Mono butukaka na Moundsville, mbanza mosi ya pima ya kele na lweka ya nzadi Ohio na nordi-westi ya Virginie, na nsi États-Unis. Mono vandaka mwana ya zole. Mpi sambu beto butaka bana-babakala tatu mpi nkento mosi, yo yina nzo na beto vandaka makelele mingi. Bibuti na beto vandaka kusala kisalu ya ngolo mpi bo vandaka bantu ya masonga yina vandaka kuzola ba nkaka. Ata beto vandaka na mbongo mingi ve, beto vandaka ntangu yonso ti bima yina beto vandaka na yo mfunu. Sambu bibuti na beto vandaka Bambangi ya Yehowa, bo salaka yonso sambu na kulonga beto minsiku ya Biblia ntangu beto vandaka baleke.

Kansi, ntangu mono kumaka toko, ntima na mono vandaka kulanda diaka ve mambu yina bo longaka mono. Mono vandaka kundima ve nde muntu lendaka kuvanda ti luzingu ya mbote mpi ya kiese kana yandi ke lemfukila minsiku ya Biblia. Mono yindulaka nde, kuvanda ti kimpwanza ya kusala mambu yonso ke pesaka muntu kiese ya kieleka. Ntete-ntete, mono yambulaka kukwenda na balukutakanu ya Bukristu. Na nima, mpangi na mono ya bakala ti ya nkento, kumaka mpi bankolami bonso mono. Bibuti na beto sala yonso sambu na kusadisa beto, kansi bikesa na bo vandaka ya mpamba.

Na nima ya ntangu fioti, mono bakisaka nde kimpwanza yina mono vandaka kusosa ta natila mono mambu ya mpasi. Kilumbu mosi na nzila ntangu mono vandaka kuvutuka na nzo na nima ya kubasika na nzo-nkanda, nduku mosi pesaka mono dikaya. Mono ndimaka. Tuka kilumbu yina, mono kumaka kundima kusala mambu mingi ya nkaka ya mbi. Nsuka-nsuka, mono kumaka kusadila bima yina ke lausaka, kunwa malafu mpi mono kumaka ti luzingu ya mansoni. Na nima ya bamvula mingi, mono kumaka malembe-malembe kusadila bima ya ngolo yina ke lausaka mpi mono kumaka mpika na yo. Diaka, mono kumaka kuteka bima yo sambu na kulungisa bampusa na mono.

Ata mono vandaka kusala yonso sambu na kukonda kuwidikila kansansa na mono, yo vandaka kuyibusa mono ntangu yonso nde mono vandaka kutwadisa luzingu na mono na mutindu ya mbi. Kansi, mono vandaka kumona nde mambu bebaka mingi dezia mpi mpila ya kusoba vandaka ve. Ata mono vandaka kuvukana ti bantu ya nkaka na bafete mpi na bisika yina bo ke bulaka miziki, mbala mingi mono vandaka kudiwa bonso nde mono kele mono mosi mpi mono vandaka kuniokwama na mabanza. Bantangu ya nkaka, mono vandaka kuyindula bikalulu ya mbote ya bibuti  na mono mpi mono vandaka kudiyula sambu na nki mono me kwendaka ntama mpidina.

Ata mono vandaka kuyindula nde mono ta kuma diaka ve muntu ya mbote, bantu ya nkaka vandaka kaka ti kivuvu. Na mvu 2000, bibuti na mono bingisaka mono na lukutakanu ya distrike ya Bambangi ya Yehowa. Mono kwendaka ti bo ata mono vandaka kuzola mpenza ve. Mono yitukaka na kumona bampangi na mono zole yina kumaka mpi bankolami.

Na lukutakanu, mono yindulaka diaka mutindu mono kwisaka kutala miziki ya rock kiteso ya mvula mosi me luta kaka na kisika yina mosi. Kansi mambu yina mono monaka kuna, simbaka ntima na mono. Ntangu mono kwisaka kutala miziki, kisika yina vandaka ya kufuluka ti bamvindu mpi midinga ya makaya. Mpi bantu mingi yina kwisaka kutala miziki vandaka kuzolana ve mpi bangogo ya bankunga yina bo vandaka kuyimba vandaka mbote ve. Kansi, na lukutakanu ya distrike, mono vandaka na nziunga ya bantu ya kiese mpenza mpi bo yambaka mono na kiese yonso, ata beto vandaka kumonana diaka ve bamvula mingi me luta. Kisika ya lukutakanu vandaka bunkete, mpi bo vandaka kulonga nsangu yina ke pesa kivuvu. Sambu mono monaka bupusi ya mbote yina kieleka ya Biblia vandaka ti yo na zulu na mono, mono kudiyulaka sambu na nki mono buyaka kulanda yo!​—Yezaya 48:17, 18.

Kaka na nima ya lukutakanu yina, mono bakaka lukanu ya kuvutuka na dibundu. Mambu yina bampangi na mono monaka mpi na lukutakanu, pusaka bo na kubaka lukanu ya kuvutuka na dibundu. Beto yonso tatu ndimaka kulonguka Biblia.

Verse yina simbaka mpenza ntima na mono vandaka Yakobo 4:8, yina ke tubaka nde: “Beno kwenda pene-pene na Nzambi, mpi yandi ta kwisa pene-pene na beno.” Mono bakisaka nde kana mono ke zola kukwenda pene-pene na Nzambi, mono fwete soba luzingu na mono. Na kati ya bansoba yina mono salaka, yo lombaka nde mono yambula kunwa makaya, malafu mpi kusadila bima yina ke lausaka.​—2 Bakorinto 7:1.

Mono yambulaka banduku na mono ya ntama mpi kumaka ti banduku ya mpa na kati ya bansambidi ya Yehowa. Nkuluntu yina longaka mono Biblia sadisaka mono mingi. Mbala na mbala, yandi vandaka kubinga mono na telefone mpi kukwisa kutala mono. Bubu yai, yandi kele mosi na kati ya banduku na mono ya ntima.

Na printemps ya mvu 2001, mono bakaka mbotika sambu na kumonisa kudipesa na mono na Nzambi, kumosi ti bampangi na mono yina zole. Yindula kiese yina bibuti na mono mpi mpangi na beto ya nsuka yina bikalaka ya kwikama kuwaka ntangu dibuta na beto ya mvimba kumaka kusambila Yehowa.

Mono vandaka kuyindula nde minsiku ya Biblia vandaka ngolo mingi, kansi ntangu yai mono me kuma kumona yo bonso lutaninu. Biblia pesaka mono ngolo ya kuyambula kusadila bima yina ke lausaka ti kuteka yo mpi kukuma muntu ya mbote.

Mono bakaka dibaku ya kuvanda na kati ya dibuta ya bampangi ya ntoto ya mvimba yina ke sambilaka Yehowa. Bantu yina ke zolanaka mpenza mpi ke sadilaka Nzambi na bumosi. (Yoane 13:34, 35) Na kati ya dibuta yina ya bampangi ya ntoto ya mvimba, mono bakaka lusakumunu mosi ya mfunu mingi​—Adrianne, nkento na mono ya mono ke zolaka mingi. Kusadila Ngangi na beto kumosi ke pesaka beto kiese mingi.

Na kisika ya kusosa kaka mambote na mono mosi, mono me kudipesaka na kisalu ya ntangu yonso mpi kulonga bantu mutindu Ndinga ya Nzambi lenda natila bo mambote. Kisalu yai me natilaka mono kiese ya mingi kuluta. Mono lenda tuba ti kivuvu yonso nde Biblia me sobaka mpenza luzingu na mono. Ntangu yai, mono me zwa kimpwanza ya kieleka.