Banda bamvula kuluta 130, Bambangi ya Yehowa ke vukanaka na balukutakanu ya distrike ya konso mvula. Bubu yai, bamanaka yai ke vandaka ti badiskure kuluta 40. Katula yo, bamanaka yango ke vandaka ti miziki, ba-interview mpi bavideo. Sambu bantu ya ke landa yo kubakila yo mambote mpi kubaka kikesa, bo fwete ‘wa mpi kumona’ yo mbote-mbote. (Luka 2:20) Inki mutindu bo ke sadilaka makabu na nge sambu na kusadisa bantu yonso na kubaka mambote ya balukutakanu ya distrike yo vanda bo ke zingaka na wapi?

 Bastade mingi ya bilumbu yai na bansi ya mputu kele dezia ti bisadilu na yo ya audio/video. Ebuna ntangu beto ke futilaka bisika yai sambu na Lukutakanu ya distrike, sambu na nki beto ke tulaka bisadilu na beto mosi ya audio/video? Mpangi David yina ke sadilaka Yehowa na Departema ya Jw Télédiffusion na Babiro na Beto ya Ke Twadisaka Kisalu na Ntoto ya Mvimba ke tuba nde: “Bisika fioti mpamba na kati ya bisika yina beto ke futilaka me salamaka na mpila nde bantu yina ta kwisa kulanda mbote-mbote sambu na bangunga kuluta sambanu bampangi yina ta sala badiskure. Mu mbandu, bastade ke vandaka ti bisadilu ya audio/video yina ke vandaka kaka sambu na kupesa bansangu ya nkufi mpi kutula bitini ya miziki. Baekran ya bastade yina ke songaka kaka ntalu ya babi yina ke kotaka, bapiblisite mpi yo ke vutukilaka ba-aksio yina lutaka. Kansi beto, beto ke zolaka nde bantu yina ke landa manaka, bo landa bavideo ya nda, bo wa mpi bo bakisa mbote-mbote konso ngogo yina bampangi ya ke sala masolo ke tuba.”

 Bisika ya lukutakanu ya distrike me swaswana. Yo yina beto ke sadilaka bisadilu ya audio/video ya kuswaswana na kutadila konso kisika. Kana beto me pona kisika mosi buna, departema ya Jw Télédiffusion ya Betele ya insi yina lukutakanu yango ta salama ke ponaka bisika yina bantu ya ta landa manaka yango ta vanda na kutadila mingi ya bantu mpi nene ya kisika yango. Na nima ya kusala bakalkile, bampangi ke bakaka lukanu na yina me tala kisika ya bo fwete tula ba haut-parleurs, ba-ekran mpi inki mutindu bo ta vukisa bisadilu yina yonso. Na nima, bo ke salaka lisiti ya ba-apareyi yonso ya bo kele na yo mfunu sambu bantu yonso ya ta landa lukutakanu kulanda mpi kutala manaka.

 Kusadila bisadilu ya audio/video ke vandaka diaka mpasi na bisika yina manaka ya balukutakanu ya Distrike ta salama na bandinga mingi. Kana bo ke balula manaka na ndinga ya nkaka, bantu yina ke balula yo fwete mona mpi kuwa manaka. Na nima, bo ke lutisaka mambu yina bo ke balula na nzila ya bashene ya radio sambu na bantu yina ke bakisaka ndinga yango. Na nsadisa ya bisadilu ya mbote ya kutangila bifwanisu mpi bima ya kuwidikila, bantu yonso lenda landa ndinga mpi kumona bizuzi na ntangu mosi ata bo ke lutisa manaka ya kuwidikila na bandinga nana. Mpangi David ke tuba nde: “Kusadila bisadilu yai kele mpasi mpi bavolontere yina ke sadila yo fwete baka formasio ya mbote kibeni.”

 Babetele ya bansi mingi ke vandaka ti bisadilu ya audio/video mpi bo ke sadilaka yo konso mvula. Na bansi yina, bampangi-babakala ke yidikaka mambu sambu na kukatula ba-apareyi ya kusadila na kisika yina yo vandaka mpi kunata yo na kisika ya nkaka ya bo ta sala lukutakanu. Betele ya États-Unis mpamba, ke sadilaka mbongo ya badolare pene-pene ya 200 000 a kuluta konso mvula sambu na kutinda bisadilu ya lukutakanu ya Distrike. Kansi, yo kele ntalu ya fioti kana bo fwanisa yo ti mingi ya mbongo yina yo lenda lomba sambu na kusumba bisadilu ya nkaka. Mpangi Steven, yina twadisaka ekipe ya audio/video na lukutakanu ya distrike yina salamaka na Canada ke tuba nde: “Ekipe na beto ya audio/video salaka yonso sambu na kuzikisa nde bo kele ti konso écrou, boulon, nsinga mpi konso kima ya nkaka mpi nde yo kele ya mbote, ya kukanga mbote mpi ya kuyidika dezia sambu na kusadila yo na lukutakanu ya nkaka.”

 Kudefa bisadilu ya audio/video ke lombaka mbongo mingi mpi mbala mingi, yo ke vandaka ve ya mbote mpi bo ke yidikaka yo ve mbote. Yo yina mbala mingi, beto ke sumbaka bisadilu yina beto kele ti mfunu na yo. Bubu yai, ekran LED mosi ya kele nda bametre tanu mpi nene bametre tatu kele ntalu kiteso ya 24 000 dolare. Nsinga mosi (câble) ya mikro ya bametre 15 kele ntalu kiteso ya 20 dolare. Yo yina, Departema ya Télédiffusion ke solulaka ti Departema ya ke Sumbaka Bima sambu na “kutadila mbongo yina yo ta lomba” na ntwala ya kusumba konso kisadilu yina. (Luka 14:28) Mu mbandu, bo ke kudiyulaka nde: “Bisadilu yai ta natila bantu ikwa mambote? Keti kusumba bisadilu ya mpa kele kima ya kuluta mbote yina yo ke lomba kusala? Keti beto kele ti kisika ya mbote ya kubumba bisadilu yango? Keti beto kele ti bisadilu ya nkaka mpi bavolontere ya me bakaka formasio sambu na kuyidikaka yo sambu yo beba ve nswalu?”

 Sambu na kusadila bisadilu ya audio/video bamvula mingi mpi beto bumba mbongo, beto ke yidikaka bisadilu yina mbala na mbala. Katula yo, beto ke kotisaka bisadilu yina na bakesi ya ngolo ntangu beto ke tindaka yo sambu yo beba ve, mpi beto ke yidikaka bakesi yango kana yo me beba.

 Bantu yina kele ve Bambangi ya Yehowa yitukaka na kumona bisadilu ya audio/video yina beto sadilaka na balukutakanu ya distrike. Mu mbandu, na lukutakanu mosi ya distrike, muntu mosi ya ke salaka na mosi ya bakompani ya nene ya audiovisuel monisaka nde manaka mpi bavideo yina vandaka ya mbote kibeni. Mpangi Jonathan yina pesaka maboko sambu na kutula bisadilu ya audio/video na balukutakanu ya distrike mpi kuzikisa nde yo ke sala mbote ke tuba nde: “Yandi yitukaka ngolo ntangu yandi zabaka nde bampangi yina vandaka kusala na ekipe na beto, bo vandaka bo yonso bavolontere kansi ve bantu ya me longukaka mambu mingi sambu na yo. Na yina me tala kisalu ya kutula bisadilu yina, yandi tubaka nde, kisalu yina ya beto salaka kilumbu mosi ti ndambu zolaka kusalama na bilumbu tanu kana yo vandaka kompani na bo.” Na lukutakanu ya nkaka ya distrike, muntu yina ke twadisaka mambu ya kisika yina bampangi futilaka mbongo sambu na kusala lukutakanu tubaka nde: “Bantu mingi ya me tangaka mambu ya miziki mpi bavideo me lutaka awa, kansi mono me monaka ntete ve bantu ke sala mambu mbote kibeni mutindu yai mpi ya ke zaba mbote kima ya bo ke sala!”

 Inki mambote bisadilu ya audio/video ya lukutakanu ya distrike me natilaka nge? Mbala ya nkaka nge ke kudiwaka bonso mpangi David, yina katukaka na Angleterre. Yandi ke tuba nde: “Mono kele ti bamvula 88 mpi mono ke kwendaka na balukutakanu ya distrike luzingu na mono ya mvimba. Kansi bubu, mono me tula dikebi ya mingi na malongi kuluta bambala ya nkaka. Na nsadisa ya bavideo ya kitoko, manaka ke luta nswalu mpi malongi ke basika pwelele mpi na mutindu ya me fwana.” Mpangi Micheal, yina ke zingaka na Nigéria, ke tuba nde: “Yo kele diaka ve mpasi sambu bampangi kuwa muntu ya ke longa to kutala bavideo, yo ke sadisa bo na kulanda ti dikebi yonso mpi kutula mabanza na bo kaka na manaka ntangu yo ke salama.”

 Na mvula yai, ntangu nge ta kwenda na lukutakanu ya distrike to ya sipesiali ya kele ti ntu-diambu “Zabisa Nsangu ya Mbote,” baka ntangu ya kuyindula bisalu yonso yina me salama sambu na kusadisa nge na kulanda mpi na kumona mbote manaka. Beto ke pesa nge mersi sambu na makabu na nge, yo vanda yina nge ke pesaka na nzila ya donate.jw.org. Yo me sadisa sambu bisalu yai kusalama mbote. Matondo mingi.