Mono butukaka na Bilbao na nordi ya Espagne, kisika bantu vandaka ti mbongo mingi ve. Mono vandaka mwana ya zole. Dibuta na beto vandaka Bakristu ya ngolo ya dibundu ya Katolika mpi beto vandaka kukwenda na Misa konso kilumbu. Ntangu mono kumaka ti bamvula 23, mono kumaka longi—kisalu yina mono vandaka kuzola mingi mpi mono landaka kusala yo na nsungi ya bamvula 40. Katula kilongi, mono vandaka ti kiese ya kulonga malongi ya dibundu ya Katolika, mpi na nkokila mono vandaka kusala bonso mama malongi—kulonga bana-bankento sambu bo baka mbundana.

Na nima ya bamvula 12 ya makwela ya kiese, mono kumaka mufwidi mpi mono bikalaka ti bana-bankento iya. Ntangu yina mono vandaka ti bamvula 33 mpamba! Mono mekaka kubaka ndembikilu na lukwikilu ya Katolika, kansi bangiufula mingi vandaka kaka kuyangisa mono. Mono vandaka kudiyula nde: ‘Sambu na nki bantu ke fwaka kana Kristu pesaka moyo na yandi sambu na bo? Sambu na nki beto ke sambaka nde Kimfumu ya Nzambi kukwisa kana bantu ya mbote ta kwenda na zulu?’ Mono vandaka kuyindula nde: ‘Kana Nzambi ke sambisaka bantu ntangu bo ke fwaka, sambu na nki diaka bo fwete katuka na zulu, na kombelo to na bilungi sambu na lusambisu ya nsuka?’

Mono yulaka mimpe mingi yina mono zabaka bangiufula yai. Mumpe mosi pesaka mono mvutu nde: “Mono me zaba ve. Yula episikopo. Keti diambu yango kele mfunu? Nge ke kwikilaka dezia na Nzambi, mpidina ve? Yambula ka nge!” Kansi mono landaka kusosa bamvutu. Na nima, mono kwendaka kuvukana ti ba Jésuite, ba Pantekotiste, mpi ba Agnostique. Ata dibundu mosi ve pesaka bamvutu ya mbote na bangiufula na mono.

Ntangu mono vandaka ti bamvula kuluta 60, mwana nzo-nkanda mosi ya bamvula nsambwadi bingisaka mono na lukutakanu mosi ya Bambangi ya Yehowa. Mambu yina mono waka mpi monaka sepedisaka mono, kansi sambu mono vandaka ti mambu mingi ya kusala, mono kutanaka diaka ve ti Bambangi ya Yehowa. Bamvula zole na nima, Juan ti Maite bankwelani yina vandaka Bambangi ya Yehowa kokulaka na kielo na mono. Na nsungi ya bangonda tatu, mono yulaka bo bangiufula mpi bo pesaka mono bamvutu; nsuka-nsuka mono yantikaka kulonguka Biblia.

 Masolo yina yonso vandaka kusepedisa mono mingi! Mono vandaka kusala bansosa ya siki-siki na nsadisa ya bambalula tatu ya Biblia sambu na kuzikisa kana Bambangi ya Yehowa vandaka kulonga kieleka. Na nima, mono bakisaka nde malongi ya mabundu yina mono longukaka bamvula mingi vandaka ya luvunu. Mono kumaka kisaka-saka sambu na baluswaswanu yina vandaka na kati ya malongi na mono ya ntama ti mambu ya mono vandaka kulonguka na Biblia. Yo vandilaka mono mpasi kibeni na kukatula malongi na mono yina vandaka bonso misisa ya nti ya me kangamaka ngolo na ntoto.

Na nima, bakala ya zole ya kwelaka mono belaka ngolo mpi fwaka. Kaka na ntangu yina, mono yambulaka kisalu na mono mpi katukaka na Bilbao sambu na ntangu fioti. Juan ti Maite katukaka mpi kuna. Mono waka mawa mutindu mono yambulaka kulonguka Biblia. Kansi, mono bakisaka nde mono sengumunaka kimvwama. Mono vilaka yo ve.

Kiteso ya bamvula 20 na nima, ntangu mono kumaka ti bamvula 82, Juan ti Maite vutukaka na Bilbao mpi kwisaka kutala mono. Mono waka kiese kibeni ya kumona bo diaka! Mono bakisaka nde Yehowa me vilaka mono ve, mpi mono vutukilaka kulonguka Biblia. Juan ti Maite monisilaka mono ntima-nda, mutindu mono vandaka kuyula bangiufula ya mutindu mosi mbala na mbala. Mono vandaka na mfunu ya kuwa bangindu ya Biblia mbala na mbala sambu na kuzenga bangwisana na mono ti balukwikilu na mono ya ntama. Mono zolaka mpi kudibongisa mbote sambu na kutendula kieleka ya Biblia na banduku mpi na bantu ya dibuta na mono.

Nsuka-nsuka mono bakaka mbotika na lukutakanu ya Bambangi ya Yehowa ti bamvula 87—mono vandaka na kiese mingi kilumbu yina. Nkuluntu mosi salaka disolo yina simbamaka na Biblia, mingi-mingi sambu na beto bantu yina bakaka mbotika. Disolo yango didisaka mono. Mono landaka yo bonso nde Yehowa vandaka kutubila mono. Na nima ya kubaka mbotika, Bambangi mingi kwisaka mpi sikisaka mono—ata bayina zabaka mono ntete ve!

Mono vandaka kubakisa mbala na mbala nde Yezu Kristu kele “nzila.” (Yoane 14:6) Kansi kulonguka ya Biblia sadisaka mono na kubakisa nde Yezu kele muntu yina ke sadisaka beto na kuzaba Yehowa. Ntangu yai mono lenda samba Nzambi bonso Tata mpi Nduku ya ngolo. Kutanga mukanda Approchez-vous de Jéhovah * sobaka luzingu na mono. Na mbala ya ntete mono manisaka kutanga yo na mpimpa mosi! Yo simbaka ntima na mono na kulonguka mutindu Yehowa kele mpenza Nzambi ya mawa.

Kana mono yindula bamvula yina mono vandaka kusosa kieleka, mono ke yibukaka bangogo yai ya Yezu: “Beno landa na kulomba, ebuna bo ta pesa beno; beno landa na kusosa ebuna beno ta mona; beno landa na kubula na kielo, ebuna bo ta kangudila beno.” (Matayo 7:7) Bubu yai, mono me zwaka bamvutu yina mono vandaka kusosa; mono ke vandaka ti kiese ya mingi na kuzabisa yo na bantu ya nkaka.

Ata mono kele ti bamvula 90, mono ke kudimona leke na kimpeve. Kukwenda na balukutakanu na Nzo ya Kimfumu ke vandaka dibaku ya sipesiali sambu na mono—sambu mono ke bakaka nzayilu ya mfunu mingi mpi ke kutanaka ti bampangi ya zola ya babakala ti ya bankento. Mono kele ti mpusa ya kuvanda diaka longi na Paladisu na ntoto yina Nzambi me silaka. (Kusonga 21:3, 4) Diaka, mono ke vingilaka kumona lufutumuku ya bantu yina mono vandaka kuzola, ebuna mono ta vanda ti dibaku ya kulonga bo kieleka ya Biblia. (Bisalu 24:15) Mono kele ti mpusa ya ngolo kibeni ya kutendudila bo dikabu ya mfunu yina Yehowa me pesaka mono na kimununu!