Mpangi-nkento mosi ya toko na zina ya Nicole ya ke zingaka na Colombie ke tuba nde: “Mono ke zolaka Nzo ya Kimfumu na beto. Yo kele kisika yina mono ke kutanaka ti bampangi na mono Bakristu.” Keti nge ke kudiwaka mpi mutindu yina?

 Na ntoto ya mvimba, Bambangi ya Yehowa ke vukakana na Banzo ya Kimfumu kiteso ya 63 000. Banzo yango ya Kimfumu ke sadisaka beto na kusambila Nzambi na bisika ya mbote. Kansi yo me suka ve pana. Mpangi David yina kele mupasudi-nzila ya ntangu yonso na Colombie ke tuba nde: “Banzo na beto ya Kimfumu ke salaka nde bantu kusepela diaka mingi ti malongi na beto. Bantu mingi yina ke kwisaka ke yitukaka ntangu bo ke monaka mutindu beto ke taninaka yo mbote.” Yo ke salamaka ve kaka yo mosi. Beto ke salaka kisalu ya ngolo sambu na kutula bunkete na Banzo na beto ya Kimfumu mpi kutanina yo. Inki ke sadisaka beto na kusala bisalu yango?

 Mabundu yina ke sadilaka Nzo ya Kimfumu mosi buna bantu kele ti mukumba ya kutanina yo. Sambu na yo, bampangi-babakala mpi bankento ke tulaka mbala na mbala bunkete na Nzo ya Kimfumu ya bo ke sadilaka. Bo ke salaka mpi bisalu yina ke salaka nde Nzo ya Kimfumu kubeba ve nswalu mpi bisalu ya nkaka ya fioti-fioti.

 Sambu na kusadisa mabundu na kutanina Banzo ya Kimfumu yina bo ke sadilaka, Biro Yina Ke Talaka Mambu ya Kutunga (LDC), ke pesaka bampangi-babakala mukumba ya kuvanda bantu yina ke pesaka bampangi ya nkaka formasio na yina me tala kutanina Banzo ya Kimfumu. Konso mpangi ya ke pesaka formasio ke talaka Banzo ya Kimfumu 6, 7, 8, 9 to 10. Yandi ke kwendaka kutala yo mpi yandi ke pesaka bansamuni formasio na mabundu na bo sambu bo zaba mutindu ya kuyidika Nzo na bo ya Kimfumu. Na nima ya bamvula tatu, yandi ke vutukaka sambu na kutala konso Nzo ya Kimfumu sambu na kuzaba kana yo ke tula luzingu ya bantu na kigonsa to kana yo ke lomba kuyidika bisika ya nkaka.

 Bampangi na beto ya babakala mpi ya bankento ke sepelaka mingi ti formasio yina bo ke bakaka ntangu bampangi yango ke kwendaka kupesa bo yo. Mpangi-nkento Indhumathi ya ke zingaka na Inde ke tuba nde: “Formasio yango vandaka mpenza kitoko. Mono waka kiese mingi na kulonguka mutindu ya kusala nde Nzo ya Kimfumu na beto kulanda kuvanda mbote.” Mpangi-bakala Evans ke zingaka na Kenya. Yandi ke tuba nde: “Beto longukaka mutindu beto lenda sala na mpila nde mbongo kubasika ve mingi na nsadisa ya bisalu fioti-fioti yina ke sadisaka sambu bima kubeba ve ngolo.”

 Mbongo yina lenda basika na mvula mosi sambu na kusadila Nzo ya Kimfumu mosi mpi kutanina yo lenda baka bamilio ya badolare a na kutadila kisika nzo yango ya Kimfumu kele, bamvula yina yo me sala, mpi mingi ya mabundu yina ke sadilaka yo. Kansi mbongo yango ke katukaka na wapi?

 Bisalu ya ke salamaka sambu na kutanina Banzo ya Kimfumu me simbama na makabu yina bampagi ke pesaka. Mpangi-bakala mosi na zina ya Alexandre ya ke zingaka na Kazakhstan ke tuba nde: “Beto ke sadilaka ndambu ya mbongo sambu na kuvanda ti Internet mpi bima ya nkaka ya mfunu mu mbandu, masa ti kura. Ndambu ya nkaka ya mbongo, beto ke sadilaka yo sambu na kusumba bima ya kusadila mu mbandu, bapapie ya kudipila bima, bagan, bima yina bo ke yobisilaka banzo mpi pintire.” Mbongo yina ke bikalaka, bo ke tindaka yo sambu na bisalu yina ke salamaka na ntoto ya mvimba sambu yo sadisa na bisalu ya nene mpi kutanina banzo ya Kimfumu, yina ke salamaka na ntoto ya mvimba mpi ya ke lombaka mbongo mingi.

 Kana yo ke lomba nde bampangi kusadila mbongo mingi kuluta mbongo yina bo ke sadilaka bangonda zole to tatu sambu na kusala bisalu ya kutanina Nzo ya Kimfumu mosi, bankuluntu fwete solula ti mpangi ya Biro Yina Ke Talaka Kisalu ya Kutunga yina ke pesaka bampangi formasio. Kana biro yina me ndima nde bo sala kisalu yina, mbongo ya bo ta sadila ta katuka na mbongo ya makabu yina bampangi ke pesaka sambu na bisalu yina ke salamaka na ntoto ya mvimba. Na mvula ya kisalu 2023, bo salaka bisalu 8 793 ya mutindu yai. Yo lombaka mbongo 76.6 milio ya badolare. Beto baka bambandu zole.

 Na Angola, Nzo mosi ya Kimfumu vandaka me sala dezia bamvula 15 mpi yo vandaka kulomba kusala bisalu mingi. Yo vandaka kulomba kukatula bansinga ya kura ti bima ya nkaka ya kura mpi kutula ya mpa. Bibaka vandaka ti banzila, mpi bantu yina banzo na bo ke vandaka pene-pene ya Nzo yina ya Kimfumu vandaka kutuba nde masa ya mvula vandaka kukotila bo na banzo. LDC salaka manaka sambu na kuyidika Nzo yina ya Kimfumu. Bo basisaka mbongo ya badolare 9 285 sambu na kusala kisalu yina. Bantu yina banzo na bo ke vandaka pene-pene ya Nzo yina ya Kimfumu pesaka mersi mingi mpi bo yitukaka na kumona mutindu kisalu yina salamaka.

 Na Pologne, ludi ya Nzo mosi ya Kimfumu vandaka kutanga mpi tapi ya Nzo yina ya Kimfumu bebaka mingi mpila ya kuyidika yo vandaka ve. LDC ndimaka nde bo yidika ludi mpi bo tula tapi ya nkaka. Bo babasisaka mbongo ya badolare 9 757 sambu na kusala bisalu yina. Bisalu yina me sala nde Nzo ya Kimfumu yina ta sala bamvula mingi kukonda kulomba nde bo sala kisalu ya nene ya kuyidika yo diaka.

 Kisalu ya kutanina Banzo ya Kimfumu ke salaka nde, beto sadila mbongo ya makabu mbote mpi yo ke pesaka Yehowa lukumu. Mpangi-bakala mosi na zina ya Shaun ya ke zingaka na Tonga ke tuba nde: “Kisalu na beto ya kutanina Nzo ya Kimfumu ke salaka nde beto sambila Yehowa na Nzo ya Kimfumu ya bunkete, yina mambu yonso kele na ndonga mpi ya mambu yonso kele mbote, sambu Nzo ya Kimfumu ke salaka nde bantu ya kisika yina kuvanda ti mabanza ya mbote sambu na zina ya Yehowa. Beto ke vandaka na kiese ya kubingisa bantu na Nzo na beto ya Kimfumu.”

 Beto yonso, beto lenda tulaka bunkente na kisika ya beto ke sambilaka Yehowa mpi kusala bisalu yina ke salaka nde, kisika yango kubeba ve nswalu. Marino ke pesaka bampangi formasio na yina me tala bisalu yina yo ke lombaka kusala sambu na kutanina Nzo ya Kimfumu. Yandi ke zingaka na Australie. Yandi ke tuba nde: “Beto yonso, beto lenda sala kima mosi na yina me tala kubaka bunkente ya Banzo na beto na Kimfumu. Kana beto sala mutindu yina, beto ta sadisa kibeni mingi sambu na kusadila mbongo ya makabu mbote mpi kusala nde, bo sadila yo na bisika yina mpusa kele kibeni.”

 Joel kele mpangi-bakala mosi ya ke zingaka na Inde. Yandi ke sepelaka kusala bisalu yina ke salaka nde Nzo na bo ya Kimfumu kubeba ve nswalu. Yandi ke tuba nde: “Kusala ti bampangi na mono ke sadisaka mono na kumona na mabanza mutindu beto ta salaka kisalu na nsi-ntoto ya mpa.” Nicole yina beto tubilaka na mwa zulu ke tuba nde: “Ntama mingi ve, mono me katuka kusadisa na kudipa masa na ntoto ntangu bampangi vandaka kuyidika kisika mosi ya vandaka kutanga na kisika ya kuyobidila masa. Ata mono yidikaka ve kisika yina, mono sadisaka sambu ata kigonsa mosi kusalama ve.”

 Kana nge ta zola kuvanda volontere sambu na kupesa maboko na kisalu yina bo ke salaka sambu na kutanina Nzo na beno ya Kimfumu, solula ti bankuluntu ya dibundu na beno. Katula yo, makabu yina nge ke pesaka ke sadisaka na kusala bisalu yina ke taninaka Nzo na beno ya Kimfumu. Kansi yo ke sadisaka mpi na kusala bisalu ya mutindu yina na Banzo ya nkaka ya Kimfumu na ntoto ya mvimba. Nge lenda tula makabu yina na bakesi ya makabu yina kele na Nzo na beno ya Kimfumu to na nzila ya donate.jw.org. Beto ke pesa beno mersi mingi sambu na kikalulu na beno ya kukaba.