Bangyufula ya Batangi

Inki kesala nde “bima ya mfunu ya makanda yonso” kukota na “nzo” ya lusambu ya kyeleka?​—Agai 2:7, NW.

Yehowa kutubaka mutindu yai na nzila ya profete Agai: “Mono tanikisa makanda yonso, ebuna bima ya mfunu ya makanda yonso fwete kwisa kukota; mpi mono tafulusa nzo yai na lukumu.” (Agai 2:7) Keti kunikana “ya makanda yonso” kima kesala nde “bima ya mfunu” ya makanda, disongidila bantu ya ntima masonga, kundima lusambu ya kyeleka? Ve.

Beto tadila kima yina kenikisa makanda mpi mambu yina kesalama na nima. Biblia ketuba nde makanda “ke sosa kutombuka” mpi “bo ke na bangindu ya mpamba-mpamba.” (Nkunga 2:1) “Bangindu ya mpamba-mpamba” ya bo kelanda na kuyindula kele kutanina kimfumu na bo. Kima ya kenikisa bo kele konso kima yina ketula kimfumu na bo na kigonsa.

Kisalu ya kusamuna Kimfumu ya Nzambi yina Bambangi ya Yehowa kesala na inza ya mvimba kima ketula makanda na kigonsa. Ya kyeleka, Yezu Kristu kele ntotila ya Kimfumu ya Nzambi. Kimfumu yango “ta fwa” bimfumu yonso ya bantu mesalaka. (Daniele 2:44) Nsangu ya lusambisu ya kele na kati ya bansangu ya beto kelongaka kenikisa makanda. (Yezaya 61:2) Ebuna, sambu bantu ya kesala kisalu ya kusamuna kesala yo ti kikesa yonso mpi na bisika mingi, makanda kenikana dyaka ngolo kuluta. Kunikana ya bo tubilaka na Agai 2:7 kemonisa inki?

Beto ketanga mutindu yai na Agai 2:6: “Kubika fioti mono Mfumu Nzambi . . . ke nikisa zulu, ntoto ti nzadi-mungwa.” Ntumwa Polo kuvutukilaka verse yai, mpi yandi sonikaka nde: “Yandi ke sila beto mambu yai nde: ‘Mono ta nikisa ntoto diaka mbala ya nkaka, ntoto kaka ve, kansi ti zulu mpi.’ Mambu yai ‘mbala ya nkaka diaka’, ke songa nde bima yina ya yandi salaka yandi ta nikisa yo, ebuna yo ta vila ka yo na mpila nde bima yina ke nikanaka ve [Kimfumu] yo bikala.” (Baebreo 12:26, 27) Ya kyeleka, ngidika ya mvimba ya bima ya ntangu yai tafwa mpi tabika kisika na inza ya mpa yina Nzambi tasala.

Bantu ya ntima masonga kendima lusambu ya kyeleka, kansi yo kele ve sambu na kunikana ya makanda. Kima kebenda bantu ya ntima masonga na Yehowa mpi na lusambu na yandi kele kaka kima yina kesala nde makanda kunikana, disongidila kisalu ya kusamuna Kimfumu ya Nzambi yina yandi metulaka. Kisalu ya kusamuna “Nsangu ya Mbote ya mvula na mvula” kebenda bantu ya ntima masonga na kusambila Nzambi ya kyeleka.​—Kusonga 14:6, 7.

Nsangu ya Kimfumu kele nsangu ya kusambisa mpi ya luguluku. (Yezaya 61:1, 2) Kisalu ya kusamuna yina kesalama na inza ya mvimba kelungisa mambu yai zole: yo kenikisa makanda mpi yo kesala nde bima ya mfunu ya makanda kukota na nzo ya Yehowa, mpi yo kepesa yandi lukumu.