Mono yelaka na kartie mosi ya kinsukami, mbanza mosi yina kele pene-pene ya dibungu ya Turku. Tata na mono nungaka na nsaka ya bokse, mpi mono ti leke na mono ya bakala kudikotisaka na bansaka yina. Ntangu mono vandaka na nzo-nkanda, mono vandaka kunwana mingi. Ntangu mono kumaka toko, mono kotaka na kimvuka mosi ya bantu ya mubulu mpi mono kumaka kunwana ngolo diaka. Mono zabaka miziki yina bo ke bingaka heavy-metal, mpi kumaka na mpusa ya kukuma muyimbi ya nene ya rock.

Yo yina mono sumbaka bangoma, salaka orkestre mosi, mpi kukonda kusukinina mono kumaka ntwadisi mpi muyimbi ya nene ya orkestre yina. Na estrade, mono vandaka kusala mambu ya mubulu mpenza. Bantu kumaka kusadila orkestre na beto piblisite mingi sambu beto vandaka bantu ya mubulu mpi mutindu na beto ya kuzinga vandaka kupesa bantu boma mingi. Beto yantikaka kubula miziki na ntwala ya bantu mingi, mpi beto salaka mwa bakasete mpi bantu sepelaka mingi na bakasete yina beto salaka na nsuka. Na nsuka ya bamvu 1980, beto kwendaka na États-Unis sambu na kutomisa orkestre na beto. Beto bulaka ba concert na New York mpi na Los Angeles na nima ya ntangu fioti mpi na ntwala ya kuvutuka na Finlande beto salaka bangwisana ti bamizisie ya nkaka yina vandaka kubula miziki mbote-mbote.

Ata mono vandaka kusepela kuvanda na orkestre yina, mono vandaka ti mpusa ya ngolo ya kuvanda ti luzingu ya kele ti lukanu. Mono kumaka kusepela diaka ve na kikalulu ya mubulu mpi ya kutesana yina vandaka kumonana na kati ya bamizisie. Luzingu na mono ya mbi kumaka kupesa mono mpasi. Mono kumaka kudimona bonso muntu mosi ya mbi mpenza, mpi mono vandaka kuwa boma ya lufwa na bilungi ya tiya ya ngolo. Yo yina, mono sosaka kuzwa bamvutu na mikanda ya mitindu yonso ya ke tubilaka mambu ya Nzambi mpi mono vandaka kusamba ngolo sambu na kulomba lusadisu ya Nzambi, ata mono vandaka kuzaba nde mono lendaka kusepedisa yandi ve ata fioti.

Sambu na kulungisa bampusa na mono, mono kumaka kusala na biro ya poste. Kilumbu mosi mono kwisaka kuzaba nde, nduku mosi yina beto vandaka kusala ti yandi vandaka Mbangi ya Yehowa. Mono yulaka yandi bangiufula mingi. Bamvutu na yandi ya siki-siki mpi ya me simbama na Masonuku yitukisaka mono ngolo, yo yina mono ndimaka nde yandi longuka Biblia ti mono. Na nima ya kulonguka  na nsungi ya mwa bamposo, orkestre na beto salaka kontra ti muntu mosi yina ndimaka kusadisa beto na kubasisa album na États-Unis. Mono monaka nde yo vandaka dibaku mosi ya mbote na luzingu na mono.

Mono zabisaka Mbangi yina vandaka kulonguka ti mono nde mono ke zola kubasisa kaka album mosi mpi na nima ya kusala yo, mono ta yambula miziki sambu na kusadila minsiku ya Biblia na luzingu na mono. Yandi pesaka mono ve dibanza na yandi kansi yandi lombaka mono kaka na kutanga bangogo ya Yezu yina kele na Matayo 6:24. Verse yango ke tuba nde: “Ata muntu mosi ve lenda sala bonso mpika sambu na bamfumu zole.” Ntangu mono bakisaka ntendula ya bangogo ya Yezu, mono yitukaka ngolo. Kansi na nima ya mwa bilumbu, longi na mono ya Biblia yitukaka ngolo mpi! Mono zabisaka yandi nde sambu mono ke zola kulanda Yezu, mono me katuka na orkestre yina!

Biblia vandaka bonso kitala-tala yina sadisaka mono na kumona bifu na mono. (Yakobo 1:22-25) Mono monaka nde nkadilu na mono vandaka ya mubulu sambu mono vandaka muntu ya lulendo, yina vandaka ti mpusa ya ngolo ya kubaka lukumu. Mono vandaka ti kutuba mosi ya mbi, vandaka kunwana, kunwa makaya mpi kulauka malafu. Ntangu mono bakisaka nde luzingu na mono vandaka ve kuwakana ti minsiku ya Biblia, mono kudiwilaka makasi mpi kudiyangisaka mingi. Ata mpidina, mono ndimaka kusala bansoba.​—Baefezo 4:22-24.

Na luyantiku, mono vandaka kudiyangisa mingi sambu na luzingu na mono ya ntama. Kansi, Mbangi yina vandaka kulonguka ti mono sadisaka mono mingi mpenza. Yandi songaka mono mambu yina Biblia ke tubaka na Yezaya 1:18 nde: “Ata beno ke na batashe mingi ya mbwaki-mbwaki sambu na masumu na beno, mono ta kumisa beno mpembe mpenza bonso mvula ya neze.” Verse yai mpi baverse ya nkaka ya Biblia ndimisaka mono nde Tata na beto ya zulu ke wilaka bantu mawa mpi ke zolaka kubelula bamputa ya bantu yina ke balula ntima na bifu na bo.

Ntangu mono zabaka Yehowa mpi kumaka kuzola yandi, mono waka mpusa ya kudipesa na yandi. (Nkunga 40:9) Mono bakaka mbotika na 1992 na lukutakanu ya Bambangi ya Yehowa ya bansi mingi yina salamaka na St. Petersburg, na Russie.

Mono kumaka ti banduku mingi na kati ya bansadi ya Yehowa. Mbala na mbala, beto ke kutanaka sambu na kubula miziki ya mbote mpi kusepela na dikabu yina Nzambi me pesaka beto. (Yakobo 1:17) Lusakumunu ya sipesiali yina mono me bakaka kele makwela na mono ti Kristina, nkento na mono yina mono ke zolaka mingi. Beto ke salaka kumosi ti yandi mambu mingi. Mu mbandu, bantangu na beto ya kiese mpi ya mpasi tanga mpi mawi na mono ya ngolo.

Kana mono kumaka ve Mbangi ya Yehowa, mbala ya nkaka mono lendaka ve kuvanda na luzingu bubu yai. Na ntama, mono vandaka kudiyangisa ntangu yonso sambu ti babampasi. Ntangu yai, mono kele ti luzingu yina kele ti lukanu ya kieleka mpi mono ke mona nde mambu yonso kele na ndonga.