Batangi na Beto Keyula . . .

▪ Bantu mingi metangaka bangogo yai ya Yezu ya kepesaka kikesa: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Keti Yezu zolaka kutuba nde bansambidi yonso ya kwikama ya Tata na yandi, Yehowa Nzambi zolaka kukwenda na zulu sambu na kuzinga mvula na mvula na kyese?

Tala bangogo yai ya Yezu ya kepusa na kuyindula: “Ata muntu mosi ve me tombukaka na zulu, kaka Mwana-muntu yina katukaka na zulu, yandi muntu me tombukaka kuna.” (Yoane 3:13) Bangogo yai kemonisa nde bansadi ya kwikama ya ntangu ya ntama mu mbandu Noa, Abrahami, Moize, mpi Davidi kukwendaka ve na zulu. (Bisalu 2:34) Kansi, bo kwendaka na wapi? Na bunkufi: Bansadi ya kwikama ya Nzambi ya ntangu ya ntama kele na mazyamu, mefwaka, kezabaka ata kima mosi ve, mpi kevingilaka lufutumuku.​—Longi 9:5, 6; Bisalu 24:15.

Yezu kele muntu ya ntete yina kutubaka nde bantu yankaka tazinga na zulu na nima ya lufwa na bo. Yandi songaka bantumwa na yandi nde, yandi takwenda kuyidikila bo bisika na zulu. (Yoane 14:2, 3) Lusilu yai kuvandaka dyambu ya mpa sambu na bansadi ya Nzambi. Na nima, ntumwa Polo kutendulaka nde na nima ya lufwa ya Yezu mpi ya lufutumuku na yandi sambu na kukwenda na zulu, Yezu ‘kukangudilaka balongoki na yandi nzila ya mpa ya moyo’​—nzila yina ata muntu mosi ve kukwendaka ntete.​—Baebreo 10:19, 20.

Keti dyambu yai ketendula nde tuka ntangu yina bansambidi yonso ya kwikama zolaka kukwenda na zulu? Ve, sambu lufutumuku sambu na kukwenda na zulu kele na kuwakana ti mukumba yina mepesamaka kaka na bantu fyoti. Na mpimpa ya nsuka yina yandi lutisaka ti bantumwa na yandi, Yezu kusongaka bo nde, bo “ta vanda na bakiti ya kimfumu sambu na kuyala” ti yandi na zulu. Yo yina, mukumba na bo kuvandaka ya kuyala ti Yezu na zulu.​—Luka 22:28-30.

Katula bantumwa, bantu yankaka mpi tabaka mukumba yina ya kitoko mingi. Na mbona-meso mosi, ntumwa Yoane kumonaka Yezu ti kibuka ya bantu yina kufutumukaka na zulu, bantu yina Biblia ketubaka nde ‘bo tavanda bamfumu mpi banganga-Nzambi sambu na kuyala nsi-ntoto.’ (Kusonga 3:21; 5:10) Bantu ikwa kuvandaka kuna? Kaka mutindu yo kevandaka na konso luyalu, kaka bantu fyoti keyalaka. Yo kele mpi mutindu mosi sambu na Kimfumu ya zulu. Yezu, Mwana-Dimeme ya Nzambi, tayala ti bantu 144 000 yina ‘yandi sumbaka na kati ya bantu.’​—Kusonga 14:1, 4, 5.

Ya kyeleka, bantu 144 000 kele fyoti kana beto fwanisa bo ti bansadi yonso ya kwikama, ya ntangu ya ntama mpi ya bilumbu na beto. Kansi, beto kebakisa dyambu yai pwelele sambu bantu 144 000 kefutumukaka sambu na kukwenda na zulu sambu na kulungisa mukumba mosi ya sikisiki mpi ya santu. Kana nge kezola kutunga nzo, keti nge tabingisa bantu yonso ya bwala na nge ya mezaba kutunga mbote? Ve. Ntembe kele ve nde nge tavanda kaka ti mfunu ya bantu fyoti yina mefwana na kusala kisalu yina. Kiteso mosi, Nzambi meponaka ve bansadi yonso ya kwikama sambu na mukumba yina ya mfunu mingi ya kuyala ti Kristu na zulu.

Luyalu ya zulu talungisa lukanu ya ntete-ntete yina Nzambi vandaka na yo sambu na bantu. Yezu mpi bantu 144 000 tatwadisa kisalu ya kukitula ntoto ya mvimba paladisu, kisika yina bantu mingi ya kwikama yina ntalu na bo mezabana ve tazinga mvula na mvula na kyese. (Yezaya 45:18; Kusonga 21:3, 4) Na kati ya bantu yango, tavanda mpi ti bantu yina kele na mabanza ya Nzambi, bayina tafutumuka.​—Yoane 5:28, 29.

Bansadi yonso ya kwikama ya Yehowa, ya ntangu ya ntama mpi ya bilumbu na beto, lenda baka dikabu ya kitoko ya luzingu ya mvula na mvula. (Roma 6:23) Mwa ndambu tabaka luzingu ya mvula na mvula na zulu sambu na kulungisa mukumba mosi ya mfunu mingi, mpi bantu mingi tabaka luzingu ya mvula na mvula na ntoto yina takituka paladisu.