Banduku ya ngolo ke solulaka mbala na mbala na nzila ya telefone, ya ba message na Internet, ya video, ya mikanda to kimuntu-kimuntu. Yo yina, sambu na kukwenda pene-pene na Nzambi, beto fwete solula ti yandi mbala na mbala. Nki mutindu?

Beto lenda solula ti Yehowa na nzila ya kisambu. Kansi, kusamba Nzambi me swaswana ti mutindu beto ke solulaka ti banduku. Beto fwete zaba nde ntangu beto ke samba, beto ke solula ti Ngangi na beto, Muntu ya Kuluta Kuzanguka na luyalanganu. Diambu yai fwete pusa beto na kusamba yandi na luzitu yonso. Sambu Nzambi kuwa bisambu na beto, beto fwete lungisa mambu ya yandi ke lombaka. Beto tadila mambu tatu.

Ya ntete, beto fwete samba Yehowa Nzambi mpamba kansi beto fwete samba ve Yezu, “basantu” to bifwanisu. (Kubasika 20:4, 5) Biblia ke tuba pwelele nde: “Na mambu yonso na nzila ya kisambu mpi ya dodokilu kumosi ti kupesa matondo, beno zabisa balombilu na beno na Nzambi.” (Bafilipi 4:6) Ya zole, beto fwete samba na zina ya Yezu Kristu, Mwana ya Nzambi. Yezu yandi mosi tubaka nde: “Ata muntu mosi ve ke kwisaka na Tata kana yandi kwisa ve na nzila na mono.” (Yoane 14:6) Ya tatu, bisambu na beto fwete wakana ti luzolo ya Nzambi. Biblia ke tuba nde: “Konso kima yina beto ke lomba na kuwakana ti luzolo na yandi, yandi ke wa beto.” *—1 Yoane 5:14.

Ya kieleka, kinduku ta fwa kana nduku mosi mpamba ke sala ngolo sambu na kusolula ti nduku ya nkaka. Kaka mutindu banduku zole ke sepelaka na kusolula, beto fwete pesa Nzambi nzila ya kusolula ti beto mpi beto fwete widikila yandi ntangu yandi ke tuba. Keti nge ke zaba mutindu Nzambi ke solulaka ti beto?

Bubu yai, Yehowa Nzambi “ke solulaka” ti beto na nzila ya Ndinga na yandi, Biblia. (2 Timoteo 3:16, 17) Sambu na nki beto ke tuba mutindu yai? Beto baka mbandu: Yindula nde nduku na nge ya ngolo me tindila nge mukanda. Ntangu nge me tanga yo, nge lenda zabisa bantu ya nkaka na kiese yonso nde: “Nduku na mono me zabisa mono mambu yai!” Nge me solula ve ti nduku na nge kimuntu-kimuntu kansi nge me solula ti yandi na nsadisa ya mukanda. Mutindu mosi, kana nge ke tanga Biblia, nge ke pesa Yehowa nzila ya kusolula ti nge. Diaka, Gina ya beto me tubila na disolo ya ntete ke tuba nde: “Mono me mona nde kana mono ke zola kukuma nduku ya Nzambi, mono fwete tanga Biblia, ‘mukanda’ yina yandi me tindilaka beto.” Yandi ke yika nde: “Kutanga Biblia konso kilumbu me sadisaka mono na kukwenda pene-pene na Nzambi.” Keti nge ke tangaka Biblia, Ndinga ya Yehowa konso kilumbu sambu na kupesa yandi nzila ya kusolula ti nge? Kana nge ke sala mutindu yina, yo ta sadisa nge na kudiwa pene-pene na Nzambi.