Ezekiele 36:1-38
36 “Kansi nge, mwana ya muntu, bikula sambu na bangumba ya Izraele mpi tuba nde, ‘O bangumba ya Izraele, beno wa ndinga ya Yehowa.
2 Yehowa Mfumu ya Kuluta Nene me tuba nde: “Mbeni me tuba sambu na beno nde, ‘Aa! Ata bisika ya kunanguka ya ntama me kuma ya beto!’”’+
3 “Yo yina, bikula mpi tuba nde, ‘Yehowa Mfumu ya Kuluta Nene me tuba nde: “Sambu bo me bika beno mpamba mpi me nwanisa beno na bandambu yonso, sambu beno kuma kima ya bantu yina ta guluka* na kati ya makanda mpi bantu ke landa kutubila beno mpi kutonga beno,+
4 O bangumba ya Izraele, beno wa ndinga ya Yehowa Mfumu ya Kuluta Nene! Yai mambu yina Yehowa Mfumu ya Kuluta Nene ke tuba na bangumba ya nene ti bangumba ya fioti, na bamasa ti miwanda, mayumbu yina me bikalaka mpamba,+ mpi na bambanza ya bo me yambulaka, yina bantu ya me gulukaka ya makanda yina kele na nziunga na bo me botulaka bima mpi me sekaka;+
5 Yehowa Mfumu ya Kuluta Nene me tuba na bayai nde: ‘Na kikesa na mono ya ngolo,+ mono ta tuba sambu na bantu ya makanda ya me guluka mpi sambu na Edomi ya mvimba, bayina ke baka insi na mono na kiese yonso mpi ti kuvweza ya ngolo*+ bonso nde yo kele kima na bo, sambu na kubotula banseke na yo ya kudisa bitwisi mpi kuyiba yo.’”’+
6 “Yo yina, bikula sambu na insi ya Izraele, mpi tubila bangumba ya nene ti bangumba ya fioti, bamasa ti miwanda nde, ‘Yehowa Mfumu ya Kuluta Nene me tuba nde: “Tala! Mono ta tuba na kikesa na mono mpi na nganzi na mono, sambu beno me nata nsoni yina makanda me pesa beno.”’+
7 “Yo yina Yehowa Mfumu ya Kuluta Nene me tuba nde: ‘Mono me nangula diboko na mono mpi me dia ndefi nde makanda yina kele na nziunga ta wa nsoni bo mosi.+
8 Kansi beno, O bangumba ya Izraele, beno ta basisa balutangu mpi ta buta bambuma na beno sambu na bantu na mono Izraele,+ sambu kubika fioti bo ta kwisa kuvutuka.
9 Sambu mono kele ti beno, mpi mono ta baluka na ndambu na beno, ebuna bo ta bundula beno mpi ta kuna nkeni.
10 Mono ta kumisa bantu na beno mingi—nzo ya mvimba ya Izraele, bo yonso—ebuna bantu ta zinga na bambanza yina+ mpi bo ta tunga diaka bisika yina ya kubeba.+
11 Ya kieleka, mono ta kumisa bantu na beno mpi bitwisi na beno mingi;+ bo ta kuma mingi mpi ta buta bana mingi. Mono ta sala nde bantu kuzinga na kati na beno mutindu beno vandaka ntete,+ mpi mono ta sala nde beno toma kuluta na ntangu ya ntama;+ ebuna beno ta zaba nde mono kele Yehowa.+
12 Mono ta sala nde bantu—bantu na mono Izraele—kutambula na zulu na beno, mpi bo ta baka beno.+ Beno ta kuma dikabu na bo, mpi beno ta bikisa bo diaka ve kukonda bana.’”+
13 “Yehowa Mfumu ya Kuluta Nene me tuba nde: ‘Sambu bo ke tuba na beno nde, “Nge kele insi yina ke diaka bantu mpi ke bikisaka makanda na nge kukonda bana,”’
14 ‘nge ta dia diaka ve bantu mpi ta kumisa diaka ve makanda na nge kukonda bana,’ Yehowa Mfumu ya Kuluta Nene muntu me tuba.
15 ‘Mono ta bika ve nde makanda kufinga nge diaka to nde bantu kusosila nge,+ mpi nge ta budisa diaka ve makanda na nge sakuba,’ Yehowa Mfumu ya Kuluta Nene muntu me tuba.”
16 Ndinga ya Yehowa kwisilaka mono diaka nde:
17 “Mwana ya muntu, ntangu nzo ya Izraele vandaka kuzinga na insi na bo, bo kumisaka yo mvindu na mutindu bo vandaka kuzinga mpi na mambu ya bo vandaka kusala.+ Banzila na bo vandaka na meso na mono bonso mvindu ya menga ya nkento yina me mona menga.+
18 Yo yina mono wilaka bo makasi sambu na menga yina bo tiamunaka na insi yina+ mpi sambu bo kumisaka insi mvindu ti biteki na bo ya nzanzi.*+
19 Ebuna mono panzaka bo na kati ya makanda mpi na kati ya bansi.+ Mono sambisaka bo na kutadila banzila na bo mpi na kutadila mambu ya bo salaka.
20 Kansi ntangu bo kwisaka na makanda yina, bantu vwezaka zina na mono ya santu+ na mutindu bo vandaka kutuba sambu na bo nde, ‘Bantu yai kele bantu ya Yehowa, kansi bo me bika insi na yandi.’
21 Yo yina mono ta monisa nde mono ke kudibanza-banzaka sambu na zina na mono ya santu, yina nzo ya Izraele vwezaka na kati ya makanda yina bo kwendaka.”+
22 “Yo yina tuba na nzo ya Izraele nde, ‘Yehowa Mfumu ya Kuluta Nene me tuba nde: “O nzo ya Izraele, mono ke sala yo ve sambu na beno, kansi sambu na zina na mono ya santu, yina beno vwezaka na kati ya makanda yina beno kwendaka.”’+
23 ‘Mono ta santisa kibeni zina na mono ya nene,+ yina bantu vwezaka na kati ya makanda, yina beno vwezaka na kati na bo; ebuna makanda ta zaba nde mono kele Yehowa,’+ Yehowa Mfumu ya Kuluta Nene muntu me tuba, ‘ntangu bo ta santisa mono na kati na beno na meso na bo.
24 Mono ta katula beno na kati ya makanda, ta vutula beno mpi ta vukisa beno na bansi yonso mpi ta nata beno na insi na beno.+
25 Mono ta mwanga masa ya bunkete na zulu na beno, ebuna beno ta kuma bunkete;+ mono ta katula mvindu na beno yonso+ mpi biteki na beno yonso ya nzanzi sambu na kukumisa beno bunkete.+
26 Mono ta pesa beno ntima ya mpa+ mpi mono ta tula mpeve mosi ya mpa na kati na beno.+ Mono ta katula ntima ya ditadi+ na nitu na beno mpi ta pesa beno ntima ya nsuni.*
27 Mono ta tula mpeve na mono na kati na beno, mpi mono ta sala nde beno tambula na bansiku na mono,+ ebuna beno ta zitisa mpi ta landa bankanu na mono.
28 Ebuna beno ta zinga na insi yina mono pesaka na ba-nkaka na beno, mpi beno ta vanda bantu na mono mpi mono ta vanda Nzambi na beno.’+
29 “‘Mono ta gulusa beno na mvindu na beno yonso, mono ta songa mbuma na kubuta mpi na kukuma mingi, mpi mono ta natila beno ve nzala.+
30 Mono ta sala nde bambuma ya nti mpi bima ya bilanga kukuma mingi, sambu beno wa diaka ve nsoni sambu na nzala na kati ya makanda.+
31 Ebuna beno ta yibuka banzila na beno ya mbi ti bisalu na beno yina vandaka ve mbote, mpi beno ta kudimenga sambu na mbi na beno ti mambu na beno ya mbi.+
32 Kansi beno zaba diambu yai: Mono ke sala yo ve sambu na beno,’+ Yehowa Mfumu ya Kuluta Nene muntu me tuba. ‘Kansi, beno wa nsoni mpi beno kudiwa nde bo me kulumusa beno sambu na banzila na beno, O nzo ya Izraele.’
33 “Yehowa Mfumu ya Kuluta Nene me tuba nde: ‘Na kilumbu yina mono ta katula mbi na beno yonso sambu na kukumisa beno bunkete, mono ta sala nde bantu kuzinga na bambanza yina+ mpi bo tunga diaka bisika yina ya kubeba.+
34 Bo ta sala bilanga na insi ya me bikalaka mpamba yina bikalaka mpamba sambu konso muntu yina vandaka kuluta kumona.
35 Mpi bantu ta tuba nde: “Insi yina me bikalaka mpamba me kuma bonso kilanga ya Edeni,+ ebuna bambanza yina vandaka mayumbu, yina bikalaka mpamba mpi yina bo bwisaka me kuma ntangu yai bambanza ya ngolo mpi yina bantu ke zingaka.”+
36 Ebuna makanda yina me bikala na nziunga na beno ta zaba nde mono mosi, Yehowa, muntu me tunga yina bo bebisaka, mpi mono me kuna yina bikalaka mpamba. Mono mosi, Yehowa, muntu me tuba, mpi mono me sala yo.’+
37 “Yehowa Mfumu ya Kuluta Nene me tuba nde: ‘Mono ta bika mpi nde nzo ya Izraele kulomba mono na kusala diambu yai sambu na bo: Mono ta kumisa bantu na bo mingi bonso kimvuka ya mameme.
38 Bonso kimvuka ya basantu, bonso kimvuka ya mameme ya Yeruzalemi* na nsungi ya bankinsi na yandi,+ bambanza yina vandaka mayumbu ta fuluka ti bimvuka ya bantu;+ ebuna bo ta zaba nde mono kele Yehowa.’”
Banoti na nsi ya lutiti
^ Na kisina, “ya bantu ya me bikala.”
^ To “ti kuvweza na moyo.”
^ Ngogo ya Kiebreo ya bo me sadila awa lenda vanda na kuwakana ti ngogo “tufi” mpi bo me sadila yo sambu na kuvweza.
^ Disongidila, yina ke lemfukaka kukonda mpasi na lutwadisu ya Nzambi.
^ To mbala ya nkaka, “Bonso bimvuka ya mameme yina bo vandaka kupesa bimenga na Yeruzalemi.”
