Mvutu Yina Yezu Pesaka

Bantu mingi ya kesambilaka keyindulaka nde dibundu fwete kota na mambu ya politiki. Bo kendimaka nde dibundu kele ti mukumba ya mfunu na yina metala kusadisa bantu na kumanisa bampasi na bo. Kansi, bantu yankaka ya masonga kendimaka nde dibundu fwete kota ve na mambu ya politiki. Sambu na nge, keti dibundu fwete vanda ti bupusi na mambu ya politiki? Keti yo fwete sala kumosi?

BANTU kemonisaka Yezu Kristu bonso “muntu yina vandaka ti bupusi ya kuluta mingi na disolo ya mabundu ya bantu yonso.” Kana beto yulaka Yezu ngyufula yai: Keti dibundu fwete kota na mambu ya politiki? Inki mvutu yandi zolaka kupesa? Ntangu yandi vandaka na ntoto, Yezu pesaka mvutu na ngyufula yai na bangogo mpi na bisalu na yandi. Mu mbandu, na Disolo na yandi na Zulu ya Ngumba yina mezabanaka mingi, Yezu pesaka minsiku yina sadisaka balongoki na yandi na kubakisa mutindu bo fwete zinga ti bamfinangani na bo. Bika beto tadila mwa mambu yina yandi tubilaka na disolo yina mezabanaka mingi.

Bo Fwete Vanda ti Bupusi na Bantu Yankaka

Yezu tubilaka nkadilu yina balongoki na yandi fwete vanda ti yo na bamfinangani na bo. Yandi tubaka nde: “Beno kele bonso mungwa sambu na bantu. Kana ntomo ya mungwa kumana, nki mutindu bo ta vutula ntomo yango diaka? Mungwa yina ke na mfunu diaka ve, bo fweti losa yo na nganda; kuna, bantu lenda niata yo. Beno kele bonso mwinda sambu na bantu. . . . Mwinda na beno fweti pela na meso ya bantu. Mpidina bo ta mona mambu ya mbote ya beno ke salaka, ebuna bo ta pesa lukumu na Tata na beno kele na zulu.” (Matayo 5:13-16) Sambu na nki Yezu fwanisaka balongoki na yandi ti mungwa mpi mwinda?

Bangogo ya Yezu kemonisa nde balongoki na yandi kele bonso mungwa kaka ve sambu na bantu fyoti kansi sambu na bantu yonso. Bo kele bonso mwinda sambu na bantu fyoti ve kansi sambu na bantu yonso yina kezola kumona pwelele. Ntangu yandi sadilaka bangogo yina ya kifwani, Yezu monisaka pwelele nde yandi zolaka ve nde balongoki na yandi kudivandila. Sambu na nki?

Zaba nde, sambu mungwa kutanina madya yo fwete vanda ya kuvukana ti madya. Dyaka, mwinda lenda pesa ve nsemo na nzo kana yo kele ve na kati ya nzo. Yo yina, Yezu zabisaka ve balongoki na yandi na kukwenda kuzinga ntama na kingenga sambu na kusala bimvuka ya Bakristu. Yandi syamisaka mpi ve balongoki na yandi na kuzinga ya kukabwana ti bimvuka ya mabundu. Kansi, kaka mutindu mungwa fwete vukanaka ti madya mpi mwinda fwete katula mudidi na nzo, Bakristu fwete vanda ti bupusi na luzingu ya bantu yankaka.

‘Bantu ya Nsi-Ntoto Ve’

Kansi, bantuma yina Yezu pesaka balongoki na yandi na yina metala bangwisana na bo ti bantu yankaka basisaka ngyufula mosi ya mfunu sambu na nkadilu ya Bakristu na mambu ya politiki. Sambu na nki? Bilumbu fyoti na ntwala ya lufwa na yandi, Yezu sambaka Nzambi sambu na balongoki na yandi nde: “Mono ke bondila nge ve na kukatula bo na nsi-ntoto yai, kansi na kukeba bo sambu muntu ya mbi kwisa kukota na bo ve. Bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve.” (Yoane 17:15, 16) Yo yina, inki mutindu Bakristu lenda vanda ve bantu ya nsi-ntoto kaka na ntangu yina mosi kezinga kumosi ti bamfinangani na bo? Sambu na kubaka mvutu, bika beto tadila bangyufula yai zole:

• Inki mutindu Yezu vandaka kutadila mambu ya politiki?

• Keti bubu yai Bakristu fwete kota na mambu ya politiki?