Mono butukaka mpi yelaka na babwala yina vandaka na nziunga ya Roma, kisika bansukami vandaka kuzinga. Luzingu vandaka mpasi. Mono zabaka ve mama yina butaka mono mpi mono vandaka ve ti bangwisana ya mbote ti papa. Mono kumaka kuzinga na bala-bala.

Ntangu mono lungisaka bamvula kumi, mono vandaka dezia muyibi. Ntangu mono kumaka ti bamvula 12, mono tinaka nzo sambu na mbala ya ntete. Mbala mingi, papa vandaka kubasisa mono na boloko mpi kuvutula mono na nzo. Mono vandaka kuswana ti bantu mbala na mbala—mono vandaka mubulu mpi vandaka kuwila bantu yonso makasi. Ntangu mono lungisaka bamvula 14, mono tinaka nzo kimakulu. Mono yantikaka kunwa bima ya ke lausaka mpi kuzinga na bala-bala. Sambu mono vandaka ve ti kisika ya kulala, mono vandaka kukota na bakamio na kingolo-ngolo mpi kulala tii na suka. Na nima, mono vandaka kusosa kisika yina masa ke basikaka sambu na kuyobila.

Mono kumaka muyibi ya ngolo—kubotula basakosi ya bantu na kingolo-ngolo mpi kuyiba na banzo ya nene na mpimpa. Bantu kumaka kutuba mambu ya mbi sambu na mono mpi ntangu fioti na nima, mono kotaka na kimvuka mosi ya bantu ya mubulu, yina pesaka mono “nzila” ya kuyiba na babanki. Sambu mono vandaka mubulu mingi kibeni, bantu ya kimvuka yina kumaka kuzitisa mono mingi. Mono vandaka kutambula ti munduki na mono konso kisika. Na ntangu ya kulala, mono vandaka kutula yo na nsi ya kuse. Mono kumaka kusala mubulu, kunwa bima ya ke lausaka, kuyiba, kusadila kutuba ya mbi mpi kusala pite. Bapolisi vandaka kusosa mono konso ntangu. Mbala mingi, bo vandaka kukanga mono mpi mono vandaka kusala bamvula mingi na boloko.

Kilumbu mosi ntangu bo basikaka mono na boloko, mono bakaka lukanu ya kukwenda kutala mama leki. Mono zabaka ve nde mama leki ti bana na yandi zole me kumaka Bambangi ya Yehowa. Bo bingisaka mono na lukutakanu na bo. Sambu mono zolaka kuzaba mambu mingi, mono kwendaka ti bo. Ntangu beto kumaka  na Nzo ya Kimfumu, mono vandaka pene-pene ya kielo sambu na kumona bantu ya ke kota mpi ya ke basika. Mono vandaka mpi ti munduki na mono.

Lukutakanu yina sobaka luzingu na mono. Mono ke yibuka diaka nde kilumbu yina mono kudimonaka na kisika ya nkaka. Bantu vandaka kupesa mono mbote na kiese mpi na mawete yonso. Mambu ya mbote mpi ya masonga yina mono monaka na Bambangi ya Yehowa bikalaka na mabanza na mono. Mambu yai swaswanaka kibeni ti mambu yina mono vandaka kumona na bisika ya nkaka!

Mono yantikaka kulonguka Biblia ti Bambangi. Ntangu mono vandaka kulonguka, yo sadisa mono na kusoba mutindu na mono ya kuzinga. Bangogo yina kele na Bingana 13:20 simbaka ntima na mono: “Kana nge landa bantu ya mayele, nge ta kuma mpi mayele; kana nge landa bazoba, nge mpi ta kuma zoba.” Mono bakisaka nde mono fwete kabwana ti kimvuka ya bantu ya mubulu. Yo vandaka ve diambu ya pete, kansi Yehowa sadisaka mono mpi mono nungaka.

Mono sobaka mpi kimuntu na mono yonso ya nganda. Mono salaka bikesa mingi sambu na kuyambula kunwa makaya mpi bima ya ke lausaka. Mono zengaka nsuki, katulaka bima ya makutu mpi yambulaka kutuba ya mbi. Yo vandaka mbala ya ntete ya mono yantikaka kuyala mambu ya mono vandaka kusala.

Ntete, mono vandaka kuzola ve kutanga mpi kulonguka, yo yina yo vandilaka mono mpasi na kutula mabanza kisika mosi sambu na kulonguka Biblia. Kansi, sambu mono salaka bikesa, mono kumaka kuzola Yehowa mpi kimuntu na mono ya kati sobaka—kansansa na mono yantikaka kuyangisa mono. Mbala na mbala mono vandaka ti mabanza ya mbi sambu na mono mosi mpi vandaka kundima ve nde Yehowa lenda lolula mono sambu na mambu yonso ya mbi ya mono salaka. Na bantangu yina, mono bakaka kikesa ntangu mono vandaka kutanga mutindu Yehowa lolulaka Ntotila Davidi yina salaka masumu ya nene.—2 Samuele 11:1–12:13.

Kima ya nkaka ya pesaka mono mpasi vandaka kusamuna nzo na nzo. (Matayo 28:19, 20) Mono vandaka kuwa boma nde mono ta kutana ti muntu yina mono salaka mbi to ya mono monisaka mpasi na mutindu mosi buna na ntangu ya ntama! Kansi, malembe-malembe mono vandaka diaka ve kuwa boma. Mono yantikaka kuwa kiese na kusadisa bantu ya nkaka na kulonguka mambu ya me tala Tata na beto ya zulu, yina ke lolulaka.

Kulonguka mambu ya me tala Yehowa me gulusaka luzingu na mono! Banduku na mono ya ntama me fwaka mpi bankaka kele na boloko, kansi mono kele ti luzingu ya kiese mpi kivuvu sambu na bilumbu yina ke kwisa. Mono me longukaka na kumonisa kudikulumusa, bulemfu mpi kuyala kikalulu na mono ya mubulu. Yo yina, mono me kumaka ti bangwisana ya mbote ti bantu ya nziunga na mono. Mono kele na kiese sambu mono me kwelaka Carmen, nkento mosi ya mbote. Beto ke vandaka na kiese ya kusadisa bantu ya nkaka na kulonguka Biblia.

Bubu yai, mono ke salaka kisalu na masonga—bantangu ya nkaka mono ke salaka na babanki. Kansi na kisika ya kuyiba kuna, mono ke tulaka bunkete!