Yeremia 19:1-15
19 Yehowa tubaka nde: “Kwenda kusumba dibungu na muwumbi.+ Baka ndambu ya bankuluntu ya bantu mpi ndambu ya bankuluntu ya banganga-nzambi,
2 ebuna kwenda na Muwanda ya Mwana ya Inomi,+ na munoko ya Kielo ya Muwumbi. Mpi kuna zabisa mambu yina mono ke tubila nge.
3 Nge ta tuba nde, ‘Beno bantotila ya Yuda mpi bantu ya Yeruzalemi, beno wa mambu yina Yehowa ke tuba. Yehowa ya makesa, Nzambi ya Izraele, ke tuba nde:
“‘“Mono ke zola kunata mpasi na kisika yai, mpi makutu ya konso muntu yina ta wa yo ta sala mpasi.
4 Yo kele sambu bo yambulaka mono+ mpi bo bebisaka kisika yai.+ Na kati na yo, bo ke tambikila banzambi ya nkaka, yina bo ti ba-nkaka na bo mpi bantotila ya Yuda zabaka ve, mpi bo me fulusa kisika yai ti menga ya bantu yina me sala mbi ve.+
5 Bo tungaka bisika ya kunanguka ya Baale sambu na kuyoka* bana na bo na tiya bonso makabu ya mvimba ya kuyoka na Baale,+ diambu yina mono songaka bo ve, yina mono tubilaka ve, mpi yina me kwisilaka mono ntete ve ata fioti na ntima.”’*+
6 “‘“Yo yina tala! bilumbu ke kwisa,” Yehowa muntu me tuba, “ntangu bo ta binga diaka ve kisika yai nde Tofeti to Muwanda ya Mwana ya Inomi kansi Muwanda ya Kufwila Bantu.+
7 Mono ta fwa balukanu ya Yuda mpi ya Yeruzalemi na kisika yai, mpi mono ta bwisa bo na mbele ya bitumba na ntwala ya bambeni na bo mpi na maboko ya bantu yina ke sosa kufwa bo.* Mpi mono ta pesa bamvumbi na bo bonso madia na bandeke ya zulu mpi na bambisi ya ntoto.+
8 Mono ta kumisa mbanza yai kima ya ke pesa boma mpi kima ya kubudila mwita. Konso muntu ya nsuka yina ke luta pene-pene na yo ta yituka na boma mpi ta bula mwita sambu na bampasi na yo yonso.+
9 Mpi mono ta disa bo misuni ya bana na bo ya babakala ti ya bankento, mpi konso muntu ta dia misuni ya nkweno na yandi, sambu bo me ziunga bo mpi sambu bo me konda kivuvu ntangu bambeni na bo ti bantu yina ke sosa kufwa bo* me ziunga bo.”’+
10 “Na nima pasula dibungu yina na meso ya bantu yina ke kwenda ti nge,
11 mpi tubila bo nde, ‘Yehowa ya makesa ke tuba nde: “Yai mutindu mono ta pasula bantu yai mpi mbanza yai, bonso muntu yina ke pasula dibungu yina muwumbi me sala na mpila nde bo lenda yidika yo diaka ve; mpi bo ta zika bamvumbi na Tofeti tii kuna kisika ya kuzika bo ta vanda diaka ve.”’+
12 “‘Yai mambu yina mono ta sala na kisika yai,’ Yehowa muntu me tuba, ‘mpi na bantu na yo, sambu na kukumisa mbanza yai bonso Tofeti.
13 Mpi banzo ya Yeruzalemi ti banzo ya bantotila ya Yuda ta kuma mvindu bonso kisika yai, Tofeti,+ ee, banzo yonso yina bo pesaka bimenga na makesa yonso ya zulu+ mpi yina bo tiamunaka makabu ya malafu na banzambi ya nkaka+ na zulu na yo.’”
14 Ntangu Yeremia katukaka na Tofeti kisika yina Yehowa tindaka yandi sambu na kubikula mpi kwisaka kuvutuka, yandi telamaka na kibansala ya nzo ya Yehowa mpi tubilaka bantu yonso nde:
15 “Yehowa ya makesa, Nzambi ya Izraele, ke tuba nde, ‘Tala mono ke natila mbanza yai mpi babwala na yo yonso bampasi yonso yina mono tubaka sambu na yo, sambu bo buyaka na ntu-ngolo yonso na kulemfukila* bangogo na mono.’”+
Banoti na nsi ya lutiti
^ Na kisina, “kulutisa.”
^ To “yina me kotaka ntete ve ata fioti na mabanza na mono.”
^ To “ke sosa moyo na bo.”
^ To “ke sosa moyo na bo.”
^ Na kisina, “bo kumisaka nkingu na bo ngolo sambu na kulemfukila ve.”
