Yeremia 3:1-25
3 Bantu ke yula nde: “Kana muntu kukula nkento na yandi mpi nkento yina kuyambula yandi, ebuna yandi kuma nkento ya muntu ya nkaka, keti yandi lenda vutukila diaka nkento yina?”
Keti insi yina me kuma ve mvindu kibeni?+
“Nge me sala kindumba ti banduku mingi,+Mpi keti nge fwete vutukila mono ntangu yai?” Yehowa muntu me tuba.
2 “Tala na ndambu ya bangumba ya fioti ya me konda banti.
Na wapi bo me ladisaka nge ve na kingolo-ngolo?
Nge vandaka kuvanda pene-pene ya banzila ya nene sambu na bo,Bonso muntu yina ke zingaka ve kisika mosi* na ntoto-makanga.
Nge ke landa kukumisa insi mvinduTi kindumba na nge mpi mambu na nge ya mbi.+
3 Yo yina bo me buya kupesa nge bamvula ya ngolo,+Mpi mvula ke noka ve na nsungi ya mvula.
Nge kele ti luse* ya kukonda nsoni ya nkento yina ke salaka kindumba;Nge ke buya kuwa nsoni.+
4 Kansi ntangu yai nge ke binga mono nde,‘Tata na mono, nge kele nduku na mono ya kileke!+
5 Keti muntu lenda vanda na makasi kimakulu,To kuvanda ntangu yonso ti nganzi?’
Yai mambu ya nge ke tuba,Kansi nge ke landa kusala mambu yonso ya mbi yina nge lenda sala.”+
6 Na bilumbu ya ntotila Yoziasi,+ Yehowa tubilaka mono nde: “‘Keti nge me mona mambu yina Izraele ya kukonda kwikama me sala? Yandi me kwenda kusala kindumba+ na konso ngumba ya nda mpi na nsi ya konso nti yina kele ti matiti mingi.
7 Ata na nima ya kusala mambu yai yonso, mono landaka kusonga yandi na kuvutukila mono,+ kansi yandi vutukaka ve; mpi Yuda landaka kutala mpangi na yandi ya nkento yina kele muyekudi.+
8 Ntangu mono monaka yo, mono kulaka Izraele ya kukonda kwikama ti mukanda ya kufwa makwela+ sambu na bizumba na yandi.+ Kansi Yuda mpangi na yandi ya nkento yina kele muyekudi waka boma ve; yandi mpi basikaka mpi salaka kindumba.+
9 Yandi monaka kindumba na yandi mpamba, yandi landaka kukumisa insi mvindu, mpi yandi landaka kusala bizumba ti matadi mpi banti.+
10 Ata mpidina, Yuda mpangi na yandi ya nkento yina kele muyekudi vutukilaka mono ve na ntima ya mvimba, kansi yandi salaka yo na luvunu,’ Yehowa muntu me tuba.”
11 Ebuna Yehowa tubilaka mono nde: “Izraele ya kukonda kwikama me monisa nde yandi kele ya lunungu kuluta Yuda yina kele muyekudi.+
12 Kwenda mpi zabisa mambu yai na ndambu ya nordi:+
“‘“Vutuka, O nkolami Izraele,” Yehowa muntu me tuba.’+ ‘“Mono ta tala beno ve ti makasi,*+ sambu mono kele ya kwikama,” Yehowa muntu me tuba.’ ‘“Mono ta vanda ve na makasi kimakulu.
13 Ndima kaka mbi na nge, sambu nge me kolama na ntwala ya Yehowa Nzambi na nge. Nge landaka kuvukisa nitu ti* banzenza* na nsi ya konso nti yina kele ti matiti mingi, kansi nge vandaka ve kulemfukila ndinga na mono,” Yehowa muntu me tuba.’”
14 “Beno vutuka, beno bana yina kele bankolami,” Yehowa muntu me tuba. “Sambu mono me kuma mfumu na beno ya kieleka;* mpi mono ta baka beno, muntu mosi na mbanza mosi mpi bantu zole na dibuta mosi, ebuna mono ta nata beno na Sioni.+
15 Mono ta pesa beno bangungudi yina ntima na mono+ me zola, mpi bo ta disa beno ti nzayilu mpi mayele ya kubakisa mambu mbote-mbote.
16 Beno ta kuma mingi mpi ta buta bambuma na insi yai na bilumbu yina,” Yehowa muntu me tuba.+ “Bo ta tuba diaka ve nde, ‘Sanduku ya kuwakana ya Yehowa!’ Yo ta kwisila bo diaka ve na mabanza, bo ta yibuka yo ve mpi bo ta konda yo ve, mpi bo ta sala yo diaka ve.
17 Na ntangu yina bo ta binga Yeruzalemi kiti ya kimfumu ya Yehowa;+ mpi bo ta vukisa makanda yonso na zina ya Yehowa na Yeruzalemi,+ ebuna bo ta landa diaka ve ntima na bo ya mbi na ntu-ngolo yonso.”
18 “Na bilumbu yina bo ta tambula kumosi, nzo ya Yuda ti nzo ya Izraele,+ mpi kumosi bo ta katuka na ntoto ya nordi mpi bo ta kwisa kukota na ntoto yina mono pesaka ba-nkaka na beno bonso dikabu.+
19 Mpi mono yindulaka nde, ‘Tala mutindu mono tulaka nge na kati ya bana mpi mono pesaka nge ntoto ya mbote, dikabu ya kuluta kitoko na kati ya makanda!’*+ Mono yindulaka mpi nde nge ta binga mono, ‘Tata na mono!’ mpi nde nge ta yambula ve na kulanda mono.
20 ‘Ya kieleka mutindu nkento ke yekulaka bakala* na yandi mpi ke bikisaka yandi, mutindu mosi mpi nge, O nzo ya Izraele, nge me sadila mono mambu kukonda kwikama,’+ Yehowa muntu me tuba.”
21 Ndinga ke wakana na bangumba ya fioti ya me konda banti,Kudila mpi kubondila ya bantu ya Izraele,Sambu bo me bebisa nzila na bo;Bo me vila Yehowa Nzambi na bo.+
22 “Beno vutuka, beno bana yina kele bankolami.
Mono ta belula kukolama na beno.”+
“Beto bo yai! Beto me kwisa na nge,Sambu nge, O Yehowa, nge kele Nzambi na beto.+
23 Ya kieleka, bangumba ya fioti mpi makelele yina kele na bangumba kele luvunu.+
Ya kieleka luguluku ya Izraele+ kele na Yehowa Nzambi na beto.
24 Kansi kima ya nsoni* me fwa kisalu ya ngolo ya ba-nkaka na beto katuka kileke na beto,+Mameme na bo mpi bangombe na bo,Bana na bo ya babakala mpi ya bankento.
25 Beto lala na nsoni na beto,Mpi bika nsoni na beto kufika beto,Sambu beto me sala masumu na ntwala ya Yehowa Nzambi na beto,+Beto ti batata na beto katuka kileke na beto tii bubu yai,+Mpi beto me lemfukila ve ndinga ya Yehowa Nzambi na beto.”
Banoti na nsi ya lutiti
^ Na kisina, “muntu ya Arabia.”
^ Na kisina, “mbunzu.”
^ Na kisina, “ta sala ve nde luse na mono kubwa na zulu na beno.”
^ Na kisina, “kupanza banzila na nge na.”
^ To “banzambi ya nzenza.”
^ To mbala ya nkaka, “bakala na beno.”
^ Na kisina, “ya basoda ya makanda.”
^ Na kisina, “nduku.”
^ To “nzambi ya nsoni.”
