KAPU 9

Beto Fwete Nwana Ti Bampukumuna

KETI muntu melombaka nge ntete na kusala kima mosi ya mbi?— Keti yandi pusaka nge na kusala yo na ngolo? To keti yandi tubaka nde yo tavanda mbote mpi nde yo tavanda ve mpenza mbi kana nge sala yo?— Kana muntu mesadila beto mambu ya mutindu yai, yandi kesosa kupukumuna beto.

Inki beto fwe sala kana bo mepukumuna beto? Keti beto fwe ndima mpi kusala mambu yina ke ya mbi?— Yo tasepedisa ve Yehowa Nzambi. Kansi, keti nge mezaba nani tasepela?— Ee, Satana Dyabulu muntu tasepela.

Satana ke mbeni ya Nzambi, Satana kele mpi mbeni na beto. Beto le mona yandi ve sambu yandi ke mpeve. Kansi yandi le mona beto. Kilumbu mosi, Dyabulu kusolulaka ti Yezu, Longi ya Nene, mpi yandi mekaka kupukumuna yandi. Beto tala mambu yina Yezu kusalaka. Ebuna, beto tazaba kima ya mbote ya beto fwe sala kana bo mepukumuna beto.

Yezu vandaka kuzola ntangu yonso kusala luzolo ya Nzambi. Yandi monisaka yo pwelele ntangu yandi bakaka mbotika na Nzadi ya Yordani. Satana sosaka na kupukumuna Yezu kaka ntangu fyoti mpamba na nima ya mbotika na Yandi. Biblia ketuba nde “zulu kangukaka” sambu na Yezu. (Matayo 3:16) Kukanguka yai ya zulu lendaka kutendula nde ntangu yai Yezu yantikaka na kuyibuka mambu yonso yina metala luzingu ya yandi vandaka na yo ntete na zulu ti Nzambi.

Na nima ya mbotika na yandi, Yezu kukwendaka na ntoto ya zelo na zelo sambu na kuyindulula mambu  yina yandi yantikaka na kuyibuka. Yandi salaka bilumbu ti bampimpa makumi iya. Na ntangu yina yonso, Yezu kudyaka ve ata kima mosi, ebuna, yandi waka nzala mingi mpenza. Satana kusosaka kupukumuna Yezu na ntangu yango yina.

Dyabulu kutubaka nde: “Kana nge kele Mwana-Nzambi, tuba na matadi yai, yo kuma mampa.” Ya kyeleka, mampa yango zolaka kuvanda ntomo mpenza! Kansi keti Yezu zolaka kukuka na kubalula matadi yo kuma mampa?— Ee, yandi zolaka kukuka. Sambu na inki? Sambu Yezu, Mwana ya Nzambi, kuvandaka ti ngolo ya mitindu mingi ya Nzambi kupesaka kaka na yandi mosi.

Keti nge zolaka kubalula ditadi sambu yo kuma dimpa kana Dyabulu kulombaka nge na kusala yo?— Yezu kuvandaka ti nzala. Ebuna, keti yo zolaka kuvanda ve mbote nde yandi kusala yo ata mbala mosi?— Yezu kuzabaka nde yo vandaka mbi na kusadila bangolo na yandi na mutindu yina. Yehowa kupesaka yandi bangolo yina sambu na kubenda bantu na Nzambi, kansi sambu na yandi mosi ve.

Yo yina, na kisika ya kusala yo, Yezu kutubilaka Satana mambu yina ke ya kusonika na Biblia nde: ‘Muntu kezingaka kaka ve sambu na mampa ya yandi kedyaka, kansi yandi kezingaka mpi sambu na mambu yina yonso ya Nzambi ketubaka.’ Yezu kuzabaka nde kusala mambu yina kesepedisaka Yehowa ke mfunu mingi kuluta kuvanda ti bima ya kudya.

Kansi, Dyabulu kumekaka yandi dyaka. Yandi nataka Yezu na Yeruzalemi mpi yandi  tedimisaka yandi na zulu mpenza ya tempelo. Ebuna Satana kutubaka nde: ‘Kana nge kele Mwana-Nzambi, nge kudilosa na ntoto. Sambu bo sonikaka na Mukanda ya Nzambi nde bawanzyo ya Nzambi tanata nge na maboko na bo.’

Sambu na nki Satana kutubaka mambu yai?— Yandi tubaka yo sambu na kupukumuna Yezu na kusala dyambu mosi ya buzoba. Kansi, na mbala yai mpi Yezu kuwilaka ve Satana. Yandi tubilaka Satana nde: “Bo sonikaka mpi na Mukanda ya Nzambi nde: ‘Kumeka Mfumu Nzambi na nge ve.’” Yezu kuzabaka nde kutula luzingu na yandi na kigonsa sambu na kumeka Yehowa kuvandaka kima mosi ya mbi.

Kansi, Satana kuyambulaka kaka ve. Na nima yandi nataka Yezu na zulu ya ngumba mosi ya nda mpenza. Ntangu bo kumaka kuna, yandi songaka Yezu bimfumu yonso, to baluyalu ya ntoto ti lukumu na yo. Na nima Satana kutubilaka Yezu nde: “Yai yonso ya nge ke mona, mono ta pesa nge yo kana nge fukama sambu na kusamba mono.”

Yindula fyoti sambu na yina metala bima ya Dyabulu zolaka kupesa Yezu. Keti bimfumu yai yonso, to baluyalu ya bantu ke mpenza ya Satana?— Na kutuba ya mbote, Yezu kutulaka ve ntembe nde bima yina kuvandaka mpenza ya Satana. Sambu kana yo vandaka ve ya Satana, Yezu zolaka kutuba yo. Ya kyeleka, Satana kele mfumu ya makanda yonso ya nsi-ntoto. Nkutu Biblia kebinga yandi “mfumu ya nsi-ntoto yai.”—Yoane 12:31.

Inki nge zolaka kusala kana Dyabulu kusilaka nge nde yandi tapesa nge kima mosi kana nge samba yandi?— Yezu kuzabaka nde kusambila Dyabulu ke kima mosi ya mbi ata yo zolaka kunatila Yandi kima mosi ya mfunu. Yo yina Yezu kutubaka nde: ‘Katuka, Satana! Sambu Biblia ketuba nde nge fweti samba Mfumu Nzambi, Nzambi na nge. Kaka yandi mpamba nge fweti samba!’—Matayo 4:1-10; Luka 4:1-13.

Beto mpi kekutanaka ti bampukumuna. Keti nge mezaba ndambu ya bampukumuna yango?— Mbandu mosi yo yai. Mama na nge le sala bagato ya kitoko mpenza sambu na kudya na nima ya madya. Yandi le songa nge nde kudya ve ata gato mosi tii kuna ntangu ya kudya talunga. Kansi nge ke wa nzala mpenza, ebuna ntima kepukumuna nge nde dya yo. Keti nge talemfukila  mama na nge?— Kansi Satana kezola nde nge lemfukila ve mama na nge.

Yibuka Yezu. Yandi mpi kuvandaka ti nzala mpenza. Kansi yandi zabaka nde kusepedisa Nzambi kuvandaka mfunu kuluta kudya. Nge tasonga nde nge ke bonso Yezu kana nge kesala mambu yina ya mama na nge ketubaka.

Mbala yankaka bana yankaka le lomba nge na kunwa mwa bambuma ya nkisi mosi buna. Bo le songa  nge nde nge takudiwa mbote mpenza. Kansi bambuma ya nkisi yango le vanda bambuma yina kelausaka. Yo le bedisa nge mingi mpenza to nkutu kufwa nge. To muntu le pesa nge dikaya, yina kele mpi ti bima ya kelausaka na kati, ebuna yandi kepusa nge na kunwa yo. Inki nge tasala?—

Yibuka Yezu. Satana kulombaka yandi nde yandi pumbuka katuka na zulu ya tempelo tii na ntoto sambu na kutula luzingu na yandi na kigonsa. Kansi Yezu kubuyaka na kusala yo. Inki nge tasala kana muntu kupusa nge na kusala kima mosi ya kigonsa?— Yezu kulemfukilaka ve Satana. Nge mpi kulemfuka ve ata fyoti na muntu yina kesosa kupusa nge na kusala mambu ya mbi.

Kilumbu yankaka bo le lomba nge na kusambila kifwanisu mosi, dyambu mosi yina Biblia ketuba nde beto fwe sala yo ve. (Kubasika 20:4, 5) Bo le lomba nge na kusala yo na feti mosi na nzo-nkanda. Bo le songa nge nkutu nde kana nge buya na kusala yo, bo takula nge na nzo-nkanda. Inki nge tasala?—

Yo kevandaka pete na kusala mambu ya mbote kana bantu yonso kesala yo. Kansi, kusala mambu ya mbote le vanda mpasi mpenza kana bankaka kepusa beto na kusala mambi. Bo le tuba nde mambu ya bo kesala ke kwa yo mbi ve. Kansi ngyufula ya mfunu kele yai, Inki Nzambi ketuba sambu na yo? Yandi mezaba mambu yina ke mbote mpenza.

Yo yina, ata bantu yankaka ketuba konso nki mambu yina, beto fwe salaka ve ata fyoti mambu yina Nzambi ketuba nde yo ke mbi. Kana beto kesala mutindu yina, beto tapesaka Nzambi kyese ntangu yonso, mpi beto tasepedisa ve Dyabulu ata fyoti.

Nge le zwa mambu yankaka mingi ya ketubila mutindu ya kunwana ti bampukumuna ya kusala mambi na Nkunga 1:1, 2; Bingana 1:10, 11; Matayo 26:41; mpi 2 Timoteo 2:22.

[Kifwanisu ya kele na lutiti 52]

Ziku Yezu yantikaka na kuyibuka nki mambu na ntangu yandi bakaka mbotika?

[Kifwanisu ya kele na lutiti 53]

Inki mutindu Dyabulu kusadilaka matadi sambu na kupukumuna Yezu?

[Kifwanisu ya kele na lutiti 55]

Sambu na nki Satana kubakaka kikesa ya kusonga Yezu nde yandi tapesa yandi bimfumu yai yonso?

[Bifwanisu ya kele na lutiti 55]

Inki nge tasala kana bo mepukumuna nge?

[Kifwanisu ya kele na lutiti 56]

Sambu na nki yo kele mbi na kusadila bifwanisu na kusamba?