Ngiufula yai ke basika sambu Yezu silaka muntu mosi ya mbi yina bo fwaka kumosi ti yandi, luzingu na paladisu na makwisa. Yezu zabisaka yandi nde: “Ya kieleka mono ke tubila nge bubu yai nde, Nge ta vanda ti mono na Paladisu.” (Luka 23:43) Simba nde, Yezu tubaka ve kisika paladisu yina ta vanda. Keti Yezu zolaka kutuba nde muntu yina ya mbi ta vanda ti yandi na zulu?

Ntete-ntete, beto tadila kana muntu yina ya mbi lungisaka mambu yina bo ke lombaka sambu na kukwenda na zulu. Bantu yina kele ti kivuvu ya kukwenda na zulu fwete baka mbotika na masa mpi na mpeve santu mpidina bo ta kuma balongoki ya Yezu mpi bana ya Nzambi. (Yoane 3:3, 5) Diaka, bo fwete wakanisa luzingu na bo ti minsiku ya Nzambi ya bikalulu ya mbote mpi kumonisa bikalulu bonso kuvanda masonga, kwikama mpi kuwila bantu mawa. (1 Bakorinto 6:9-11) Bo fwete bikala mpi ya kwikama na Nzambi mpi na Kristu tii na nsuka ya luzingu na bo na ntoto. (Luka 22:28-30; 2 Timoteo 2:12) Kana bo me lungisa mambu yina yonso, bo lenda monisa nde bo me fwana na kufutumuka mpi kubaka mukumba ya nene yina ke vingila bo na zulu, disongidila kusala bonso banganga-nzambi mpi bantotila ti Yezu sambu na kuyala bantu na nsungi ya bamvula funda.​—Kusonga 20:6.

Kansi, muntu ya mbi yina vandaka na lueka ya Yezu vandaka muntu ya mbi luzingu na yandi ya mvimba mpi yandi fwaka bonso ngondi. (Luka 23:32, 39-41) Ya kieleka, yandi monisaka luzitu ntangu yandi zabisaka Yezu nde: “Yibuka mono ntangu nge ta kwisa na Kimfumu na nge.” (Luka 23:42) Ata mpidina, yandi bakaka ve mbotika na masa mpi kumaka ve longoki ya Yezu to mwana ya Nzambi; mpi na luzingu na yandi ya mvimba yandi monisaka ve nde yandi vandaka muntu ya mbote mpi ya kwikama. Keti yo me fwana nde Yezu kusila yandi na kuyala na zulu kumosi ti balongoki na yandi yina bikalaka ya kwikama na Nzambi luzingu na bo ya mvimba?​—Baroma 2:6, 7.

Mu mbandu: Kana muntu mosi yina yibaka mbongo na nge me lomba nge ndolula, mbala ya nkaka nge ta baka lukanu ya kulolula yandi. Kansi, keti yo ke tendula nde nge ta tudila yandi diaka ntima mpi ta pesa yandi mukumba ya kutwadisa mumbongo na nge to kutanina dibuta na nge? Nge ta pesa mikumba ya mutindu yina kaka na bantu yina nge ke tudilaka ntima. Kiteso mosi, bantu yina kele ti kivuvu ya kukwenda na zulu fwete sala mambu yina ke monisa nde bo me fwana na kutudila bo ntima nde bo ta zitisa bansiku ya lunungu ya Nzambi ntangu bo ta yala bantu. (Kusonga 2:10) Kansi, ata muntu yina ya mbi monisaka mwa masonga na minuta ya nsuka, yo ke monisa ve nde yandi lungisaka malombo.

Kansi, keti Yezu zabisaka ve muntu yina ya mbi nde yandi ta vanda ti yandi na zulu kaka na kilumbu yina? Yo lendaka ve kusalama, sambu Yezu yandi mosi kwendaka ve na zulu kilumbu yina. Nkutu, yandi vandaka “na nsi ya ntoto”​—na maziamu​—bilumbu tatu. (Matayo 12:40; Marko 10:34) Ata na nima ya lufutumuku na yandi, yandi bikalaka na ntoto bilumbu 40 na ntwala ya kukwenda na zulu. (Bisalu 1:3, 9) Mpidina, muntu yina ya mbi lendaka ve kuvanda ti Yezu na zulu kaka kilumbu yina.

Kansi, muntu yina ya mbi ta kota na nki paladisu? Na nima ya lufutumuku, yandi ta vanda na paladisu ya ntoto, kisika yina Yezu ta yala. (Bisalu 24:15; Kusonga 21:3, 4) Sambu na kuzaba mambu ya nkaka ya me tala paladisu mpi mambu yina muntu fwete lungisa sambu na kuzinga kuna, solula ti Mbangi mosi ya Yehowa.