Kubasika 15:1-27
15 Na ntangu yina, Moize mpi bantu ya Izraele yimbilaka Yehowa nkunga yai:+
“Bika mono yimbila Yehowa, sambu nkembo na yandi me kuma mingi.+
Yandi me losa mpunda ti muntu yina ke tambusa yo na nzadi-mungwa.+
2 Kikesa na mono mpi ngolo na mono kele Yah,* sambu yandi me kuma luguluku na mono.+
Yai Nzambi na mono, mpi mono ta kumisa yandi;+ Nzambi ya tata na mono,+ mpi mono ta nangula yandi.+
3 Yehowa kele soda ya ngolo.+ Zina na yandi Yehowa.+
4 Bapusu-pusu ya Farao mpi basoda na yandi, Yandi me losa bo na nzadi-mungwa,+Mpi basoda na yandi ya kuluta ngolo me dinda na Nzadi-Mungwa ya Mbwaki.+
5 Masa ya me dasuka fikaka bo; bo dindaka bonso ditadi na bisika ya mudindu.+
6 O Yehowa, diboko na nge ya kitata kele ngolo mingi,+O Yehowa, diboko na nge ya kitata lenda buka-buka mbeni.
7 Na bunene na nge ya kuluta, nge lenda losa na ntoto bantu yina ke telama sambu na kunwanisa nge;+Nge ke tinda makasi na nge ya ngolo, yo ke yoka bo bonso nianga.
8 Na mpema yina basikaka na mbombo na nge, masa kangamaka kisika mosi;Yo telamaka kisika mosi, mpi yo kangaka masa sambu yo vutuka ve;Masa yina dasukaka kangamaka bonso ditadi na kati-kati ya nzadi-mungwa.
9 Mbeni tubaka nde: ‘Mono ta landa! Mono ta kanga!
Mono ta kabula bima ya mono ta botula tii kuna mono* ta sepela!
Mono ta basisa mbele na mono ya bitumba! Diboko na mono ta bedisa bo!’+
10 Nge basisaka mupepe ya mpema na nge, nzadi-mungwa fikaka bo;+Bo dindaka bonso kibende mosi ya kilo na masa ya nene.
11 Nani na kati ya banzambi kele bonso nge, O Yehowa?+
Nani kele bonso nge, nge muntu yina kele santu na kiteso ya kuluta?+
Muntu yina bo fwete wa boma mpi kuyimbila bankunga ya lukumu, Muntu yina ke salaka mambu ya kuyituka.+
12 Nge tandulaka diboko na nge ya kitata, mpi ntoto minaka bo.+
13 Na zola na nge ya kwikama nge twadisaka bantu yina nge sumbaka diaka;+Na ngolo na nge, nge ta nata bo na kisika ya santu ya nge ke zingaka.
14 Bantu fwete wa;+ bo ta tekita;Mpasi* ta simba bantu ya Filistia.
15 Na ntangu yina bamfumu ya Edomi ta wa boma ya ngolo;Mpi matekita ta kanga bamfumu ya ngolo* ya Moabi.+
Bantu yonso ya Kanana ta lemba nitu.+
16 Boma mpi matekita ta simba bo.+
Sambu na bunene ya diboko na nge bo ta nikana ve bonso ditadi,Tii kuna bantu na nge ta luta, O Yehowa,Tii kuna bantu yina nge salaka+ ta luta.+
17 Nge ta nata bo mpi ta kuna bo na ngumba ya dikabu na nge,+Kisika ya ngolo yina nge me yidikaka sambu na nge mosi na kuzinga, O Yehowa,O Yehowa, kisika ya santu yina maboko na nge me tulaka.
18 Yehowa ta yala bonso ntotila mvula na mvula.+
19 Ntangu bampunda ya Farao ti bapusu-pusu na yandi ya bitumba mpi basoda na yandi yina ke tambusaka bampunda kotaka na nzadi-mungwa,+Yehowa vutulaka masa ya nzadi-mungwa na zulu na bo,+Kansi bantu ya Izraele tambulaka na ntoto ya kuyuma na kati-kati ya nzadi-mungwa.”+
20 Ebuna Miriami mbikudi ya nkento, mpangi ya Aroni, bakaka ngoma ya fioti na diboko na yandi, ebuna bankento yonso landaka yandi bo ke bula bangoma ya fioti mpi ke kina.
21 Miriami pesaka babakala mvutu na nkunga nde:
“Beno yimbila Yehowa, sambu nkembo na yandi me kuma mingi.+
Yandi me losa mpunda ti muntu yina ke tambusa yo na nzadi-mungwa.”+
22 Na nima Moize katulaka Izraele na Nzadi-Mungwa ya Mbwaki, ebuna bo kwendaka na ntoto-makanga ya Shure mpi bo tambulaka bilumbu tatu na ntoto-makanga, kansi bo monaka ve masa.
23 Bo kumaka na Mara,*+ kansi bo monaka ve mpila ya kunwa masa ya Mara sambu yo vandaka ndudi. Yo yina yandi pesaka yo zina Mara.
24 Ebuna bantu yantikaka kubokutila Moize+ nde: “Inki beto ta nwa?”
25 Yandi didilaka Yehowa,+ ebuna Yehowa songaka yandi nti mosi. Ntangu yandi losaka yo na masa, masa kumaka mbote.
Kuna Nzambi tudilaka bo nsiku mpi mbandu yina ta sadisaka bo na kusambisa, mpi kuna yandi mekaka+ bo.
26 Yandi tubaka nde: “Kana nge wa kibeni ndinga ya Yehowa Nzambi na nge mpi nge sala mambu yina kele ya mbote na meso na yandi mpi nge tula dikebi na bantuma na yandi mpi nge landa bansiku na yandi yonso,+ mono ta natila nge ve ata maladi mosi yina mono natilaka bantu ya Ezipte,+ sambu mono, Yehowa, mono ke belula nge.”+
27 Na nima, bo kumaka na Elimi, kisika vandaka banto ya masa 12 mpi maba 70. Ebuna bo salaka camp pana pene-pene ya masa.
Banoti na nsi ya lutiti
^ “Yah” kele zina ya Yehowa na bunkufi.
^ To “moyo na mono.”
^ Na kisina, “Misongo.”
^ To “bamfumu ya nku.”
^ Yo ke tendula “Ndudi.”
