1, 2. (a) Inki ke ndimisaka nge nde Yehowa ke zolaka bansadi na yandi? (b) Yehowa me gangaka beto ti nki mpusa?

INKI ke ndimisa nge nde Yehowa ke zolaka bansadi na yandi? Na ntwala ya kupesa mvutu na ngiufula yai, tadila bambandu yai: Na nsungi ya bamvula mingi, bampangi-Bakristu pesaka mpangi-nkento Taylene kikesa. Bo zabisaka yandi na kudiyangisa mingi ve. Taylene ke tuba nde: “Kana Yehowa ke zolaka mono ve, yandi zolaka ve kulanda kupesa mono bandongisila na yandi.” Brigitte, yina kumaka kusansa bana na yandi zole yandi mosi na nima ya lufwa ya bakala na yandi ke tuba nde: “Kusansa bana na ngidika yai ya Satana kele diambu mosi ya mpasi kuluta, mingi-mingi kana kibuti kele yandi mosi. Kansi, mono ke ndimaka nde Yehowa ke zolaka bansadi na yandi sambu yandi sadisaka mono na bantangu ya mpasi mpi yandi pesaka ve ata fioti nzila nde mono kutana ti bampasi yina mono ta kuka ve kukanga ntima.” (1 Bakorinto 10:13) Sandra ke belaka maladi mosi ya ngolo yina ke manaka ve. Na lukutakanu mosi ya nene, mpangi-nkento mosi tudilaka yandi dikebi. Bakala ya Sandra ke  tuba nde: “Ata beto zabaka yandi ve, zola yina yandi monisilaka beto pesaka beto kiese mingi. Ata bangogo ya fioti ya zola yina bampangi ke tubilaka beto ke ndimisaka mono nde Yehowa ke zolaka beto mingi.”

² Yehowa me gangaka beto ti mpusa ya kuzola bantu ya nkaka mpi kudiwa nde bantu ya nkaka ke zolaka beto. Kansi, beto lenda lemba nitu nswalu sambu na maladi, mpasi ya mbongo to sambu kisalu na beto ya kusamuna ke buta ve mbuma ya mbote. Kana beto me kuma kuyindula nde Yehowa ke zolaka beto diaka ve, beto fwete yibuka nde beto kele na mbalu na meso na yandi mpi nde yandi kele na lweka na beto, me simba diboko na beto ya kitata sambu na kusadisa beto. Kana beto kele ya kwikama na Yehowa, yandi ta vila beto ve ata fioti.—Yezaya 41:13; 49:15.

3. Inki ke ndimisa nde zola yina Yehowa ke monisilaka beto ke manaka ve?

³ Bampangi yina beto me tubila na luyantiku ndimaka nde Nzambi sadisaka bo na bantangu ya mpasi. Beto mpi ke ndima nde Yehowa ke sadisaka beto. (Nkunga 118:6, 7) Na disolo yai, beto ta tubila bima iya yina Yehowa me pesaka beto, yina ke ndimisaka nde yandi ke zolaka beto: (1) bima yina yandi me gangaka, (2) Biblia, (3) kisambu, mpi (4) nkudulu. Kuyindulula bima yai ya kitoko ta sadisa beto na kumonisa ntonda ya mingi na zola ya Yehowa yina ke manaka ve.—Tanga Nkunga 77:12, 13.

4. Bima yina Yehowa me gangaka ke ndimisaka beto nki?

⁴ Ntangu beto ke talaka bima yina Yehowa me gangaka, beto ke ndimaka nde yandi ke zolaka beto mingi. (Baroma 1:20) Mu mbandu, Yehowa me gangaka ntoto mpi me tulaka bima mingi na kati na mpila nde beto sala mambu mingi ya nkaka na kisika ya kuzinga kaka. Yandi me pesaka beto bima yonso yina beto ke vandaka na yo mfunu sambu na kuzinga mbote. Beto ke vandaka ti mfunu ya kudia, yo yina Yehowa me pesaka beto bima mingi ya kudia sambu kudia kuvanda diambu yina ke pesa kiese kibeni! (Longi 9:7) Mpangi-nkento Catherine ke sepelaka ntangu yandi ke talaka bima yina Nzambi me gangaka, mingi-mingi na nsungi ya mvula na Canada. Yandi ke tuba nde: “Ya kieleka, yo ke vandaka kiese mingi na kumona mutindu bima ke basika, mu mbandu bintuntu yina ke basika na ntoto, bandeke yina salaka nzietelo ke vutuka, mpi tubandeke ya fioti yina ke kwisaka kudia na lweka ya fenetre ya kinkuku na mono. Yehowa ke zolaka beto mingi yo yina yandi me salaka bima yina ke pesaka beto kiese mingi.” Tata na beto ke zolaka bima yina yandi me gangaka, mpi yandi ke zola nde beto sepela ti yo.—Bisalu 14:16, 17.

5. Inki mutindu zola ya Yehowa ke monanaka na mutindu yina yandi me salaka bantu?

⁵ Yehowa me salaka beto ti makuki ya kusala kisalu mpi kusepela na kisalu yina. (Longi 2:24) Yandi me pesaka beto mukumba ya kufulusa ntoto, kukuna bima ya nkaka na kati, kuyala bambisi ya masa, bandeke, mpi bima ya nkaka yina ke zingaka na ntoto.  (Kuyantika 1:26-28) Yandi me gangaka beto mpi ti bikalulu ya kitoko sambu beto landa kibeni mbandu na yandi!—Baefezo 5:1.

6. Sambu na nki beto fwete baka Ndinga ya Nzambi na mbalu?

⁶ Yehowa me pesaka beto Biblia sambu yandi ke zolaka beto mingi. Yo ke zabisaka beto mambu yina beto ke vandaka na mfunu ya kuzaba na yina me tala Yehowa mpi mutindu yandi ke sadilaka bantu mambu. Mu mbandu, Biblia ke zabisaka beto mutindu Yehowa vandaka kusadila bantu ya Izraele mambu bantangu yonso yina bo vandaka kukolama. Nkunga 78:38 ke tuba nde: “Nzambi wilaka bantu na yandi mawa, yandi landaka ve masumu na bo, yandi fwaka bo ve. Mbala mingi yandi vandaka kukanga ntima, yandi vandaka kuwa makasi ve.” Kuyindulula verse yai lenda sadisa nge na kubakisa nde Yehowa ke zolaka nge mingi mpi yandi ke kudibanzaka sambu na nge. Beto fwete ndima nde Yehowa ke kudibanzaka kibeni sambu na beto.—Tanga 1 Piere 5:6, 7.

7. Sambu na nki Biblia kele na mbalu mingi?

 ⁷ Beto fwete baka Biblia na mbalu mingi. Sambu na nki? Sambu Yehowa ke solulaka ti beto na nzila na yo. Ntangu kibuti ke solula ti mwana na yandi mbote, zola na bo ke kumaka ngolo mpi bo ke kumaka kutudilana ntima. Yehowa kele Tata na beto ya zola. Ata beto me monaka yandi ve to me waka ve mungungu na yandi, yandi ke solulaka ti beto na nzila ya Biblia. Beto fwete landa na kuwidikila yandi! (Yezaya 30:20, 21) Ntangu beto ke tangaka Biblia, beto ke zabaka Yehowa mpi ke tudilaka yandi ntima, sambu yandi ke twadisaka beto mpi ke taninaka beto.—Tanga Nkunga 19:8-12; Bingana 1:33.

8, 9. Inki Yehowa ke zolaka nde beto bakisa? Pesa mbandu mosi ya Biblia.

⁸ Yehowa ke zolaka nde beto bakisa nde yandi ke zolaka beto mpi nde yandi ke talaka mambu ya mbote ya kimuntu na beto na kisika ya kutula dikebi kaka na bifu na beto. (2 Bansangu 16:9) Bika beto tadila mutindu Yehowa monaka mambu ya mbote na Yozafati, Ntotila ya Yuda. Yozafati bakaka lukanu mosi ya mbi ya kuvukana ti Akabi, Ntotila ya Izraele, sambu na kunwanisa bantu ya Siria na Ramoti-Galadi. Ata baprofete ya luvunu 400 zabisaka Akabi muntu ya mbi nde yandi ta nunga bitumba, Mika (Mikaya), profete ya kieleka ya Yehowa zabisaka Yozafati mpi Akabi nde kana bo nwana bitumba yina, bo ta nunga ve. Yo salamaka kaka mutindu yina. Akabi fwaka na mvita yina, Yozafati gulukaka kansi na mpasi. Na nima ya mvita, Yehowa tindaka Yehu na kupesa Yozafati bandongisila sambu na lukanu ya mbi yina yandi bakaka. Ata mpidina, Yehu yikaka nde: “Mambu ya nkaka ya nge salaka kele ya mbote.”—2 Bansangu 18:4, 5, 18-22, 33, 34; 19:1-3.

⁹ Na bamvula yina lutaka, Yozafati zabisaka bamfumu, Balevi, mpi banganga-nzambi na kukwenda na bambanza yonso ya Yuda sambu na kulonga bantu bansiku ya Yehowa. Yo vandaka diambu mosi ya mbote kibeni, sambu yo sadisaka bantu ya makanda ya nkaka na kuzaba Yehowa. (2 Bansangu 17:3-10) Yo yina, ata Yozafati bakaka lukanu ya mbi na nima, Yehowa vilaka ve mambu ya mbote yina yandi salaka na luzingu na yandi. Mbandu yai ke pesa beto kikesa sambu bantangu ya nkaka, beto ke salaka mpi mambu ya mbi. Kansi, kana beto ke sala bikesa ya kusadila Yehowa, yandi ta landa na kuzola beto mpi yandi ta vila ve mambu ya mbote yina beto ke salaka.

10, 11. (a) Sambu na nki kisambu kele dikabu mosi ya mbalu yina Yehowa me pesaka beto? (b) Inki mutindu Nzambi lenda pesa mvutu na bisambu na beto? (Tala kifwanisu yina kele na luyantiku ya disolo.)

¹⁰ Tata ya zola ke widikilaka bana na yandi ntangu bo ke solula ti yandi. Yandi ke zolaka kuzaba mawi na bo sambu yandi ke kudibanzaka mingi sambu na bo. Yehowa, Tata na beto ya zola ke salaka mpi mutindu mosi. Yandi ke widikilaka beto ntangu beto ke sambaka yandi. Kusolula ti Tata na beto kele dibaku mosi ya mbalu kibeni!

¹¹ Beto lenda samba Yehowa konso ntangu. Yandi kele Nduku na beto, mpi ntangu yonso yandi ke vandaka ya kuyilama na kuwidikila bisambu na beto. Taylene, yina beto tubilaka na luyantiku ke tuba nde: “Nge lenda zabisa yandi konso diambu yina.” Ntangu beto ke zabisaka Yehowa mawi na beto, yandi lenda pesa beto mvutu na nzila ya Biblia, ya disolo mosi na mikanda na beto, to na nsadisa ya bangogo ya kikesa ya mpangi mosi. Yehowa ke waka bisambu na beto mpi yandi ke bakisaka beto, ata ntangu bantu yonso ke bakisa  beto ve. Mvutu yina yandi ke pesaka na bisambu na beto ke monisaka nde zola yina yandi ke vandaka na yo sambu na beto ke manaka ve.

12. Sambu na nki beto fwete longuka bisambu yina kele na Biblia? Pesa mbandu.

¹² Beto lenda baka malongi ya mfunu na bisambu ya bantu yina Biblia ke tubilaka. Yo kele mbote nde, bantangu ya nkaka, beto longuka bisambu ya mutindu yai na lusambu na beto ya dibuta. Kana beto ke yindulula bisambu ya masonga yina bansadi ya nkaka ya Nzambi salaka, beto ta tomisa mutindu na beto ya kusamba. Mu mbandu, beto lenda tadila kisambu ya kudikulumusa yina Yonasi salaka ntangu yandi vandaka na divumu ya mbisi mosi ya nene. (Yonasi 1:17–2:10) Beto lenda tadila mpi kisambu ya masonga yina Salomo salaka na nkinsi ya kukangula tempelo. (1 Bantotila 8:22-53) Diaka, yindulula kisambu ya mbandu ya Yezu. (Matayo 6:9-13) Diambu ya kuluta mfunu kele nde, ‘beto fwete zabisa Nzambi balombilu na beto’ mbala na mbala. Ebuna, ‘ngemba ya Nzambi yina me luta mambu yonso yina bantu lenda bakisa ta tanina bantima na beto mpi mabanza na beto.’ Yo ta sadisa beto na kumonisa diaka ntonda ya mingi na zola ya Yehowa yina ke manaka ve.—Bafilipi 4:6, 7.

13. Nkudulu ke pesa beto nki dibaku?

¹³ Yehowa me pesaka beto dikabu ya nkudulu sambu “beto baka luzingu.” (1 Yoane 4:9) Ntangu ntumwa Polo yindulaka nkudulu, diambu ya kuluta nene ya ke monisaka zola ya Nzambi, yandi sonikaka nde: “Ntangu beto vandaka ntete ngolo ve, Kristu fwaka sambu na bantu yina ke vwezaka Nzambi, na ntangu ya bo me tulaka. Yo ke vandaka mpasi nde muntu kufwa sambu na muntu mosi ya lunungu; ya kieleka, sambu na muntu ya mbote, ziku muntu lenda ndima na kufwa. Kansi Nzambi ke monisa zola na yandi sambu na beto na mutindu yai: Ntangu beto vandaka ntete bansumuki, Kristu fwaka sambu na beto.” (Baroma 5:6-8) Nkudulu kele diambu ya ntete yina ke monisa zola ya Nzambi, mpi yo ke pesaka bantu dibaku ya kuvanda na bangwisana ya ngolo ti Nzambi.

14, 15. Inki dibaku nkudulu ke pesaka (a) Bakristu yina bo me tulaka mafuta? (b) Bakristu yina kele ti kivuvu ya kuzinga na ntoto?

¹⁴ Bakristu ya kibuka ya fioti me bakisaka nde Yehowa me monisilaka bo zola na yandi yina ke manaka ve na mutindu ya kuluta nene. (Yoane 1:12, 13; 3:5-7) Nzambi me tulaka Bakristu yai mafuta na mpeve santu, bo me kumaka bana na yandi. (Baroma 8:15, 16) Bankaka na kati na bo kele diaka na ntoto, kansi sambu na nki Polo ke tuba nde bo me vanda “kumosi na bisika ya zulu na bumosi ti Kristu Yezu”? (Baefezo 2:6) Sambu Yehowa me pesaka bo kivuvu ya luzingu ya mvula na mvula na zulu.—Baefezo 1:13, 14; Bakolosai 1:5.

¹⁵ Bakristu yonso yina bo me tulaka ve mafuta lenda kuma banduku ya Nzambi kana bo monisa lukwikilu na nkudulu. Bo mpi kele ti dibaku ya kukuma bana ya Nzambi mpi  kuzinga mvula na mvula na ntoto. Nkudulu ke monisaka zola yina Yehowa ke vandaka na yo sambu na bantu yonso. (Yoane 3:16) Yo kele kiese kibeni na kuzaba nde, kana beto ke sadila Nzambi na kwikama yonso, yandi ta pesa beto luzingu ya kitoko na nsi-ntoto ya mpa! Yo yina, bika beto monisa nde beto ke bakaka nkudulu na mbalu, sambu yo kele nzikisa ya kuluta nene ya zola ya Nzambi yina ke manaka ve.

16. Inki beto ta sala na nima ya kuyindulula zola ya Nzambi?

¹⁶ Beto ta kuka ve kutanga mitindu yonso yina Yehowa me monisilaka beto zola. Ntotila Davidi yimbaka nde: “Bangindu na nge kele mfunu mingi sambu na mono! O Nzambi, ntalu na yo kele mingi kibeni! Kana mono meka kutanga yo, yo me luta bambuma ya zelo.” (Nkunga 139:17, 18, NW) Kuyindula mitindu mingi yina Yehowa me monisilaka beto zola ta pusa beto na kuzola yandi mpi na kusadila yandi na luzolo yonso.

17, 18. Inki mambu beto lenda sala sambu na kumonisa nde beto ke zolaka Nzambi?

¹⁷ Beto kele ti mitindu mingi ya kumonisa nde beto ke zolaka Yehowa. Mu mbandu, beto lenda monisa nde beto ke zolaka Yehowa kana beto ke zabisa bantu ya nkaka nsangu ya Kimfumu na kikesa yonso. (Matayo 24:14; 28:19, 20) Beto lenda monisa mpi nde beto ke zolaka Nzambi kana beto ke kanga ntima na bampasi yina ke mekaka lukwikilu na beto. (Tanga Nkunga 84:12; Yakobo 1:2-5.) Ata beto ke kutana ti bampasi ya ngolo, beto fwete ndima nde Yehowa ke mona bampasi na beto mpi nde yandi ta sadisa beto sambu yandi ke bakaka beto na mbalu.—Nkunga 56:9.

¹⁸ Zola na beto sambu na Yehowa ke pusaka beto na kuyindulula bima ya kuyituka yina yandi me gangaka. Beto ke monisaka nde beto ke zolaka Yehowa mpi Ndinga na yandi, ntangu beto ke longukaka yo na dikebi yonso. Beto ke sambaka Yehowa mbala na mbala sambu beto ke zolaka yandi mpi beto ke zolaka kukumisa bangwisana na beto ti yandi ngolo. Diaka, ntangu beto ke yindulaka dikabu na yandi ya mbalu ya nkudulu, zola na beto sambu na yandi ke kumaka ngolo. (1 Yoane 2:1, 2) Yai kele kaka mambu fioti na kati ya mambu mingi yina beto ke salaka sambu na kumonisa Yehowa nde beto ke sepelaka na zola yina ke manaka ve, yina yandi ke monisilaka beto.