Yozue 17:1-18
17 Ebuna na nima ya kubula zeke,+ bo pesaka ntoto na dikanda ya Manase+ sambu yandi vandaka mwana ya ntete ya Yozefi.+ Sambu Makire,+ mwana ya ntete ya Manase mpi tata ya Gileadi, vandaka muntu ya bitumba, yandi bakaka Gileadi mpi Bashani.+
2 Mpi na nima ya kubula zeke, bo pesaka ntoto na bana ya Manase yina bikalaka na kutadila mabuta na bo, sambu na bana ya Abi-ezere,+ bana ya Eleki, bana ya Asriele, bana ya Shekemi, bana ya Hefere, mpi bana ya Shemida. Bayai vandaka bana ya Manase mwana ya Yozefi, bana-babakala na kutadila mabuta na bo.+
3 Kansi Selofehadi+ mwana ya Hefere, mwana ya Gileadi, mwana ya Makire, mwana ya Manase, vandaka ve ti bana-babakala, kaka bana-bankento, mpi yai bazina ya bana na yandi ya bankento: Mala, Noa, Ogla, Milka, mpi Tirsa.
4 Yo yina bo kwisaka na ntwala ya nganga-nzambi Eleazare,+ ya Yozue mwana ya Nuni, mpi ya bamfumu, ebuna bo tubaka nde: “Yehowa muntu songaka Moize na kupesa beto dikabu na kati ya bampangi na beto.”+ Yo yina, na nsiku ya Yehowa, yandi pesaka bo dikabu na kati ya bampangi ya tata na bo.+
5 Bo pesaka mpi bana ya Manase bandambu kumi ya ntoto katula ntoto ya Gileadi mpi ya Bashani, yina vandaka na simu yina ya nkaka* ya Yordani,+
6 sambu bana-bankento ya Manase bakaka dikabu kumosi ti bana na yandi ya babakala, mpi bana ya Manase yina bikalaka bakaka ntoto ya Gileadi.
7 Ndilu ya Manase yantikaka na Asere tii na Mikmetati,+ yina ke talana ti Shekemi,+ mpi yo kwendaka na ndambu ya sudi tii na ntoto ya bantu ya Ene-Tapua.
8 Ntoto ya Tapua+ kumaka ya Manase, kansi Tapua yina vandaka na ndilu ya Manase vandaka ya bana ya Efrayimi.
9 Mpi ndilu yina kulumukaka tii na Muwanda ya Kana, na ndambu ya sudi ya muwanda. Kuvandaka ti bambanza ya Efrayimi na kati ya bambanza ya Manase,+ mpi ndilu ya Manase vandaka na nordi ya muwanda, mpi yo sukaka na nzadi-mungwa.+
10 Na sudi yo vandaka ya Efrayimi, mpi na nordi yo vandaka ya Manase, mpi nzadi-mungwa vandaka ndilu na yandi;+ na nordi yo* kumaka tii na Asere, mpi na esti yo kumaka tii na Isakare.
11 Na bateritware ya Isakare ti ya Asere, bo pesaka Manase Bete-sheani ti babwala yina kele na nziunga na yo, Ibleami+ ti babwala yina kele na nziunga na yo, bantu ya Dore+ ti babwala yina kele na nziunga na yo, bantu ya Ene-dore+ ti babwala yina kele na nziunga na yo, bantu ya Tanaki+ ti babwala yina kele na nziunga na yo, mpi bantu ya Megido ti babwala yina kele na nziunga na yo, bantoto tatu ya bangumba.
12 Kansi bana ya Manase kukaka ve na kubaka bambanza yai; bantu ya Kanana dindamanaka na kuzinga na ntoto yai.+
13 Ntangu bantu ya Izraele kumaka ngolo, bo kumisaka bantu ya Kanana bantu ya ke salaka bisalu ya ngolo,+ kansi bo kulaka bo yonso ve.*+
14 Bana ya Yozefi tubilaka Yozue nde: “Sambu na nki nge me pesa beto kaka dikabu mosi na nima ya kubula zeke+ mpi kitini mosi? Beto kele bantu mingi, sambu Yehowa me sakumunaka beto tii ntangu yai.”+
15 Yozue vutudilaka bo nde: “Kana beno kele bantu mingi mutindu yina, beno tombuka na mfinda mpi kuna beno zenga kisika sambu na beno mosi na ntoto ya bantu ya Perizi+ mpi ya bantu ya Refayimi,+ sambu ntoto ya bangumba ya Efrayimi+ kele fioti kibeni sambu na beno.”
16 Ebuna bana ya Yozefi tubaka nde: “Ntoto ya bangumba me lunga ve sambu na beto, mpi bantu yonso ya Kanana yina ke zinga na ntoto ya muwanda* kele ti bapusu-pusu ya bitumba ya bibende,*+ bayina kele na Bete-sheani+ ti babwala yina kele na nziunga na yo mpi bayina kele na Muwanda* ya Yizreele.”+
17 Ebuna Yozue tubaka na nzo ya Yozefi, na Efrayimi mpi na Manase, nde: “Beno kele bantu mingi, mpi beno kele ngolo mingi. Nge ta baka ve kaka dikabu mosi,+
18 kansi ntoto ya bangumba mpi ta vanda ya nge.+ Ata yo kele mfinda, nge ta sakula yo, mpi yo ta vanda nsuka ya teritware na nge. Sambu nge ta kula bantu ya Kanana, ata bo kele ngolo mpi kele ti bapusu-pusu ya bitumba ya bibende.”*+
Banoti na nsi ya lutiti
^ Disongidila, ndambu ya esti.
^ Disongidila, bantu ya Manase to teritware ya Manase.
^ To “botulaka ve ntoto na bo yonso.”
^ To “ntoto ya kukonda ngumba.”
^ To “bapusu-pusu ya bitumba yina kele ti bambele na makulu na yo.”
^ To “Ntoto ya Kukonda Ngumba.”
^ To “bapusu-pusu ya bitumba yina kele ti bambele na makulu na yo.”
