Yehowa, “Nzambi ya kiese,” ke zolaka nde beto vanda na kiese na kisalu ya kulonga nsangu ya mbote. (1Tm 1:11) Kiese na beto ta kuma mingi kana beto ke sala ngolo sambu na kuyedisa mayele na beto ya kulonga. Kuyula bangiufula lenda pusa bantu na kutula dikebi mpi yo kele mayele ya mbote ya kusadila sambu na kuyantika disolo ti muntu. Bangiufula ke pusaka bantu na kuyindula. (Mat 22:41-45) Kana beto ke yula bangiufula mpi ke widikila mvutu ya muntu, yo ta vanda bonso nde beto ke songa yandi nde yandi kele mfunu sambu na beto. (Yak 1:19) Mvutu yina muntu ta pesa lenda sadisa beto na kuzaba mutindu ya kusolula ti yandi mbote.

SONGA VIDEO VANDA NA KIESE NA KISALU YA KUKUMISA BANTU BALONGOKI MPI TOMISA MAYELE NA NGE YA KULONGA—SADILA BANGIUFULA, MPI NA NIMA BENO PESA BAMVUTU NA BANGIUFULA YAI:

• Inki bikalulu ya mbote Jade monisaka?

• Inki bangiufula Neeta yulaka sambu na kumonisa nde yandi ke tudila muwi dikebi?

• Inki bangiufula Neeta yulaka sambu na kupusa Jade na kutula dikebi na nsangu ya mbote?

• Inki bangiufula Neeta yulaka sambu na kupusa Jade na kuyindula?