Keti nge ke ndima ve nde kana bantu ke sala mambu ya mbi, baluyalu na bo mpi ta vanda ya mbi? Kana yo ke mutindu yina, luyalu yina ta sala ve mambu ya mbi fwete katuka ve na bantu. Biblia ke monisa nde luyalu yango kele Kimfumu ya Nzambi, luyalu yina Yezu longaka balongoki na yandi na kusamba sambu na yo.—Matayo 6:9, 10.

Kimfumu ya Nzambi kele luyalu mosi ya kieleka ya ke yala na zulu. Yo ta yinga baluyalu yonso ya bantu. (Nkunga 2:8, 9; Kusonga 16:14; 19:19-21) Lusakumunu ya nkaka yina Kimfumu yango ta natila bantu kele kukatula baluyalu yina ke salaka mambu ya mbi. Beto tadila mambu sambanu ya ke ndimisa beto nde Kimfumu ya Nzambi ta manisa mambu ya mbi.

DIAMBU YA MPASI: Mbongo ya baluyalu ke sadilaka ke katukaka na bitadi mpi na bampaku yina bantu ke futaka. Sambu mbongo ke kotaka mingi, yo ke pusaka bamfumu ya nkaka na kuyiba. Bamfumu ya nkaka ke ndimaka kubaka avoka na bantu yina ke zolaka nde bo kitisila bo bampaku to mbongo ya nkaka yina leta fwete baka. Mambu ya mutindu yai lenda basisa diaka mambu ya nkaka ya mbi: Baluyalu ke matisa bampaku sambu na kuvutula mbongo ya ke vila mpi diambu yai ke salaka nde bantu  kukuma kupesa diaka avoka mingi. Kana mambu ke salama mutindu yai, bantu ya masonga lenda niokwama mingi.

MUTINDU YA KUMANISA YO: Kiyeka ya Kimfumu ya Nzambi ta katuka na Yehowa nkwa-ngolo yonso. * (Kusonga 11:15) Kimfumu yai ta lomba ve bantu bampaku sambu yo twadisa bisalu na yo. Ngolo ya Nzambi ya ke pesaka boma mpi kikalulu na yandi ya kukaba ke ndimisa beto nde Kimfumu na yandi ta lungisa bampusa ya bantu yonso.—Yezaya 40:26; Nkunga 145:16.

DIAMBU YA MPASI: Susan Rose-Ackerman ya beto tubilaka na disolo ya me luta ke tuba nde bikesa sambu na kusukisa mambu ya mbi “fwete yantika na bamfumu.” Bantu ke tudilaka diaka ve baluyalu ntima ntangu baluyalu ke bikaka bamfumu ya nene kusala mambu ya mbi kansi bo ke buyisa mambu yango na bapolisi mpi na bantu ya dwane. Ata bamfumu ya mbote mpi ke bwaka na mutambu yai sambu bo kele bantu ya kukonda kukuka. Mutindu Biblia ke tubaka, “ke na muntu ve awa na nsi-ntoto ke salaka mambu yonso mbote konso ntangu.”—Longi 7:20.

MUTINDU YA KUMANISA YO: Yezu Kristu, muntu ya Nzambi me ponaka sambu na kuvanda Mfumu ya Kimfumu na yandi me swaswana ti bantu ya kukonda kukuka sambu yandi ta sala ve mambu ya mbi. Yezu monisaka diambu yai ntangu yandi buyaka “bimfumu yonso ya nsi-ntoto ti nkembo na yo” yina Satana pesaka yandi. Diabulu mfumu ya nsi-ntoto yai zolaka nde Yezu kusambila yandi sambu yandi pesa Yezu bimfumu yai yonso. (Matayo 4:8-10; Yoane 14:30) Ata Yezu niokwamaka tii na lufwa, yandi bikalaka ya kwikama. Yandi buyaka vinu yina zolaka kulembika mpasi na yandi mpi kubebisa mabanza na yandi ya mbote. (Matayo 27:34) Banda Nzambi futumunaka yandi sambu na kuzinga na zulu, Yezu me monisaka nde yandi me fwana na kuvanda Mfumu ya Kimfumu ya Nzambi.—Bafilipi 2:8-11.

DIAMBU YA MPASI: Bansi mingi ke salaka vote mbala na mbala sambu na kukatula bamfumu ya mbi. Na kutuba ya mbote, bakampanye mpi ba vote ke salamaka mbote ve ata na bansi ya kutoma. Na nsadisa ya mbongo ya bantu ke pesaka sambu na bakampanye mpi ya bisalu ya nkaka, bamvwama lenda vanda na bupusi ya ngolo na bamfumu ya ke yala to na bamfumu ya mpa.

John Paul Stevens, Zuzi ya Tribinale ya Nene na États-Unis sonikaka nde bupusi ya mutindu yai “ke fwaka bansiku, ke bebisaka Luyalu mpi mabanza ya bantu.” Yo ke yitukisa ve kana bantu mingi na ntoto ya mvimba ke tuba nde baparti politiki ke salaka mambu mingi ya mbi kuluta bimvuka yonso.

MUTINDU YA KUMANISA YO: Na Kimfumu ya Nzambi, bakampanye mpi mambu ya luvunu yina ke salamaka na vote ta vanda diaka ve sambu Kimfumu yango ta yala kimakulu. (Daniele 7:13, 14) Sambu Nzambi muntu me ponaka Mfumu na yo, bantu ta sala diaka ve ba vote sambu na kupona  mfumu ya nkaka mpi bo ta katula yandi ve na Kimfumu. Sambu ngemba ta vanda, yo ke ndimisa beto nde mambu yina Kimfumu ta sala ta natila bantu mambote ya kimakulu.

DIAMBU YA MPASI: Nge lenda yindula nde kubasisa bansiku ya mpa lenda tomisa mambu. Kansi, bantu ya mayele me monaka mbala mingi nde kana bo ke yika bansiku mingi, yo ke pesaka bantu nzila ya kusala mambu mingi ya mbi. Diaka, bansiku yina luyalu ke tulaka sambu na kufiotuna avoka ke nataka diaka mambu mingi ya mbi.

MUTINDU YA KUMANISA YO: Bansiku ya Kimfumu ya Nzambi me luta yina ya baluyalu ya bantu. Mu mbandu, na kisika ya kusala listi ya nda ya bansiku, Yezu pesaka nsiku yai ya bo ke bingaka nde Munsiku ya Wolo. Yandi tubaka nde: “Mambu yonso yina beno ke zola nde bantu kusadila beno, beno mpi fwete sadila bo yo.” (Matayo 7:12) Diambu ya mfunu kele nde bansiku ya Kimfumu ya Nzambi ke tadila bangindu yina ke pusaka muntu na kusala mambu mpi mambu ya yandi ke sala. Yezu tubaka nde: “Nge fwete zola nkweno na nge bonso nge mosi.” (Matayo 22:39) Sambu Nzambi ke talaka ntima, yandi lenda sala nde bantu kuzitisa bansiku ya mutindu yai.—1 Samuele 16:7.

DIAMBU YA MPASI: Bwimi to lukasi ke pusaka bantu na kusala mambu ya mbi. Mbala-mingi, bamfumu ya leta mpi bantu ya nkaka ke vandaka ti bikalulu yai ya mbi. Mu mbandu, na magazini ya nene yina bwaka na Séoul ya beto me tubila na disolo ya me luta, kimvuka mosi ya ke tungaka banzo monaka nde kusumba bima ya ntalu ya kutungila ta basisa mbongo mingi, yo yina bo pesaka bamfumu ya leta avoka sambu bo tunga magazini yango ti bisadilu ya me fwana ve mpi na mutindu yo lombamaka ve.

Sambu na kusukisa mambu ya mbi, bo fwete longa bantu mutindu ya katula bangindu ya mbi ya me kangamaka ngolo na mabanza na bo, mu mbandu bwimi to lukasi. Kansi, baluyalu ya bantu kele ve ti luzolo mpi makuki ya kusadila manaka ya mutindu yai sambu na kulonga bantu.

 MUTINDU YA KUMANISA YO: Kimfumu ya Nzambi ta katula mambu ya mbi kimakulu sambu yo ke longaka bantu mutindu ya kukatula bangindu ya mbi ya ke pusaka bo na kusala mambu ya mbi. * Malongi yai ke sadisa bo na “kukuma ya mpa na ngolo yina ke twadisaka mabanza na [bo].” (Baefezo 4:23) Bo ke longukaka na kubika kikalulu ya bwimi, lukasi mpi ke kunaka kikalulu ya kusepela ti bima ya bo kele na yo mpi ke sosaka mambote ya bantu ya nkaka.—Bafilipi 2:4; 1 Timoteo 6:6.

DIAMBU YA MPASI: Ata na kisika ya kuluta mbote yina bo ke longaka bantu bikalulu ya mbote, bantu ya nkaka ke vandaka ve masonga mpi bikalulu na bo ke bebaka. Diambu yai ke pusaka bantu ya mayele na kundima nde baluyalu ya bantu lenda sukisa ve mambu ya mbi. Baluyalu mingi ke tulaka kivuvu nde bo lenda fiotuna mambu ya mbi ti malanda na yo.

MUTINDU YA KUMANISA YO: Kimvuka ya Nations unies ya ke nwanisaka mambu ya mbi na baluyalu ke tuba nde sambu baluyalu kumanisa mambu ya mbi, bo fwete siamisa bantu na kuvanda ya “kwikama, masonga mpi na kubaka mikumba na bo na maboko.” Lukanu yai kele ya mbote mpi Kimfumu ya Nzambi ke sukaka ve kaka na kusiamisa bikalulu yai, kansi yo ke lombaka bantu na yo na kumonisa bikalulu yango. Biblia ke tuba nde “bantu ya lukasi” mpi ‘bantu ya luvunu’ ta kota ve na Kimfumu ya Nzambi.—1 Bakorinto 6:9-11; Kusonga 21:8.

Bantu lenda longuka kuzitisa minsiku yai ya kuzanguka mutindu Bakristu ya ntete zitisaka yo. Mu mbandu, ntangu longoki mosi na zina Simoni zolaka kupesa bantumwa mbongo sambu na kubaka mpeve santu, bo buyaka mbongo yina mpi zabisaka yandi nde: “Balula ntima na mambu na nge ya mbi.” Sambu Simoni bakisaka bampusa na yandi ya mbi, yandi lombaka bantumwa na kusambila yandi sambu yandi katula kikalulu yina.—Bisalu 8:18-24.

Bantu ya bansi yonso kele ti dibaku ya kukota na Kimfumu ya Nzambi. (Bisalu 10:34, 35) Malongi yina Kimfumu ya Nzambi ke longaka na ntoto ya mvimba bubu yai ta sadisa nge na kukuma muntu ya Kimfumu. Bambangi ya Yehowa ta vanda na kiese ya kulonguka ti nge Biblia mpi kulonguka yango lenda baka minuta kumi konso mposo. Nge lenda longuka mambu mingi ya me tala “nsangu ya mbote ya Kimfumu ya Nzambi,” mpi mutindu yo ta katula mambu ya mbi yina baluyalu ke salaka. (Luka 4:43) Beto ke lomba nge na kukutana ti Bambangi ya kisika ya nge ke zingaka to kota na site Internet na beto jw.org.