Keti Beto Lenda Bakisa Biblia?

“Dibuta na beto ketangaka Biblia konso Lumingu. Mu vandaka kusepela mpenza ve ti yo. Mu vandaka kundima nde Biblia kele Ndinga ya Nzambi, kansi mambu mingi ya mu vandaka kutanga kuvandaka mpasi na kubakisa.” ​—Steven, Grande-Bretagne.

“Ntangu mu vandaka ti bamvula 17, mu vandaka kumeka kutanga Biblia. Mu vandaka kumona nde yo kele mpasi na kubakisa, yo yina mu yambulaka.”​—Valvanera, Espagne.

“Mu ketangaka Biblia kaka sambu mu keyindulaka nde, sambu mu kele muntu ya Katolika, mu fwete tanga yo. Mu salaka bamvula tatu sambu na kumanisa yo. Kansi mu bakisaka kaka mambu fyoti mpenza.”​—Jo-Anne, Australie.

TII bubu yai, Biblia kele mukanda ya mezabanaka mingi na ntoto ya mvimba. Yo kelanda na kutekama kuluta mikanda yonso yankaka, bantu mingi mpenza kele na yo, yo kele na bandinga mingi, mpi bo menyemaka yo na mitindu mingi mpenza. Ata mpidina, bantu mingi yina kele ti Biblia kemonaka nde yo kele mpasi na kubakisa. Keti yo kele mutindu yina sambu na nge?

Keti Munkwa na Yo Kezolaka nde Beto Bakisa Ndinga na Yandi?

Biblia ketuba nde: “Bo sonikaka Mukanda ya Nzambi yonso na ngolo na yandi.” (2 Timoteo 3:16) Ee, Yehowa Nzambi kele Munkwa ya Biblia. Keti yandi kezolaka nde beto bakisa Ndinga na yandi? To keti yandi mesalaka na luzolo yonso sambu bantu yonso kubakisa ve Biblia, kansi yandi mepesaka dibaku ya kubakisa yo na bantu fyoti mpamba, mu mbandu bamfumu ya mabundu mpi bantu ya mayele yina kelongukaka Biblia?

Tadila baverse yai ya melanda na Biblia:

“Bansiku ya mono me pesa beno bubu yai yo kele mpasi ve, yo me luta beno mpi na ngolo ve.”​—Kulonga 30:11.

“Malongi na nge ke temusaka mono, yo ke pesaka mayele na bantu yina ke na mayele fioti.”​—Nkunga 119:130.

“Na ntangu yo yina kaka, Yesu monaka kiese na lusadisu ya Mpeve ya Nzambi. Ebuna yandi tubaka nde: ‘Tata, nge muntu kele Mfumu ya ntoto ti ya zulu, mono ke pesa nge mersi sambu mambu yina ya nge me bumbaka na bantu ya mayele ti na bantu yina me longukaka, nge me kwisa kuzabisa yo na bantu yina me longukaka ve.’”​—Luka 10:21.

Ya kyeleka, Munkwa ya Biblia kezola nde nge bakisa Ndinga na yandi! Kansi, ata mpidina, bantu mingi ya masonga kemonaka nde mukanda yai kele mpasi na kubakisa. Inki lenda sadisa bo? Masolo yai ya kelanda ketubila bangindu tatu yina lenda sadisa nge na kubakisa Biblia.