Nkunga 22:1-31
Na ntwadisi; ya bo me tula na “Mbambi ya Suka.”* Nkunga ya Davidi.
22 Nzambi na mono, Nzambi na mono, sambu na nki nge me yambula mono?+
Sambu na nki nge kele ntama na kugulusa mono,Ntama na kuwa kudila ya mono ke dila sambu na mpasi?+
2 Nzambi na mono, mono ke landa kubinga nge konso kilumbu, kansi nge ke ndima ve;+Mpi na mpimpa mono ke kanga munoko ve.
3 Kansi nge kele santu,+Bankunga ya lukumu ya Izraele me ziunga nge.*
4 Batata na beto tudilaka nge ntima;+Bo tulaka ntima, mpi nge vandaka kugulusa bo.+
5 Bo didilaka nge, mpi bo gulukaka;Bo tudilaka nge ntima, mpi bo waka ve nsoni.*+
6 Mono kele musobi kansi muntu ve,Bantu ke seka mono* mpi bo ke vweza mono.+
7 Bantu yonso yina ke mona mono ke seka mono;+Bo ke seka mpi ke nikisa ba-ntu na bo sambu na kuvweza mono:+
8 “Yandi tudilaka Yehowa ntima. Bika yandi gulusa yandi!
Bika yandi katula yandi na mpasi, sambu yandi ke zolaka yandi mingi!”+
9 Nge Muntu basisaka mono na divumu ya mama na mono,+Muntu yina salaka nde mono kudiwa na lutaninu na mabele ya mama na mono.
10 Katuka ntangu yina mono butukaka, bo me pesaka mono na maboko na nge sambu nge keba mono;*Katuka na divumu ya mama na mono, nge kele Nzambi na mono.
11 Kubikala ve ntama ti mono, sambu mpasi kele pene-pene+Mpi mono kele ve ti nsadisi ya nkaka.+
12 Bana-bangombe mingi ya babakala me ziunga mono;+Bangombe ya babakala ya ngolo ya Bashani me ziunga mono.+
13 Bo ke kangudila mono minoko nene,+Bonso ntambu ya ke ngana yina ke pasula bitini-bitini mbisi ya yo me kanga.+
14 Bo ke tiamuna mono bonso masa;Mikwa na mono yonso me katuka na bisika na yo.
Ntima na mono me kuma bonso mafuta;+Yo ke kuma masa-masa na kati na mono.+
15 Ngolo na mono me yuma bonso kitini ya kima ya bo me sala na ntoto ya tuma;+Ludimi na mono me kangama na misuni ya meno na mono;+Nge ke kulumusa mono tii na mfututu ya lufwa.+
16 Sambu bambwa me ziunga mono;+Bo me kuma pene-pene na mono bonso kimvuka ya bantu ya ke salaka mambi,+Bo ke tatika mono na maboko mpi na makulu bonso ntambu.+
17 Mono lenda tanga mikwa na mono yonso.+
Bo ke tala mpi bo ke tala-tala mono.
18 Bo ke kabula bilele na mono bo na bo,Mpi bo ke budila bilele na mono zeke.+
19 Kansi nge, O Yehowa, kubikala ve ntama.+
Nge kele ngolo na mono; kwisa nswalu kusadisa mono.+
20 Gulusa mono* na mbele ya bitumba,Luzingu* na mono ya mfunu na makulu* ya bambwa;+
21 Gulusa mono na munoko ya ntambu+ mpi na bibongo ya bampakasa;Pesa mvutu mpi gulusa mono.
22 Mono ta zabisa zina na nge na bampangi na mono;+Mono ta kumisa nge na kati ya dibundu.+
23 Beno bantu yina ke waka Yehowa boma, beno kumisa yandi!
Beno yonso bana* ya Yakobi, beno pesa yandi nkembo!+
Beno yonso bana* ya Izraele, beno telama na boma sambu na yandi.
24 Sambu yandi me vweza ve mpi me seka ve mpasi ya muntu ya bo ke niokula;+Yandi me bumbila yandi ve luse na yandi.+
Ntangu yandi didilaka yandi sambu na kulomba lusadisu, yandi waka.+
25 Mono ta kumisa nge na kati ya dibundu ya nene;+Mono ta lungisa balusilu na mono na ntwala ya bantu yina ke waka yandi boma.
26 Bantu ya kudikulumusa ta dia mpi ta fuluka;+Bantu yina ke sosaka Yehowa ta kumisa yandi.+
Bika beno vanda na luzingu* kimakulu.
27 Ntoto ya mvimba ta yibuka mpi ta baluka na Yehowa.
Mabuta yonso ya makanda ta fukama na ntwala na nge.+
28 Sambu kimfumu kele ya Yehowa;+Yandi ke yalaka makanda.
29 Bamvwama yonso* ya nsi-ntoto ta dia mpi ta fukama;Bantu yonso yina ke kulumuka na mfututu ta fukimina yandi;Muntu mosi ve na kati na bo lenda tanina luzingu* na bo.
30 Bana* na bo ta sadila yandi;Bo ta zabisa ndonga ya bantu yina ke kwisa mambu ya me tala Yehowa.
31 Bo ta kwisa mpi ta tubila lunungu na yandi.
Bo ta zabisa bantu yina me butuka ntete ve mambu yina yandi me sala.
Banoti na nsi ya lutiti
^ Ziku yo kele noti ya miziki to mutindu ya kubula miziki.
^ To “Nge me vanda na kiti ya kimfumu na kati (na zulu) ya bankunga ya lukumu ya Izraele.”
^ Na kisina, “bo lembaka ve nitu.”
^ To “ke pesa mono nsoni.”
^ Na kisina, “bo me losaka mono na zulu na nge.”
^ To “moyo na mono.”
^ Na kisina, “Mono mosi kaka,” yandi ke tubila moyo to luzingu na yandi.
^ Na kisina, “diboko.”
^ Na kisina, “nkuna.”
^ Na kisina, “nkuna.”
^ Na kisina, “Bika ntima na beno kuzinga.”
^ Na kisina, “Bantu yonso ya mafuta.”
^ To “mioyo.”
^ Na kisina, “Nkuna.”
