Kulonga 20:1-20
20 “Kana nge me kwenda kunwana ti bambeni na nge mpi nge mona nde bampunda na bo, bapusu-pusu na bo mpi basoda na bo kele mingi kuluta ya nge, kuwa bo boma ve, sambu Yehowa Nzambi na nge yina basisaka nge na insi ya Ezipte kele ti nge.+
2 Kana beno ke zola kukwenda na bitumba, nganga-nzambi fwete pusana pene-pene mpi kutubila bantu.+
3 Yandi fwete songa bo nde, ‘Wa, O Izraele! Kubika fioti beno ke nwana ti bambeni na beno. Beno vanda kikesa. Beno wa boma ve, beno tekita ve, mpi beto tita ve sambu na bo,
4 sambu Yehowa Nzambi na beno ke tambula ti beno sambu na kunwana ti bambeni na beno sambu na beno mpi sambu na kugulusa beno.’+
5 Bakapita mpi fwete songa bantu nde, ‘Nani me tunga nzo ya mpa mpi me kota ntete ve na nzo yango? Yandi vutuka na nzo na yandi. Kana ve, yandi lenda fwa na bitumba ebuna muntu ya nkaka ta kota na kati.
6 Nani me sala kilanga ya vinu mpi me yantika ntete ve kusadila yo? Yandi kwenda mpi yandi vutuka na nzo na yandi. Kana ve, yandi lenda fwa na bitumba ebuna muntu ya nkaka ta yantika kusadila yo.
7 Nani me sila nkento makwela mpi me kwela yandi ntete ve? Yandi kwenda mpi yandi vutuka na nzo na yandi.+ Kana ve, yandi lenda fwa na bitumba ebuna muntu ya nkaka ta kwela nkento yina.’
8 Bakapita fwete yula diaka bantu nde, ‘Nani ke wa boma mpi kele na kikesa ve?+ Yandi fwete vutuka na nzo na yandi, sambu yandi pusa ve bampangi na yandi na kulemba nitu bonso yandi.’+
9 Ntangu bakapita ta manisa kutubila bantu, bo fwete tula bamfumu ya makesa sambu na kutwadisa bantu.
10 “Kana nge kuma pene-pene ya mbanza mosi sambu na kunwanisa yo, nge fwete zabisa yo mpi mambu ya bo fwete sala sambu ngemba kuvanda.+
11 Kana mbanza yina kupesa mvutu nde yo ke zola kuvanda na ngemba ti nge mpi yo kangudila nge bakielo na yo, bantu yonso yina kele na kati ta kuma bantu na nge yina ta salaka bisalu ya ngolo, mpi bo ta sadila nge.+
12 Kansi kana yo buya kusala ngemba ti nge mpi yo nwanisa nge, nge fwete ziunga yo,
13 mpi Yehowa Nzambi na nge ta pesa yo kibeni na maboko na nge, ebuna nge fwete fwa babakala yonso yina kele na kati na yo na mbele ya bitumba.
14 Kansi, nge lenda baka sambu na nge mosi bankento, bana, bitwisi mpi bima yonso yina kele na kati ya mbanza yina, disongidila bima na yo yonso ya nge ta botula,+ mpi nge ta dia bima ya nge ta botula na bambeni na nge, yina Yehowa Nzambi na nge ta pesa nge.+
15 “Yina kele mambu ya nge ta sala bambanza yonso ya kele ntama kibeni ti nge yina kele ve bambanza ya makanda yai ya pene-pene.
16 Kansi na kati ya bambanza ya bantu yai, yina Yehowa Nzambi na nge ke pesa nge bonso dikabu, nge fwete bika ve nde konso kima yina ke pemaka kuzinga.+
17 Kansi, nge fwete fwa bo kibeni, bantu ya Heti, bantu ya Amore, bantu ya Kanana, bantu ya Perizi, bantu ya Hivi, mpi bantu ya Yebusi,+ kaka mutindu Yehowa Nzambi na nge songaka nge;
18 sambu bo longa beno ve na kulanda mambu na bo yonso ya mbi, yina bo me salaka sambu na banzambi na bo, yina ta pusa beno na kusala disumu na ntwala ya Yehowa Nzambi na beno.+
19 “Kana nge ziunga mbanza mosi mpi nge botula yo na nima ya kunwanisa yo bilumbu mingi, nge fwete zenga ve banti na yo ti disoka. Nge lenda dia bambuma na yo, kansi nge fwete zenga yo ve.+ Keti nge fwete ziunga nti ya mfinda mutindu nge lenda ziunga muntu?
20 Nge lenda zenga kaka nti yina nge ke zaba nde bo ke diaka ve bambuma na yo. Nge lenda bwisa yo sambu na kutunga lupangu na nziunga ya mbanza yina ke nwanisa nge sambu na kubwisa yo, tii kuna yo ta bwa.
