaka bo mambu ya kuluta mfunu yina bo fwe lombaka na bisambu. Keti nge mezaba mambu yango?— Baka Biblia na nge mpi kangula na Matayo kapu 6. Banda na verse 9 tii na 13, beto kekuta kisambu yina ya bantu mingi kebingaka nde Kisambu ya Tata na Beto to ya Mfumu. Beto tanga yo kumosi.

Na baverse yai beto kebakisa nde Yezu kutubilaka beto na kusamba sambu na zina ya Nzambi. Yandi tubaka nde beto fwe samba nde zina ya Nzambi kuvanda na lukumu, to beto fwe baka yo nde yo ke ya santu. Zina ya Nzambi kele nani?— Ee, zina na yandi Yehowa, mpi beto fwe zolaka zina yango.

Ya zole, Yezu kulongaka beto na kulomba nde Kimfumu ya Nzambi kukwisa. Kimfumu yina kele mfunu sambu yo tanata ngemba na ntoto mpi yo takumisa ntoto paladisu.

Ya tatu, Longi ya Nene kutubaka nde beto fwe lomba na kisambu nde luzolo ya Nzambi kusalama na ntoto mutindu yo ke na zulu. Kana beto kesamba sambu na yo, yo kelomba mpi nde beto sala mambu yina Nzambi kezolaka.

Na nima, Yezu kulongaka beto na kusamba sambu na madya yina beto kevandaka na yo mfunu konso kilumbu. Yandi tubaka dyaka nde beto fwe lombaka Nzambi pardo kana beto mesala mambu ya mbi. Mpi beto fwe lombaka na Nzambi na kulolula beto. Kansi, na ntwala nde yandi kulolula beto, beto fwe lolulaka bankaka kana bo mesala beto mbi. Keti nge kesalaka yo kukonda mpasi?—

Nsukansuka, Yezu kutubaka nde, beto fwe sambaka nde Yehowa Nzambi kutanina beto na muntu ya mbi, Satana Dyabulu. Mambu yai yonso ke mambu ya kitoko ya beto fwe lombaka Nzambi na kisambu.

Beto fwe kwikilaka nde Yehowa kewaka bisambu na beto. Beto fwe sukaka kaka ve na kulomba yandi lusadisu, kansi beto fwe pesaka yandi mpi mersi ntangu yonso. Yandi kevandaka na kyese kana beto ketela yandi masonga na kisambu mpi kana beto kelomba yandi bima ya mbote. Yandi tapesa beto bima yango. Keti nge kekwikila mambu yai?—

Bandongisila yankaka ya mbote yina metala kisambu kele na Roma 12:12; 1 Piere 3:12; mpi 1 Yoane 5:14.

[Bifwanisu ya kele na lutiti 67]

Yezu kusambaka ntangu yandi vandaka yandi mosi . . . mpi ntangu yandi vandaka ti bantu yankaka

[Kifwanisu ya kele na lutiti 68]

Sambu na nki nge fwe landaka mbote bisambu ya bo kesalaka na balukutakanu?

[Bifwanisu ya kele na lutiti 69]

Inki ntangu nge le sala kisambu na nsi ya ntima, mutindu Nehemia kusalaka?

[Kifwanisu ya kele na lutiti 70]

Inki mambu nge le lomba Nzambi na kisambu?