Kubasika 7:1-25
7 Ebuna Yehowa tubilaka Moize nde: “Tala, mono me tula nge bonso Nzambi* sambu na Farao, mpi Aroni mpangi na nge ta kuma mbikudi na nge.+
2 Nge fwete vutukila mambu yonso yina mono ta songa nge, mpi Aroni mpangi na nge ta tubila Farao, ebuna yandi ta bika bantu ya Izraele bo basika na insi na yandi.
3 Kansi mono, mono ta bika nde ntima ya Farao kukuma ngolo,+ mpi mono ta kumisa bidimbu na mono mpi bimangu na mono mingi na insi ya Ezipte.+
4 Kansi Farao ta wila beno ve, ebuna mono ta tula diboko na mono na Ezipte mpi ta basisa bimvuka na mono mingi ya bantu,* bantu na mono, bantu ya Izraele, na insi ya Ezipte na nzila ya balusambisu ya nene.+
5 Ebuna bantu ya Ezipte ta zaba kibeni nde mono kele Yehowa+ ntangu mono ta tandula diboko na mono sambu na kupesa Ezipte ndola mpi ta basisa bantu ya Izraele na kati na bo.”
6 Moize ti Aroni salaka mambu yina Yehowa songaka bo; bo salaka kaka mutindu yina.
7 Moize vandaka ti bamvula 80 mpi Aroni vandaka ti bamvula 83 ntangu bo tubaka na Farao.+
8 Yehowa tubilaka Moize ti Aroni nde:
9 “Kana Farao kutubila beno nde, ‘Beno sala kimangu,’ songa Aroni nde, ‘Baka nti na nge mpi losa yo na ntwala ya Farao.’ Yo ta kuma nioka ya nene.”+
10 Yo yina Moize ti Aroni kotaka kisika ya Farao mpi salaka kaka mutindu Yehowa songaka yandi. Aroni losaka nti na yandi na ntwala ya Farao ti ya bansadi na yandi, ebuna yo kumaka nioka ya nene.
11 Kansi, Farao bingaka bantu ya mayele ti banganga-nkisi, ebuna banganga-nkisi ya Ezipte+ yina vandaka kusadila mazi salaka mpi mutindu mosi ti mazi na bo.*+
12 Konso muntu losaka nti na yandi, mpi banti yina kumaka banioka ya nene; kansi nti ya Aroni minaka banti na bo.
13 Ata mpidina, ntima ya Farao kumaka ngolo,+ mpi yandi wilaka bo ve, kaka mutindu Yehowa tubaka.
14 Ebuna Yehowa tubilaka Moize nde: “Ntima ya Farao kele ngolo.+ Yandi me buya kubika bantu bo kwenda.
15 Kwenda na Farao na suka. Tala! Yandi ke kwenda na masa! Nge fwete telama na lweka ya Nzadi ya Nile sambu na kukutana ti yandi; nata nti yina kitukaka nioka.+
16 Nge fwete tubila yandi nde, ‘Yehowa Nzambi ya Baebreo me tinda mono na nge,+ mpi yandi ke tuba nde: “Bika bantu na mono bo kwenda sambu bo sadila mono na ntoto-makanga,” kansi nge me lemfuka ve tii ntangu yai.
17 Yehowa me tuba nde: “Na diambu yai nge ta zaba nde mono kele Yehowa.+ Mono ke bula nti yina kele na diboko na mono na masa yina kele na Nzadi ya Nile, mpi yo ta kuma menga.
18 Ebuna bambisi yina kele na Nile ta fwa, Nile ta basisa nsudi ya mbi, mpi bantu ya Ezipte ta mona ve mpila ya kunwa masa ya Nile.”’”
19 Na nima, Yehowa tubilaka Moize nde: “Tuba na Aroni nde, ‘Baka nti na nge mpi tandula diboko na nge na zulu ya bamasa ya Ezipte,+ na zulu ya banzadi na yo, na zulu ya tu-bamasa na yo,* na zulu ya biziba na yo,+ mpi na zulu ya bima na yo ya bo ke bumbilaka masa, sambu yo kuma menga.’ Menga ta vanda na insi ya mvimba ya Ezipte, ata na kati ya mabungu ya mabaya mpi ya matadi.”
20 Na mbala mosi Moize ti Aroni salaka kaka mutindu Yehowa songaka bo. Yandi nangulaka nti mpi bulaka masa yina vandaka na Nzadi ya Nile na meso ya Farao ti ya bansadi na yandi, ebuna masa yonso yina vandaka na nzadi kumaka menga.+
21 Ebuna bambisi yina vandaka na nzadi fwaka,+ nzadi yantikaka kubasisa nsudi ya mbi, bantu ya Ezipte kukaka ve kunwa masa ya Nile,+ mpi menga vandaka na insi ya mvimba ya Ezipte.
22 Kansi, banganga-nkisi ya Ezipte yina ke sadilaka mazi salaka mutindu mosi ti mazi na bo,+ mpidina ntima ya Farao landaka kukuma ngolo, mpi yandi wilaka bo ve, kaka mutindu Yehowa tubaka.+
23 Ebuna Farao vutukaka na nzo na yandi, yandi tulaka mpi ve diambu yai na ntima.
24 Yo yina bantu yonso ya Ezipte vandaka kutimuna mabulu na nziunga ya Nile sambu na kusosa masa ya kunwa, sambu bo lendaka ve kunwa masa ya Nile.
25 Bilumbu nsambwadi ya mvimba lutaka tuka Yehowa bulaka Nile.
Banoti na nsi ya lutiti
^ Na kisina, “me tula nge Nzambi.”
^ Na kisina, “makesa na mono.”
^ To “bisalu na bo ya mazi.”
^ Disongidila, banzila ya ke nataka masa ya Nile.
