Bampasi lenda lembisa beto nitu, mingi-mingi kana yo ke baka ntangu mingi. Davidi zabaka nde bampasi yina yandi vandaka kukutana ti yo mpi yina Ntotila Saule vandaka kupesa yandi, yo ta suka mpi nde yandi ta kuma ntotila mutindu Yehowa tubaka. (1Sa 16:13) Lukwikilu ya Davidi sadisaka yandi na kuvanda ntima-nda mpi na kuvingila nde Yehowa kuyidika mambu.

Kana beto ke kutana ti mpasi mosi buna, beto lenda tadila mambu na mutindu ya mbote, kusadila mayele to makuki na beto ya kuyindula sambu na kumanisa mpasi yina. (1Sa 21:12-14; Bin 1:4) Kansi, yo lenda vanda mpasi nde beto manisa bampasi ya nkaka ata beto me sala yonso yina yo lombaka nde beto sala na kuwakana ti minsiku ya Biblia. Kana beto me kutana ti diambu ya mutindu yai, beto fwete monisa ntima-nda mpi kuvingila Yehowa. Kubika fioti, yandi ta manisa bampasi na beto mpi yandi “ta kusula mansanga yonso” na meso na beto. (Kus 21:4) Yo vanda bampasi na beto me mana sambu Yehowa muntu me manisa yo to sambu na bikuma ya nkaka, kima ya masonga kele nde: Konso mpasi ke vandaka ti nsuka na yo. Kuzaba mpidina lenda pesa beto kikesa.

SONGA VIDEO BANTU YA KELE NA BUMOSI NA NSI-NTOTO YA KUKABWANA, MPI NA NIMA BENO PESA BAMVUTU NA BANGIUFULA YAI:

• Inki bampasi bampangi mingi kutanaka ti yo na Sudi ya États-Unis?

• Inki mutindu bo monisaka ntima-nda mpi zola?

• Inki mutindu bo landaka kutula dikebi na “mambu ya kuluta mfunu”?—Fil 1:10