Baka ntete kikesa na bangogo yai: Nzambi ke monaka bampasi yina bantu ke mona bubu yai na nsi-ntoto mpi yandi ke kana kusala kima mosi sambu na yo. (Nkunga 72:13, 14) Na Biblia, Ndinga na yandi, Nzambi ke tuba nde ‘bantu yina ke mona mpasi, yandi ta lembika bo.’ Inki ntangu? “Ntangu Mfumu Yezu ta monana na zulu ti bawanzio na yandi ya ngolo . . ., ntangu yandi ta vutula mbi na bantu yina me zaba ve Nzambi mpi na bantu yina ke lemfukaka ve na nsangu ya mbote ya Mfumu na beto Yezu.” (2 Batesalonika 1:7, 8) Yezu ta monana na bilumbu ke kwisa na bitumba yina Biblia ke binga “bitumba ya kilumbu ya nene ya Nzambi Nkwa-Ngolo Yonso,” to “Armagedoni.”—Kusonga 16:14, 16.

Na bitumba yina, Nzambi ta sadila ve bantu kansi yandi ta sadila Mwana na yandi, Yezu Kristu, ti bigangwa ya nkaka ya kimpeve sambu na kunwanisa bantu ya mbi. Bigangwa yai ta sukisa mambu yonso ya nku.—Yezaya 11:4; Kusonga 19:11-16.

Tii bubu yai, Nzambi me sobaka ve mutindu na yandi ya kutadila bitumba. Yandi ke monaka kaka nde bitumba kele mwaye mosi ya mbote ya kusukisa mambu ya mbi mpi ya nku. Kansi, mutindu yo ke salamaka banda ntama, Nzambi muntu ke zabisaka ntangu bantu fwete nwana bitumba mpi nani fwete nwana bitumba. Bonso beto me mona yo, Nzambi me bakaka dezia lukanu nde bitumba ya ta sukisa mambu ya mbi mpi ya ta pesa ndola na bantu yina ke niokula bantu  ya nkaka ta salama na bilumbu ke kwisa mpi Mwana na yandi Yezu Kristu muntu ta nwana bitumba yango. Yo ke ntendula nde Nzambi ke ndimaka ve bitumba ya bantu ke nwana bubu yai na ntoto, ata bantu yango ke mona nde bo kele ti kikuma ya mbote ya kunwana bitumba yango.

Beto baka mbandu: Yindula nde bana zole ya dibuta mosi me yantika kunwana ntangu papa na bo kele ve na nzo. Na ntangu mosi buna, bo me bika kunwana mpi bo me binga papa na bo na telefone. Mwana mosi me tuba nde mpangi na yandi muntu yantikaka kunwanisa yandi, kansi yina ya nkaka me tuba nde mpangi na yandi muntu yantikaka kusosila yandi. Bo zole me zabisa papa na bo makambu sambu yandi sadisa bo mpi konso muntu ke tula ntima nde papa ta kotila yandi. Kansi, ntangu papa na bo me wa bo, yandi me zabisa bo na kunwana diaka ve mpi na kuvingila yandi tii kuna yandi ta vutuka na nzo sambu na kumanisa makambu. Bana yango me yambula kunwana sambu na ntangu fioti. Kansi na nima, bo me yantika diaka kunwana. Ntangu papa me vutuka na nzo, yandi me sepela ve ata na mwana mosi mpi yandi me pesa bo zole ndola sambu bo buyaka kulemfukila yandi.

Bubu yai, bansi yina ke nwanaka bitumba ke sambaka Nzambi mbala mingi sambu yandi sadisa bo na kununga bitumba. Kansi, Nzambi ke kotaka ve na bitumba yina bansi ke nwanaka bubu yai. Yandi ke tuba na Biblia, Ndinga na yandi, nde: “Beno vutula mbi sambu na mbi ata na muntu mosi ve,” mpi “[Beno] vutula ve mbi sambu na mbi.” (Baroma 12:17, 19) Diaka, yandi me monisaka nde bantu fwete “vingila yandi ti ntima-nda” sambu yandi sukisa mambu ya nku na Armagedoni. (Nkunga 37:7, noti na nsi ya lutiti) Na kisika ya kuvingila Nzambi sambu yandi sukisa mambu ya nku, makanda ke nwana bitumba na mpila na bo. Nzambi ke monaka bitumba yango mbi mpi yo ke sepedisaka yandi ve. Yo yina, Nzambi ta wa makasi na Armagedoni mpi ta sukisa mavwanga ya kele na makanda kimakulu. Yandi ta sala yo ntangu yandi ta “sukisa bitumba na ntoto ya mvimba.” (Nkunga 46:9; Yezaya 34:2) Ya kieleka, Armagedoni ta vanda bitumba yina ta sukisa bitumba yonso.

Kusukisa bitumba kele lusakumunu mosi na kati ya balusakumunu mingi yina Kimfumu ya Nzambi ta nata. Yezu tubilaka Kimfumu yango na kisambu na yandi ya me zabanaka mingi. Yandi tubaka nde: “Kimfumu na nge kukwisa. Luzolo na nge kusalama na ntoto, bonso na zulu.” (Matayo 6:10) Kimfumu ya Nzambi ta sukisa bitumba yonso mpi ta katula mambu ya mbi * ya ke vandaka na kisina ya bitumba. (Nkunga 37:9, 10, 14, 15) Yo yina, yo ke yitukisa mpenza ve na kumona balongoki ya Yezu ke vingila na mpusa yonso balusakumunu ya Kimfumu ya Nzambi.—2 Piere 3:13.

Kansi, beto fwete vingila bantangu ikwa sambu Kimfumu ya Nzambi kusukisa bampasi, mambu ya nku, mpi mambu ya mbi yonso? Kulungana ya bambikudulu ya Biblia ke monisa nde beto ke zinga na “bilumbu ya nsuka” ya ngidika yai ya bima. (2 Timoteo 3:1-5) * Ntama mingi ve na nsadisa ya bitumba ya Armagedoni, Kimfumu ya Nzambi ta tula nsuka na bilumbu yai ya nsuka.

Mutindu beto me mona yo, bantu yina ta fwa na bitumba yai ya nsuka ta vanda bayina “ke lemfukaka ve na nsangu ya mbote ya Mfumu na beto Yezu.” (2 Batesalonika 1:8) Kansi, kuvila ve nde Nzambi ke waka ve kiese na lufwa ya bantu, ata ya bantu ya mbi. (Ezekiele 33:11) Sambu “yandi ke zola ve nde ata muntu mosi kufwa” na bitumba yai ya nsuka, yandi ke sala nde beto samuna nsangu ya mbote ya me tala Mfumu Yezu “na ntoto ya mvimba sambu na kuta kimbangi na makanda yonso” na ntwala nde nsuka kukwisa. (2 Piere 3:8, 9; Matayo 24:14; 1 Timoteo 2:3, 4) Ya kieleka, na nsadisa ya kisalu ya kusamuna yina Bambangi ya Yehowa ke salaka na ntoto ya mvimba, bantu kele ti dibaku bubu yai ya kuzaba Nzambi, ya kulemfuka na nsangu ya mbote ya me tala Yezu, mpi ya kuzinga na kilumbu yina bitumba ta vanda diaka ve.