Bambangi ya Yehowa me bikalaka ntete ve kubaka na kiteso ya mingi mutindu yai bavideo mpi mikanda yina ke tendulaka Biblia yina bo lenda sadila na ba-apareyi. Kansi na bansi mingi na ntoto ya mvimba, bampangi na beto kele ve ti makuki ya kusadila Internet. Na bansi ya nkaka, Internet ke vandaka malembe mingi to nkutu yo ke vandaka ve.

 Ata mpidina, bampangi na beto ya babakala mpi ya bankento lenda baka ntangu yai mikanda yina bo lenda tanga na ba-apareyi ata kisika yina bo kele Internet ke vandaka ve. Yo ke salama nki mutindu?

 Organizasio me tindila mabundu yina ke vandaka na babwala yina Internet ke vandaka mpasi ka-apareyi mosi. Zina na yo JW Box. Yo kele ti kima mosi na kati (routeur). Bo sumbaka kima yango na kompani mosi buna. Yo kele mpi ti programe mosi (logiciel) na kati yina bampangi ya departema mosi ya Betele (service informatique) yidikaka. Diaka na kati na yo, kele mpi ti mikanda mpi bavideo yina bo ke tulaka na jw.org. Bo sumbaka ka-apareyi JW Box mosi na kiteso ya badolare 75.

 Na Nzo ya Kimfumu, bampangi-bakala mpi bankento ke kangulaka wifi ya batelefone to ya batablete na bo sambu na kubaka mikanda mpi bavideo yina kele na JW Box. Yo vanda bampangi kele ti ba-apareyi ya ntama to ba-apareyi yina kele ve ntalu, bo lenda baka mpi bavideo ti mikanda na kisadilu yai. Kansi kana dibundu mosi kele ve ti mpila ya kusadila Internet, inki mutindu bo lenda tula mikanda mpi bavideo ya mpa na JW Box na bo? Mbala na mbala, Betele ke tindaka bisadilu mosi ya fioti (clés USB) yina ke vandaka ti mikanda yina me katuka kubasika ya kele na jw.org. Na nima, bo ke sadilaka JW Box sambu bampangi kubaka mikanda mpi bavideo ya kele na kati ya kisadilu yai ya fioti (clés USB). Kisadilu yango mosi ya fioti (clés USB) kele ntalu kiteso ya badolare 4.

 Inki mutindu JW Box me sadisaka bampangi na beto? Nathan Adruandra kele tata ya dibuta. Yandi ke zingaka na République démocratique du Congo. Yandi ke tuba nde: “Mono vandaka kumeka kubaka drame ‘O Yehowa, Mono Ke Tudila Nge Ntima’ mpi drame ‘Beno Yibuka Nkento ya Loti’ kansi mono vandaka kukuka ve. Yo vandaka kulembisa mono nitu. Kansi bubu, mono lenda baka bavideo yina mpi kutula yo na telefone na mono. Yo ke sadisaka mono na kulonga bana na mono mbote.”

 Mpangi-bakala mosi ya ke sadisaka mabundu na Nigéria na kuzaba mutindu ya kutula ka-apareyi JW Box tubaka nde: “Sambu na bampangi ya babakala mpi ya bankento, JW Box kele kibeni dikabu ya Yehowa. Ntangu yai bo kele kibeni na kiese ya kubaka kukonda mpasi mikanda mpi bavideo yina kele na Bisadilu Sambu na Kulonga.”

 Organizasio me tindaka tuba-apareyi (JW Box) na mabundu ya Afrika, ya Océanie mpi ya Amérique du Sud. Organizasio ke yidika mpi mambu sambu na kutinda yo mpi na bansi mingi ya nkaka diaka. Mbongo sambu na kusala mambu yai ke katukaka na wapi? Yo ke katukaka na makabu yina bampangi ke pesaka sambu na kusala kisalu yai na ntoto ya mvimba. Mbala mingi, bampangi ke pesaka makabu yango na nzila ya Internet na donate.jw.org. Beto ke pesa beno mersi mingi sambu na kikalulu na beno ya kukaba.