Abrahami Muntu ya Zola

Abrahami kukaka ve kukanga ntima sambu na lufwa ya nkento na yandi Sara yina yandi vandaka kuzola mingi. Ntangu bo kwendaka kuzika Sara, yandi vandaka kuyibuka mambu mingi ya mbote yina nkento na yandi sadilaka yandi. Sambu yandi waka mpasi mingi na ntima yandi dilaka. (Kuyantika 23:1, 2) Na kisika ya kuwa nsoni, bidilu na yandi monisaka mosi ya bikalulu na yandi ya kuluta mbote​—zola.

ZOLA KELE INKI? Zola kele mawi ya kudipesa na muntu mosi buna. Muntu ya zola kesalaka mambu yina kemonisaka mutindu yandi kekudiwaka sambu na bantu yina yandi kezolaka, ata kusala buna kelombaka bibansa.

INKI MUTINDU ABRAHAMI MONISAKA ZOLA? Abrahami monisaka nde yandi vandaka kuzola dibuta na yandi. Ntembe kele ve nde, Abrahami vandaka ti mambu mingi ya kusala. Kansi, yandi yambulaka ata fyoti ve mawi to bampusa ya kimpeve ya dibuta na yandi. Yo yina, Yehowa bakisaka nde Abrahami bakaka ntwala na lusambu sambu yandi vandaka mfumu ya dibuta. (Kuyantika 18:19) Dyaka, Yehowa tubilaka na pwelele yonso zola ya Abrahami. Ntangu yandi vandaka kutubila Abrahami, Yehowa bingaka Izaki “mwana . . . ya nge ke zolaka mingi.”​—Kuyantika 22:2.

Beto lenda bakisa zola ya Abrahami na mutindu yandi salaka mambu na lufwa ya nkento na yandi Sara. Abrahami dilaka yandi. Ata yandi vandaka bakala ya ngolo, yandi waka ve nsoni sambu na kumonisa mawa na yandi. Abrahami monisaka na pwelele yonso kikesa mpi mawete na yandi.

Abrahami monisaka nde yandi vandaka kuzola Nzambi na yandi. Yandi monisaka zola ya mutindu yina na luzingu na yandi ya mvimba. Inki mutindu yandi salaka yo? Beto  lenda yibuka mambu yai ya Biblia ketuba na 1 Yoane 5:3: “Kana beto ke zolaka Nzambi, yo ke songa nde beto ke landaka bansiku na yandi.” Na kutadila ntendula yina, Abrahami vandaka mbandu ya mbote na yina metala zola sambu na Nzambi.

Konso ntangu yina Yehowa vandaka kupesa Abrahami ntuma mosi buna, yandi vandaka kulemfuka kukonda kusukinina. (Kuyantika 12:4; 17:22, 23; 21:12-14; 22:1-3) Yo vanda kulemfuka na nsiku yango vandaka mpasi to ve, Abrahami vandaka kudiyangisa ve sambu na kuzaba kikuma yina Yehowa lombaka yandi na kusala mambu na kuwakana ti nsiku yango. Sambu na Abrahami, mambu yina vandaka ve mfunu. Kana Nzambi na yandi vandaka kuzola nde yandi sala dyambu mosi buna, yandi vandaka kusala yo na luzolo yonso. Abrahami vandaka kumona nde konso nsiku vandaka dibaku ya kumonisa zola na yandi sambu na Yehowa.

INKI MALONGI BETO KEBAKA? Beto lenda landa mbandu ya Abrahami ntangu beto kemonisa zola ya kyeleka sambu na bantu yankaka, mingi-mingi sambu na bantu ya dibuta na beto. Beto tazola ve ata fyoti nde bampasi ya luzingu kusala nde beto konda ntangu ya kumonisa zola na bantu yina beto kezolaka.

Beto fwete sala bikesa sambu na kuyedisa zola ya kyeleka sambu na Yehowa. Zola ya mutindu yina lenda vanda ngolo mosi ya nene na luzingu na beto. Mumbandu, yo lenda pusa beto na kusoba mabanza na beto, kutuba na beto mpi bikalulu na beto sambu na kusepedisa Nzambi.​—1 Piere 1:14-16.

Ya kyeleka, kulemfukila bansiku ya Yehowa kevandaka ve ntangu yonso pete. Kansi, beto lenda ndima nde muntu yina sadisaka Abrahami disongidila Muntu yina bingaka Abrahami “nduku na mono” tasadisa beto mpi. (Yezaya 41:8) Biblia Ndinga ya Nzambi, kesila nde: “Yandi ta pesa beno ngolo, yandi mpi ta tula beno na fondasio ya ngolo.” (1 Piere 5:10) Yai kele mpenza lusilu mosi ya kesepedisa ntima yina mekatuka na Nduku yina Abrahami tudilaka ntima!

[Lupangu ya kele na lutiti 10]

Keti Bakala Kedilaka Ve?

Bantu mingi tapesa mvutu nde ee. Mbala yankaka bo tayituka na kuzaba nde Abrahami vandaka mosi ya babakala ya kikesa, ya kwikama yina Biblia kemonisaka nde na bantangu ya mpasi yandi dilaka. Bantu yankaka mpi mumbandu Yozefi, Davidi, ntumwa Piere, bankuluntu ya dibundu ya Efezo mpi nkutu Yezu dilaka. (Kuyantika 50:1; 2 Samuele 18:33; Luka 22:61, 62; Yoane 11:35; Bisalu 20:36-38) Ya kyeleka Biblia kelongaka ve nde babakala kedilaka ve.