Kuyantika 14:1-24
14 Kansi, na bilumbu ya Amrafele ntotila ya Shinare,+ Arioki ntotila ya Elasare, Kedorlaomere+ ntotila ya Elami,+ mpi Tidale ntotila ya Goyimi,
2 bantotila yai nwanaka ti Bera ntotila ya Sodome,+ Birsha ntotila ya Gomore,+ Shinabi ntotila ya Adma, Shemebere ntotila ya Seboyimi,+ mpi ntotila ya Bela, disongidila, Soare.
3 Bo yonso vukanaka na Muwanda* ya Sidimi,+ disongidila, Nzadi ya Mungwa.*+
4 Bo sadilaka Kedorlaomere bamvula 12, kansi bo kolamaka na mvula ya 13.
5 Yo yina na mvula ya 14, Kedorlaomere mpi bantotila yina vandaka ti yandi kwisaka mpi bedisaka bantu ya Refayimi na Ashteroti-karnayimi, bantu ya Zuzi na Kami, bantu ya Emi+ na Shave-kiriatayimi,
6 mpi bantu ya Ori+ na ngumba na bo ya Seire+ tii na Ele-parani, yina kele na ntoto-makanga.
7 Na nima bo balukaka mpi kwisaka na Ene-mishpati, disongidila, Kadeshi,+ mpi bo botulaka teritware ya mvimba ya bantu ya Amaleki+ mpi bantu ya Amore+ yina vandaka kuzinga na Azazoni-tamare.+
8 Ntangu yai, ntotila ya Sodome yantikaka kutambula, ti ntotila ya Gomore, ntotila ya Adma, ntotila ya Seboyimi, mpi ntotila ya Bela, disongidila, Soare, mpi bo yilamaka sambu na kunwanisa bo na Muwanda* ya Sidimi,
9 sambu na kunwanisa Kedorlaomere ntotila ya Elami, Tidale ntotila ya Goyimi, Amrafele ntotila ya Shinare, mpi Arioki ntotila ya Elasare+—bantotila iya sambu na kunwanisa bantotila tanu yina.
10 Kansi Muwanda* ya Sidimi vandaka ya kufuluka ti mabulu ya gudro, ebuna ntotila ya Sodome mpi ntotila ya Gomore sosaka kutina kansi bo bwaka na kati ya mabulu yina, mpi bantu yina bikalaka tinaka na ntoto ya bangumba.
11 Ebuna bayina nungaka bakaka bima yonso ya Sodome ti ya Gomore mpi madia na bo yonso ebuna bo kwendaka.+
12 Bo bakaka mpi Loti, mwana-mpangi ya Abrami, yina vandaka kuzinga na Sodome,+ mpi bima na yandi, ebuna bo kwendaka.
13 Na nima, muntu mosi yina tinaka kwisaka kupesa Abrami Mu-Ebreo nsangu. Na ntangu yina yandi vandaka kuzinga* na kati ya banti ya nene ya Mamre muntu ya Amore,+ mpangi ya Eshkole mpi ya Anere.+ Bantu yai vandaka banduku ya Abrami.
14 Abrami waka nde bo me nata mpangi na yandi+ na kimpika. Ebuna yandi vukisaka bantu na yandi yina bo me longaka bitumba, bansadi 318 yina butukaka na nzo na yandi, ebuna yandi landaka bo tii na Dani.+
15 Na mpimpa, yandi kabisaka bantu na yandi, mpi yandi ti bansadi na yandi nwanaka mpi bedisaka bantu yina. Mpi yandi landaka bo tii na Oba, yina kele na nordi ya Damasi.
16 Yandi bakaka bima yonso, yandi bakaka mpi mpangi na yandi Loti, bima na yandi, bankento, mpi bantu ya nkaka.
17 Ntangu Abrami vutukaka na nima ya kubedisa Kedorlaomere mpi bantotila yina vandaka ti yandi, ntotila ya Sodome basikaka sambu na kukutana ti Abrami na Muwanda* ya Shave, disongidila, Muwanda ya Ntotila.+
18 Melkizedeki+ ntotila ya Salemi+ nataka mampa mpi vinu; yandi vandaka nganga-nzambi ya Nzambi ya Kuluta Zulu.+
19 Ebuna yandi sakumunaka yandi mpi tubaka nde:
“Abrami kubaka lusakumunu na Nzambi ya Kuluta Zulu,Muntu yina salaka zulu ti ntoto;
20 Mpi lukumu kuvanda na Nzambi ya Kuluta Zulu,Yina me pesa bantu yina ke niokula nge na maboko na nge!”
Ebuna Abrami pesaka yandi ndambu mosi na kati ya bandambu kumi ya bima yonso.+
21 Na nima, ntotila ya Sodome tubilaka Abrami nde: “Pesa mono bantu,* kansi baka bima.”
22 Kansi Abrami tubilaka ntotila ya Sodome nde: “Mono ke nangula diboko na mono mpi ke dia ndefi na zina ya Yehowa Nzambi ya Kuluta Zulu, Muntu yina salaka zulu ti ntoto,
23 nde mono ta baka ve ata kima na nge mosi, katuka na nsinga ya kutungila tii na nsinga ya sandale, sambu nge tuba ve nde, ‘Mono kumisaka Abrami mvwama.’
24 Mono ta baka ata kima mosi ve katula kaka bima yina baleke ya babakala kudiaka. Sambu na dikabu ya bantu yina kwendaka ti mono, Anere, Eshkole, mpi Mamre+—bika bo baka dikabu na bo.”
Banoti na nsi ya lutiti
^ To “Ntoto ya Kukonda Ngumba.”
^ Disongidila, Nzadi-Mungwa ya Kufwa.
^ To “Ntoto ya Kukonda Ngumba.”
^ To “Ntoto ya Kukonda Ngumba.”
^ To “kuzinga na batenta.”
^ To “Ntoto ya Kukonda Ngumba.”
^ To “mioyo.”
