Longuka na Ndinga ya Nzambi

Inki Mutindu Nge Lenda Kwenda Penepene na Nzambi?

Disolo yai keyulaka bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Keti Nzambi kewidikilaka bisambu yonso?

Yehowa kebinga bantu ya bansi yonso na kukwenda penepene na yandi na nzila ya kisambu. (Nkunga 65:3) Kansi, yandi kewidikilaka ve bisambu ya bantu yonso. Mu mbandu, ntangu bantu ya Izraele landaka na kusala mambu ya mbi, Nzambi kubuyaka kuwa bisambu na bo. (Yezaya 1:15) Dyaka, Nzambi kewidikilaka ve bisambu ya bakala yina kenyokulaka nkento na yandi. (1 Piere 3:7) Kansi, Nzambi tawidikila bisambu ata ya bantu yina kusalaka masumu ya nene kana bo balula ntima.​—Tanga 2 Bansangu 33:9-13.

2. Inki mutindu beto fwete samba?

Kisambu kele dibaku ya mbote mpi kitini ya lusambu na beto, yo yina beto fwete sambila kaka Yehowa. (Matayo 4:10; 6:9) Sambu beto kele bantu ya kukonda kukuka, beto fwete samba na zina ya Yezu sambu yandi kele “nzila.” (Yoane 14:6) Yehowa kezolaka ve nde, beto vutukila bisambu yina beto mekangaka na ntu to yina beto mesonikaka na mukanda mosi, kansi yandi kezolaka nde bisambu na beto kukatuka na ntima.​—Tanga Matayo 6:7; Filipi 4:6, 7.

Ngangi na beto lenda widikila ata bisambu yina beto kesalaka na nsi ya ntima. (1 Samuele 1:12, 13) Yandi kelomba beto na kusamba na mabaku yonso, mu mbandu na suka, na nkokila, na ntangu ya kudya, mpi ntangu beto kekutana ti bampasi.​—Tanga Nkunga 55:23; Matayo 15:36.

3. Sambu na inki Bakristu kekwendaka na balukutakanu?

Kukwenda penepene na Nzambi kele ve dyambu ya pete, sambu beto kezinga kumosi ti bantu yina kekwikilaka ve na Nzambi mpi kevwenzaka lusilu na yandi ya kutula ngemba na ntoto. (2 Timoteo 3:1, 4; 2 Piere 3:3, 13) Yo yina, beto fwete vukanaka ti bampangi na beto Bakristu sambu na kupesana kikesa.​—Tanga Baebreo 10:24, 25.

Nge lenda kwenda penepene na Nzambi kana nge kele nduku ya bantu yina kezolaka yandi. Balukutakanu ya Bambangi ya Yehowa kepesaka mabaku ya kubaka kikesa na nsadisa ya lukwikilu ya bampangi yankaka.​—Tanga Roma 1:11, 12.

  4. Inki mutindu nge lenda kwenda penepene na Nzambi?

Nge lenda kwenda penepene na Yehowa, kana nge keyindulula mambu yina nge melongukaka na Ndinga na yandi. Kana nge ketala lugangu, kelemfukila bantuma na yandi mpi ketula ntima na balusilu na yandi. Kuyindulula mpi kisambu kepusaka beto na kumonisa ntonda sambu na zola mpi mayele ya Nzambi.​—Tanga Yozue 1:8; Nkunga 1:1-3.

Nge lenda kwenda penepene na Nzambi kaka kana nge ketudila yandi ntima mpi kekwikila na yandi. Kansi lukwikilu kele bonso kigangwa ya moyo yina yo kelombaka nde bo pesa yo madya. Nge lenda disa lukwikilu na nge konso ntangu na kutadilaka mambu yina nge kekwikilaka.​—Tanga 1 Tesalonika 5:21; Baebreo 11:1, 6.

5. Inki mutindu kukwenda penepene na Nzambi tanatila nge mambote?

Yehowa kelungisaka bampusa ya bantu yina kezolaka yandi. Yandi ketaninaka bo na konso kima yina lenda bebisa lukwikilu na bo mpi kivuvu na bo ya luzingu ya mvula na mvula. (Nkunga 91:1, 2, 7-10) Yandi kekebisaka beto na mambu yina lenda bebisa mavimpi na beto mpi kumanisa kyese na beto. Yehowa kelongaka beto mutindu ya kuvanda na luzingu ya kuluta mbote.​—Tanga Nkunga 73:27, 28; Yakobo 4:4, 8.

Sambu na kuzaba mambu mingi, tala kapu 17 ya mukanda yai, Inki Biblia Kelongaka Mpenza?, yina Bambangi ya Yehowa mebasisaka.