KAPU 4

Nzambi Kele Ti Zina

INKI kima ya ntete nge kelutaka kuyula muntu kana nge mekutana ti yandi na mbala ya ntete?— Ntembe kele ve nde nge keyulaka zina na yandi. Beto yonso ke ti bazina. Nzambi kupesaka zina na muntu ya ntete yina kuzingaka na ntoto. Yandi pesaka yandi zina: Adami. Yandi pesaka nkento ya Adami zina: Eva.

Kansi, bantu kaka ve kevandaka ti bazina. Yindula na bima yankaka yina ke ti bazina. Kana muntu mepesa nge kiteki ya kusekinina to mbisi, nge tapesa yo zina, mpidina ve?— Ya kyeleka, kuvanda ti zina ke mfunu kibeni.

Tala ntete bambwetete mingi, mingi mpenza ya ke na zulu na mpimpa. Keti nge keyindula nde yo ke ti bazina?— Ee, Nzambi mepesaka zina na konso mbwetete yina ke na zulu. Biblia ketubila beto nde: “Yandi zaba ntalu ya bambwetete, yandi ke bingaka konso mbwetete na zina na yo.”—Nkunga 147:4.

Nani nge tatuba nde yandi ke muntu ya kuluta mfunu na inza ya mvimba?— Nzambi. Keti nge keyindula nde yandi ke ti zina?— Yezu kutubaka nde Nzambi ke ti zina. Kilumbu mosi, Yezu kutubilaka Nzambi na kisambu nde: ‘Mu longaka zina na nge na balongoki na munu.’ (Yoane 17:26) Keti nge mezaba zina ya Nzambi?— Nzambi yandi mosi kesonga beto zina na yandi. Yandi ketuba nde: ‘Mono kele Yehowa, yo yina zina na mono.’ Ee, zina ya Nzambi kele YEHOWA.—Yezaya 42:8.

Inki mutindu nge kekudiwaka kana bantu yankaka mezaba zina na nge mbote?— Keti yo kepesaka nge ve kyese?— Yehowa mpi kezolaka nde bantu kuzaba zina na yandi. Yo yina, beto fwe sadilaka zina Yehowa ntangu beto ketuba mambu ya Nzambi. Longi ya Nene kusadilaka zina ya Nzambi, Yehowa, ntangu yandi vandaka kutuba na bantu. Kilumbu mosi, Yezu kutubaka nde: ‘Nge fwete zola Yehowa Nzambi na nge, na ntima na nge yonso.’—Marko 12:30.

 Yezu kuzabaka nde “Yehowa” ke zina mosi ya mfunu mpenza. Yo yina yandi longaka balongoki na yandi na kusadila zina ya Nzambi. Nkutu yandi longaka bo na kutanga zina ya Nzambi na bisambu na bo. Yezu kuzabaka nde Nzambi kezolaka nde bantu yonso kuzaba zina na Yandi, Yehowa.

Bamvula mingi meluta, Nzambi kusongaka mfunu ya zina na yandi na Moize, yina kuvandaka muntu ya Izraele. Bana ya Izraele, yina bo vandaka kubinga bantu ya Izraele, vandaka kuzinga na insi yina bo vandaka kubinga Ezipte. Bantu ya insi yina bo vandaka kubinga bo bantu ya Ezipte. Bo kumisaka bantu ya Izraele bampika, mpi bo nyokulaka bo mpenza. Ntangu Moize kumaka mbuta, yandi zolaka kusadisa muntu na bo mosi. Dyambu yai kupesaka Farao, ntotila ya Ezipte, makasi. Yandi sosaka na kufwa Moize! Yo yina Moize kutinaka Ezipte, yandi kwendaka ntama.

Moize kwendaka na insi yankaka. Yandi kwendaka na insi ya Madiani. Moize kwelaka kuna mpi yandi yantikaka kusansa bana. Yandi salaka mpi kisalu ya kutala  mameme. Kilumbu mosi, Moize vandaka na kisalu na yandi ya kutala mameme penepene na ngumba mosi ntangu yandi monaka kima mosi ya kuyituka kibeni. Mwa-nti mosi vandaka kupela tiya, kansi yo vandaka kuzika ve! Moize kwendaka penepene sambu na kutala yo mbotembote.

Keti nge mezaba nki kusalamaka?— Moize kuwaka ndinga mosi kebinga na katikati ya mwa-nti yina vandaka kupela tiya. Ndinga yango kubingaka nde: “Moize! Moize!” Nani vandaka kubinga mutindu yina?— Nzambi muntu vandaka kubinga! Nzambi kuvandaka ti kisalu mingi ya kupesa Moize. Nzambi kutubaka nde: ‘Kwenda, munu ke tinda nge na Farao, mfumu ya Ezipte, sambu nge basisa bantu na munu yai bantu ya Izraele na insi ya Ezipte.’ Nzambi kusilaka nde yandi tasadisa Moize na kusala kisalu yai.

Kansi Moize kutubaka na Nzambi nde: ‘Yindula kana mu kwenda kutubila bantu ya Izraele na Ezipte nde Nzambi metinda munu. Kana bo yula munu nde, “Nzambi yango zina na yandi nani?” Ebuna mu tatuba inki?’ Nzambi kusongaka Moize na kutuba na bantu ya Izraele nde: ‘Muntu metinda munu na beno, zina na yandi Yehowa. Yehowa kele zina na  munu tii kuna.’ (Kubasika 3:1-15, tala noti na nsi ya lutiti) Dyambu yai kesonga nde Nzambi zolaka kutanina zina Yehowa. Yandi zolaka kusoba yo ve ata fyoti. Nzambi kuzolaka nde bantu kuzaba kimakulu zina na yandi, Yehowa.

Ntangu Moize kuvutukaka na Ezipte, bantu ya Ezipte vandaka kuyindula nde Yehowa kuvandaka nzambi mosi ya fyoti ya bantu ya Izraele. Bo vandaka kuzaba ve nde yandi vandaka Nzambi ya ntoto ya mvimba. Yo yina Yehowa kutubilaka ntotila ya Ezipte nde: ‘Mu kesala nde zina na munu kuzabana na nsi-ntoto ya mvimba.’ (Kubasika 9:16) Yehowa kusalaka mpenza nde zina na yandi kuzabana. Keti nge mezaba nki mutindu yandi salaka yo?—

Yandi sadilaka Moize sambu na kubasisa bantu ya Izraele na Ezipte. Ntangu bo kumaka na Nzadi-Mungwa ya Mbwaki, Yehowa kukangulaka nzila ya kukauka na katikati ya Nzadi-Mungwa ya Mbwaki. Bantu ya Izraele lutaka na lutaninu yonso na nzila ya kukauka. Kansi, ntangu Farao mpi basoda na yandi yonso kotaka na nzila yina ya kukauka, masa yina vandaka ya kukabwana na bandambu zole kubwilaka bantu ya Ezipte, mpi bo yonso kufwaka.

Na mbala mosi, bantu ya ntoto ya mvimba yantikaka kuwa nsangu ya mambu yina Yehowa kusalaka na Nzadi-Mungwa ya Mbwaki. Inki mutindu beto mezaba  nde bo waka mambu yango?— Bamvula kiteso ya 40 na nima, bantu ya Izraele kukumaka na Kanana, ntoto yina Yehowa kusilaka na kupesa bo. Kuna, mwana nkento mosi na zina ya Rahabi kutubilaka bantu zole ya Izraele nde: “Beto waka mutindu Mfumu Nzambi yumisaka nzadi ya Mbwaki sambu beno luta ntangu beno basikaka na nsi ya Ezipte.”—Yozue 2:10.

Bubu yai bantu mingi mpi ke mpenza bonso bantu yina ya Ezipte. Bo kekwikilaka ve nde Yehowa ke Nzambi ya ntoto ya mvimba. Yo yina, Yehowa kezola nde bantu na yandi kutubila bantu yankaka mambu na yandi. Yezu kusalaka mutindu yina. Penepene  na nsuka ya luzingu na yandi na ntoto, yandi tubilaka Yehowa na kisambu nde: ‘Mono longaka bo na kuzaba zina na nge.’—Yoane 17:26.

Keti nge kezola kuvanda bonso Yezu? Kana mpidina, tubilaka bantu yankaka nde zina ya Nzambi kele Yehowa. Nge tamona nde bantu mingi kuzaba yo ve. Kana mpidina, mbala yankaka nge le songa bo na Biblia verse ya Kubasika 3:14, noti na nsi ya lutiti. Beto kangula Biblia ntangu yai mpi beto sosa verse yango kumosi. Yo ketuba nde: ‘Nge fweti tuba mutindu yai na bantu ya Izraele: Muntu me tinda mono na beno, zina na yandi Yehowa.’

Inki mambu beto kebakisa na ntangu beto ketanga verse yai?— Ee, beto kebakisa nde Yehowa kele zina mosi ya kuluta mfunu. Yo ke zina ya Nzambi Nkwa-Ngolo Yonso, Tata ya Yezu mpi Muntu yina kusalaka bima yonso. Yibuka mpi nde Yezu kutubaka nde beto fwe zola Yehowa Nzambi na ntima na beto yonso. Keti nge kezolaka Yehowa?—

Inki mutindu beto le monisa nde beto kezolaka Yehowa?— Mutindu mosi ya beto le sadila sambu na kumonisa yo kele yai: beto fwe sosa kuzaba yandi bonso Nduku. Mutindu yankaka kele yai: beto fwe zabisaka zina na yandi na bantu yankaka. Beto le songa bo mbala mosi na Biblia nde zina na yandi kele Yehowa. Beto le tubila mpi bima ya kuyituka yina Yehowa megangaka mpi mambu ya mbote yina yandi mesalaka. Na ntangu beto kesalaka mutindu yai, Yehowa kewaka kyese mpenza sambu yandi kezolaka nde bantu kuzaba mambu na yandi. Keti beto mpi le sala kikesa sambu na kusala kisalu yina?—

Yo kele ve nde muntu yonso tazola kuwa ntangu beto tatubila yandi mambu ya Yehowa. Nkutu bantu mingi kubuyaka kuwa ata ntangu Yezu, yina ke Longi ya Nene, kutubilaka bo mambu ya Yehowa. Kansi kubuya na bo kulembisaka ve Yezu na kutuba mambu ya Yehowa.

Yo yina, beto vanda bonso Yezu. Beto landa kaka na kutuba mambu ya Yehowa. Kana beto sala mpidina, Yehowa Nzambi tasepela na beto sambu beto kemonisa nde beto kezolaka zina na yandi.

Ntangu yai, beto tanga kumosi na Biblia (NW) mwa baverse yina kesonga mfunu ya zina ya Nzambi: Yezaya 12:4, 5; Matayo 6:9; Yoane 17:6; mpi Roma 10:13.

[Kifwanisu ya kele na lutiti 27]

Keti nge mezabaka nde bambwetete yonso ke ti bazina?

[Kifwanisu ya kele na lutiti 28]

Inki dyambu ya mfunu Moize kulongukaka na mwa-nti yina vandaka kupela tiya?

[Kifwanisu ya kele na lutiti 29]

Inki mutindu Nzambi kusalaka nde zina na yandi kuzabana na Nzadi-Mungwa ya Mbwaki?

[Bifwanisu ya kele na lutiti 30]

Yezu kuzabisaka zina ya Nzambi. Keti nge le songa kisika zina ya Nzambi ke na Biblia?